ਨੂਰਜਹਾਂ ਅੰਬ ਦੀ ਇਸ ਸੀਜ਼ਨ ਦੀ ਫ਼ਸਲ ਤਸੱਲੀਬਖ਼ਸ਼ ਰਹੀ ਹੈ

ਅਲੀਰਾਜਪੁਰ : ਮੱਧ ਪ੍ਰਦੇਸ਼ ਦੇ ਅਲੀਰਾਜਪੁਰ ਜ਼ਿਲ੍ਹੇ ਦੇ ਕੱਠੀਵਾੜਾ ਖੇਤਰ ਵਿਚ ‘ਨੂਰਜਹਾਂ’ ਅੰਬ ਦੀ ਇਕ ਦੁਰਲੱਭ ਕਿਸਮ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ, ਜਿਸ ਨੂੰ ‘ਅੰਬਾਂ ਦੀ ਰਾਣੀ’ ਕਿਹਾ ਜਾਂਦਾ ਹੈ। ਇਸ ਸੀਜ਼ਨ ਦੌਰਾਨ ਇਕ ਅੰਬ ਦਾ ਵਜ਼ਨ 3.3 ਕਿਲੋਗ੍ਰਾਮ ਤਕ ਦਰਜ ਕੀਤਾ ਗਿਆ, ਜੋ 3,800 ਰੁਪਏ ਵਿਚ ਵਿਕਿਆ।

ਇਲਾਕੇ ਦੇ ਬਾਗਬਾਨ ਭਰਤਰਾਜ ਸਿੰਘ ਯਾਦਵ ਨੇ ਦਸਿਆ, ‘‘ਨੂਰਜਹਾਂ ਅੰਬ ਦੀ ਇਸ ਸੀਜ਼ਨ ਦੀ ਫ਼ਸਲ ਤਸੱਲੀਬਖ਼ਸ਼ ਰਹੀ ਹੈ। ਮੇਰੇ ਬਾਗ ਵਿਚ ਹੁਣ ਤਕ ਦਾ ਸੱਭ ਤੋਂ ਵੱਡਾ ਨੂਰਜਹਾਂ ਅੰਬ 3.30 ਕਿਲੋਗ੍ਰਾਮ ਦਾ ਸੀ, ਜੋ ਮੈਂ 3,800 ਰੁਪਏ ਵਿਚ ਵੇਚਿਆ।’’

ਉਨ੍ਹਾਂ ਅੱਗੇ ਕਿਹਾ, ‘‘ਅਸੀਂ ਨੂਰਜਹਾਂ ਅੰਬ ਦੀ ਕਾਸ਼ਤ ਵਿਚ ਰਸਾਇਣਾਂ ਦੀ ਵਰਤੋਂ ਨਹੀਂ ਕਰਦੇ। ਅਸੀਂ ਰੁੱਖਾਂ ਦੀ ਦੇਖਭਾਲ ਲਈ ਜੰਗਲਾਂ ਤੋਂ ਪ੍ਰਾਪਤ ਜੈਵਿਕ ਰਹਿੰਦ-ਖੂੰਹਦ ਤੇ ਕੁਦਰਤੀ ਸਰੋਤਾਂ ਦੀ ਵਰਤੋਂ ਕਰਦੇ ਹਾਂ।’’ ਇਕ ਹੋਰ ਬਾਗਬਾਨ ਸ਼ਿਵਰਾਜ ਯਾਦਵ ਨੂੰ ਉਮੀਦ ਹੈ ਕਿ ਮੌਸਮ ਦੇ ਅਨੁਕੂਲ ਰਹਿਣ ਨਾਲ ਕੁੱਝ ਅੰਬਾਂ ਦਾ ਵਜ਼ਨ 4 ਕਿਲੋਗ੍ਰਾਮ ਤਕ ਵੀ ਪਹੁੰਚ ਸਕਦਾ ਹੈ। (ਪੀ.ਟੀ.ਆਈ.)