ਭਾਰਤੀ ਸੰਦਰਭ ’ਚ, ਮਾਂ ਬਣਨ ਨੂੰ ਇਕ ‘ਸਭਿਆਚਾਰਕ ਆਦਰਸ਼’ ਮੰਨਿਆ ਜਾਂਦਾ
ਨਵੀਂ ਦਿੱਲੀ : ਗੋਆ ਮੈਨੇਜਮੈਂਟ ਸੰਸਥਾਨ (ਜੀ.ਆਈ.ਐਮ.) ਦੀ ਇਕ ਤਾਜ਼ਾ ਖੋਜ ਅਨੁਸਾਰ, ਕੰਪਨੀਆਂ ਬਿਨਾਂ ਬੱਚਿਆਂ ਵਾਲੀਆਂ ਮਹਿਲਾਵਾਂ ਨੂੰ ਬਤੌਰ ‘ਆਦਰਸ਼ ਕਰਮਚਾਰੀ’ ਵੇਖਦੀਆਂ ਹਨ। ਖੋਜ ਮੁਤਾਬਕ ਅਜਿਹੀਆਂ ਮਹਿਲਾਵਾਂ ਨੂੰ ਕਰੀਅਰ ਪ੍ਰਤੀ ਵਧੇਰੇ ਗੰਭੀਰ ਅਤੇ ਪੜ੍ਹੀਆਂ-ਲਿਖੀਆਂ ਮੰਨਿਆ ਜਾਂਦਾ ਹੈ, ਜੋ ਕੰਮ ਦੇ ਬੋਝ ਨੂੰ ਬਿਹਤਰ ਤਰੀਕੇ ਨਾਲ ਸੰਭਾਲ ਸਕਦੀਆਂ ਹਨ।
ਜੀ.ਆਈ.ਐਮ. ਦੀ ਸਹਾਇਕ ਪ੍ਰੋਫੈਸਰ ਸ਼ੈਲੀ ਪਾਂਡੇ ਨੇ ਦਸਿਆ ਕਿ, ‘‘ਅਸੀਂ ਪਾਇਆ ਕਿ ਸੰਸਥਾਗਤ ਸਭਿਆਚਾਰ ਅਕਸਰ ਮਰਦਾਨਾ ਅਤੇ ਜ਼ਨਾਨਾ ਭੂਮਿਕਾਵਾਂ ਦੇ ਪੁਰਾਣੇ ਸੰਕਲਪਾਂ ’ਤੇ ਚੱਲਦਾ ਹੈ, ਜਿਸ ਕਾਰਨ ਮਾਂ ਨਾ ਬਣਨ ਦੀ ਚੋਣ ਕਰਨ ਵਾਲੀਆਂ ਮਹਿਲਾਵਾਂ ਨੂੰ ਵੱਖਰੀ ਨਜ਼ਰ ਨਾਲ ਵੇਖਿਆ ਜਾਂਦਾ ਹੈ।’’ ਖੋਜਾਰਥੀ ਗਿਆਨਦਾ ਗਿਰੀਸ਼ਾ ਨੇ ਕਿਹਾ, ‘‘ਬੱਚਾ ਨਾ ਹੋਣਾ ਇਕ ਨਿਜੀ ਫੈਸਲਾ ਹੈ ਅਤੇ ਇਹ ਕੰਮ ਵਾਲੀ ਥਾਂ ’ਤੇ ਕਿਸੇ ਦੀ ਯੋਗਤਾ ਦਾ ਪੈਮਾਨਾ ਨਹੀਂ ਹੋਣਾ ਚਾਹੀਦਾ।’’
ਇਹ ਅਧਿਐਨ ਦੱਸਦਾ ਹੈ ਕਿ ਭਾਰਤੀ ਸੰਦਰਭ ’ਚ, ਜਿੱਥੇ ਮਾਂ ਬਣਨ ਨੂੰ ਇਕ ‘ਸਭਿਆਚਾਰਕ ਆਦਰਸ਼’ ਮੰਨਿਆ ਜਾਂਦਾ ਹੈ, ਉਥੇ ਅਜਿਹੀਆਂ ਮਹਿਲਾਵਾਂ ਨੂੰ ਕਈ ਵਾਰ ਸੂਖਮ ਵਿਤਕਰੇ ਦਾ ਸਾਹਮਣਾ ਵੀ ਕਰਨਾ ਪੈਂਦਾ ਹੈ। (ਪੀ.ਟੀ.ਆਈ.)
