ਪਰਵਾਰ ਨੇ ਦੋਸ਼ ਲਗਾਇਆ ਸੀ ਕਿ ਪੁਲਿਸ ਮੌਕੇ ’ਤੇ ਮੌਜੂਦ ਹੋਣ ਦੇ ਬਾਵਜੂਦ ਚੁੱਪ ਰਹੀ ਅਤੇ ਮੁਲਜ਼ਮ ਲਗਭਗ 15 ਮਿੰਟਾਂ ਤਕ ਉਨ੍ਹਾਂ ਨੂੰ ਕੁੱਟਦੇ ਰਹੇ
ਨਵੀਂ ਦਿੱਲੀ : ਦਿੱਲੀ ਦੇ ਵਸੰਤ ਇਨਕਲੇਵ ਵਿਚ ਫੌਜ ਦੇ ਬ੍ਰਿਗੇਡੀਅਰ ਪਰਮਿੰਦਰ ਸਿੰਘ ਅਰੋੜਾ ਅਤੇ ਉਸ ਦੇ ਪੁੱਤਰ ਤੇਜਸ ਸਿੰਘ ਅਰੋੜਾ ਉਤੇ ਹਮਲੇ ਦੇ ਮਾਮਲੇ ਵਿਚ ਪੁਲਿਸ ਨੇ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਗ੍ਰਿਫ਼ਤਾਰ ਵਿਅਕਤੀਆਂ ’ਚ ਚੌਧਰੀ ਏਵੀਏਸ਼ਨ ਪ੍ਰਾਈਵੇਟ ਲਿਮਿਟਡ ਦੇ ਡਾਇਰੈਕਟਰ ਸਤਿੰਦਰ ਉਰਫ਼ ਸੋਨੂ (49) ਅਤੇ ਪੰਡਿਤ ਜੀ ਢਾਬੇ ਦੇ ਮਾਲਕ ਸੰਜੇ ਸ਼ਰਮਾ (56) ਸ਼ਾਮਲ ਹਨ। ਪੁਲਿਸ ਬਿਆਨ ਅਨੁਸਾਰ ਹੋਰ ਸ਼ਾਮਲ ਲੋਕਾਂ ਦੀ ਪਛਾਣ ਕੀਤੀ ਜਾ ਰਹੀ ਹੈ। ਘਟਨਾ ਨਾਲ ਸੰਬੰਧਿਤ ਮਰਸਿਡੀਜ਼ ਕਾਰ ਵੀ ਜ਼ਬਤ ਕੀਤੀ ਗਈ ਹੈ। ਇਹ ਘਟਨਾ 11 ਅਪ੍ਰੈਲ ਦੀ ਰਾਤ ਵਾਪਰੀ, ਜਦੋਂ ਬ੍ਰਿਗੇਡੀਅਰ ਅਤੇ ਉਸ ਦਾ ਪੁੱਤਰ ਰਾਤ ਦੇ ਖਾਣੇ ਤੋਂ ਬਾਅਦ ਸੈਰ ਕਰ ਰਹੇ ਸਨ। ਉਨ੍ਹਾਂ ਨੇ ਕਾਰ ਵਿਚ ਬੈਠੇ ਦੋ ਲੋਕਾਂ ਨੂੰ ਸ਼ਰਾਬ ਪੀਂਦੇ ਵੇਖ ਕੇ ਉਨ੍ਹਾਂ ਨੂੰ ਨਾਜਾਇਜ਼ ਕੰਮ ਕਰਨ ਤੋਂ ਰੋਕਿਆ। ਇਸ ਉਤੇ ਉਨ੍ਹਾਂ ਨੇ ਅਪਣੇ ਸਾਥੀਆਂ ਨੂੰ ਬੁਲਾ ਕੇ ਦੋਹਾਂ ’ਤੇ ਹਮਲਾ ਕਰ ਦਿਤਾ।
ਪਰਵਾਰ ਨੇ ਦੋਸ਼ ਲਗਾਇਆ ਸੀ ਕਿ ਪੁਲਿਸ ਮੌਕੇ ’ਤੇ ਮੌਜੂਦ ਹੋਣ ਦੇ ਬਾਵਜੂਦ ਚੁੱਪ ਰਹੀ ਅਤੇ ਮੁਲਜ਼ਮ ਲਗਭਗ 15 ਮਿੰਟਾਂ ਤਕ ਉਨ੍ਹਾਂ ਨੂੰ ਕੁੱਟਦੇ ਰਹੇ। ਬ੍ਰਿਗੇਡੀਅਰ ਦੀ ਪਤਨੀ ਨੇ ਕਿਹਾ ਸੀ, ‘‘ਮੈਂ ਬੇਨਤੀ ਕੀਤੀ ਪਰ ਅਧਿਕਾਰੀ ਨੇ ਕਿਹਾ ਕਿ ਉਹ ਅਪਣੀ ਟੀਮ ਆਉਣ ਤੋਂ ਪਹਿਲਾਂ ਕੁੱਝ ਨਹੀਂ ਕਰ ਸਕਦਾ।’’ ਤੇਜਸ ਦੇ ਮੂੰਹ, ਗਰਦਨ ਅਤੇ ਹਥੇਲੀ ’ਤੇ ਸੱਟਾਂ ਲੱਗੀਆਂ ਹਨ।
ਦਿੱਲੀ ਪੁਲਿਸ ਨੇ ਇਕ ਇੰਸਪੈਕਟਰ ਨੂੰ ਲਾਪਰਵਾਹੀ ਕਾਰਨ ਮੁਅੱਤਲ ਕੀਤਾ ਸੀ। ਪੁਲਿਸ ਬਿਆਨ ਅਨੁਸਾਰ, ‘‘ਮੁਲਜ਼ਮਾਂ ਦੀ ਪਛਾਣ ਕੀਤੀ ਜਾ ਰਹੀ ਹੈ ਅਤੇ ਕਾਰਵਾਈ ਤੁਰਤ ਕੀਤੀ ਜਾਵੇਗੀ।’’ ਭਾਰਤੀ ਫੌਜ ਨੇ ਵੀ ਇਸ ਘਟਨਾ ਦਾ ਗੰਭੀਰ ਨੋਟਿਸ ਲਿਆ ਹੈ ਅਤੇ ਫ਼ੌਜ ਨੂੰ ਪੁਲਿਸ ਟੀਮ ਦੀ ਮਦਦ ਲਈ ਤਾਇਨਾਤ ਕੀਤਾ ਹੈ।
