ਕੇਸਰ ਤੋਂ ਲੰਗੜੇ ਤਕ : ਭਾਰਤੀ ਅੰਬਾਂ ਦੀ ਮਹਿਕ
ਵਾਸ਼ਿੰਗਟਨ : ਜਿਥੇ ਜਪਾਨ ਨੇ ਭਾਰਤੀ ਅੰਬਾਂ ਦੀ ਦਰਾਮਦ ’ਤੇ ਰੋਕ ਲਗਾ ਦਿਤੀ ਹੈ, ਉਥੇ ਅਮਰੀਕਾ ਵਿਚ ਭਾਰਤੀ ਅੰਬਾਂ ਦੀ ਮਿੱਠਾਸ ਨੇ ਲੋਕਾਂ ਨੂੰ ਅਪਣਾ ਮੁਰੀਦ ਬਣਾ ਲਿਆ ਹੈ। ਕੇਸਰ, ਅਲਫੋਂਸੋ, ਲੰਗੜਾ ਅਤੇ ਦੁਸ਼ਹਿਰੀ ਵਰਗੀਆਂ ਮਸ਼ਹੂਰ ਕਿਸਮਾਂ ਦੀ ਮੰਗ ਇਸ ਕਦਰ ਵਧ ਗਈ ਹੈ ਕਿ ਵੱਡੇ ਰਿਟੇਲ ਸਟੋਰਾਂ ਵਿਚ ਪਹੁੰਚਣ ਦੇ ਕੁਝ ਘੰਟਿਆਂ ਅੰਦਰ ਹੀ ਸਾਰਾ ਸਟਾਕ ਵਿਕ ਜਾਂਦਾ ਹੈ। ਸ਼ਿਆਟਲ ਤੋਂ ਲਾਸ ਏਂਜਲਸ ਅਤੇ ਨਿਊ ਜਰਸੀ ਤੋਂ ਵਾਸ਼ਿੰਗਟਨ ਡੀ.ਸੀ. ਤਕ ਭਾਰਤੀ ਅੰਬਾਂ ਦੀ ਖੁਸ਼ਬੂ ਅਤੇ ਸੁਆਦ ਦਾ ਜਾਦੂ ਛਾਇਆ ਹੋਇਆ ਹੈ।
ਅਮਰੀਕਾ ਵਿਚ ਭਾਰਤ ਦੇ ਰਾਜਦੂਤ ਵਿਨੈ ਕਵਾਤਰਾ ਅਨੁਸਾਰ ਭਾਰਤੀ ਅੰਬਾਂ ਦੀ ਲੋਕਪ੍ਰਿਯਤਾ ਹੁਣ ਸਿਰਫ਼ ਪ੍ਰਵਾਸੀ ਭਾਰਤੀਆਂ ਤਕ ਸੀਮਤ ਨਹੀਂ ਰਹੀ, ਸਗੋਂ ਅਮਰੀਕੀ ਖਪਤਕਾਰ ਵੀ ਇਨ੍ਹਾਂ ਦੇ ਬੇਮਿਸਾਲ ਸੁਆਦ ਦੇ ਕਾਇਲ ਹੋ ਰਹੇ ਹਨ। ਦਹਾਕਿਆਂ ਤਕ ਭਾਰਤੀ-ਅਮਰੀਕੀ ਪਰਵਾਰ ਗਰਮੀਆਂ ਵਿਚ ਅੰਬਾਂ ਦਾ ਅਸਲ ਸੁਆਦ ਲੈਣ ਲਈ ਭਾਰਤ ਆਉਂਦੇ ਰਹੇ, ਪਰ ਹੁਣ ਉਹੀ ਅਨੁਭਵ ਉਨ੍ਹਾਂ ਨੂੰ ਅਪਣੇ ਸ਼ਹਿਰ ਦੇ ਸਟੋਰਾਂ ਵਿਚ ਹੀ ਮਿਲ ਰਿਹਾ ਹੈ।
ਕਵਾਤਰਾ ਨੇ ਕਿਹਾ ਕਿ ਅੰਬ ਭਾਰਤੀਆਂ ਲਈ ਕੇਵਲ ਫਲ ਨਹੀਂ, ਸਗੋਂ ਬਚਪਨ ਦੀਆਂ ਗਰਮੀਆਂ ਅਤੇ ਸੁਹਾਵਣੀਆਂ ਯਾਦਾਂ ਦਾ ਅਟੁੱਟ ਹਿੱਸਾ ਹੈ। ਇਸ ਵਧਦੀ ਲੋਕਪ੍ਰਿਯਤਾ ਦੀ ਤਾਜ਼ਾ ਮਿਸਾਲ ਸ਼ਿਆਟਲ ਵਿਚ ਦੇਖਣ ਨੂੰ ਮਿਲੀ, ਜਿਥੇ ਭਾਰਤੀ ਕੌਂਸਲੇਟ ਵਲੋਂ ਕਰਵਾਏ ‘ਮੈਂਗੋ ਮੈਜਿਕ’ ਪ੍ਰੋਗਰਾਮ ਵਿਚ 100 ਤੋਂ ਵੱਧ ਆਯਾਤਕਾਰਾਂ, ਵਿਤਰਕਾਂ ਅਤੇ ਵੱਡੀਆਂ ਰਿਟੇਲ ਚੇਨਾਂ ਦੇ ਅਧਿਕਾਰੀਆਂ ਨੇ ਹਿੱਸਾ ਲਿਆ। ਪ੍ਰੋਗਰਾਮ ਦੌਰਾਨ ਅਲਫੋਂਸੋ, ਕੇਸਰ, ਬੰਗਨਾਪੱਲੀ, ਹਿਮਾਇਤ, ਲੰਗੜਾ, ਦੁਸ਼ਹਿਰੀ ਅਤੇ ਰਾਜਾਪੁਰੀ ਸਮੇਤ ਸੱਤ ਪ੍ਰੀਮੀਅਮ ਕਿਸਮਾਂ ਦਾ ਸੁਆਦ ਚਖਾਇਆ ਗਿਆ।
