OPPO, OnePlus ਅਤੇ Realme ਵਰਗੇ ਬ੍ਰਾਂਡਾਂ ਦੇ ਨਕਲੀ ਉਤਪਾਦ ਕੀਤੇ ਬਰਾਮਦ
ਨਵੀਂ ਦਿੱਲੀ : ਦਿੱਲੀ ਪੁਲਿਸ ਨੇ ਵੱਡੇ ਛਾਪੇ ਅਤੇ ਜ਼ਬਤੀ ਓਪਰੇਸ਼ਨ ਦੌਰਾਨ ਓਪੋ, ਵਨਪਲੱਸ ਅਤੇ ਰਿਅਲਮੀ ਬ੍ਰਾਂਡਾਂ ਦੇ ਭਾਰੀ ਮਾਤਰਾ ਵਿਚ ਨਕਲੀ ਉਤਪਾਦ ਬਰਾਮਦ ਕੀਤੇ ਹਨ। ਇਸ ਕਾਰਵਾਈ ਵਿਚ ਦੋ ਗੋਦਾਮ ਅਤੇ ਇੱਕ ਫੈਕਟਰੀ ਨੂੰ ਸੀਲ ਕੀਤਾ ਗਿਆ ਹੈ। ਦਿੱਲੀ ਪੁਲਿਸ ਕ੍ਰਾਈਮ ਬ੍ਰਾਂਚ ਦੀ ਏ.ਜੀ.ਐੱਸ. ਯੂਨਿਟ ਨੇ ਇਹ ਵੱਡੀ ਕਾਰਵਾਈ ਕੀਤੀ ਹੈ । ਕਰੋਲ ਬਾਗ ਦੇ ਰੇਗੜਪੁਰਾ ਵਿਚ ਸਥਿਤ ਦੋ ਗੋਦਾਮਾਂ ਨੂੰ ਸੀਲ ਕੀਤਾ ਗਿਆ। ਇਨ੍ਹਾਂ ਗੋਦਾਮਾਂ ਵਿਚ ਨਕਲੀ ਉਤਪਾਦਾਂ ਦੀ ਪੈਕਿੰਗ ਅਤੇ ਬ੍ਰਾਂਡਿੰਗ ਦਾ ਕੰਮ ਚੱਲ ਰਿਹਾ ਸੀ ।
ਦਿੱਲੀ ਦੇ ਮੋਤੀ ਨਗਰ ਵਿਚ ਸਥਿਤ ਇੱਕ ਫੈਕਟਰੀ ਵੀ ਸੀਲ ਕੀਤੀ ਗਈ ਹੈ।ਇਸ ਫੈਕਟਰੀ ਵਿਚ ਇਨ੍ਹਾਂ ਕੰਪਨੀਆਂ ਦੇ ਉਤਪਾਦਾਂ ਦੇ ਪੈਕੇਜਿੰਗ ਬਾਕਸ ਤਿਆਰ ਕੀਤੇ ਜਾ ਰਹੇ ਸਨ। ਗੈਰਕਾਨੂੰਨੀ ਗਤੀਵਿਧੀ ਵਿਚ ਵਰਤੀਆਂ ਜਾਣ ਵਾਲੀਆਂ 8 ਮਸ਼ੀਨਾਂ ਵੀ ਜ਼ਬਤ ਕੀਤੀਆਂ ਗਈਆਂ ਹਨ। ਇਹ ਕਾਰਵਾਈ ਨਕਲੀ ਸਾਮਾਨ ਬਣਾਉਣ ਵਾਲੇ ਗਿਰੋਹ ਵਿਰੁੱਧ ਕੀਤੀ ਗਈ । ਮਾਮਲੇ ਵਿਚ ਦੋ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਵੀ ਕੀਤਾ ਗਿਆ ਹੈ।ਗ੍ਰਿਫ਼ਤਾਰ ਵਿਅਕਤੀ ਵੱਡੇ ਪੱਧਰ ਤੇ ਨਕਲੀ ਉਤਪਾਦਾਂ ਦੀ ਪੈਕਿੰਗ ਕਰ ਰਹੇ ਸਨ। ਉਨ੍ਹਾਂ ਨੂੰ ਨਾਮੀ ਬ੍ਰਾਂਡਾਂ ਦੇ ਨਾਮ ’ਤੇ ਬਾਜ਼ਾਰ ਵਿਚ ਵੇਚਣ ਦੀ ਤਿਆਰੀ ਸੀ । ਓਪਰੇਸ਼ਨ ਦੌਰਾਨ ਇੱਕ ਪ੍ਰਿੰਟਿੰਗ ਪ੍ਰੈੱਸ ਅਤੇ ਤਿੰਨ ਹੋਰ ਗੋਦਾਮਾਂ ਦਾ ਵੀ ਖੁਲਾਸਾ ਹੋਇਆ ਹੈ। ਇਨ੍ਹਾਂ ਥਾਵਾਂ ਤੇ ਮਸ਼ੀਨਾਂ ਦੀ ਮਦਦ ਨਾਲ ਨਕਲੀ ਉਤਪਾਦਾਂ ਦੀ ਪੈਕਿੰਗ ਕੀਤੀ ਜਾ ਰਹੀ ਸੀ ਅਤੇ ਉਨ੍ਹਾਂ ਦੀ ਬ੍ਰਾਂਡਿੰਗ ਵੀ ਕੀਤੀ ਜਾ ਰਹੀ ਸੀ।
