ਡੀ.ਐੱਸ.ਜੀ.ਐਮ.ਸੀ. ਦੇ ਮੁੱਖ ਸਲਾਹਕਾਰ ਪਰਮਜੀਤ ਸਿੰਘ ਚੰਡੋਕ ਨੇ ਕਿਹਾ, ‘‘ਇੱਥੇ ਸੱਭ ਦਾ ਸਵਾਗਤ ਹੈ।
ਨਵੀਂ ਦਿੱਲੀ : ਕੇਂਦਰੀ ਦਿੱਲੀ ਵਿਚ ‘ਚਲੋ ਸੰਸਦ’ ਮਾਰਚ ਦੌਰਾਨ ਪੁਲਿਸ ਵਲੋਂ ਕੀਤੇ ਗਏ ਲਾਠੀਚਾਰਜ ਅਤੇ ਹੰਝੂ ਗੈਸ ਦੇ ਗੋਲਿਆਂ ਤੋਂ ਬਚਣ ਲਈ ਸੈਂਕੜੇ ਪ੍ਰਦਰਸ਼ਨਕਾਰੀ ਨੌਜੁਆਨਾਂ ਨੇ ਗੁਰਦੁਆਰਾ ਬੰਗਲਾ ਸਾਹਿਬ ਵਿਖੇ ਸ਼ਰਨ ਲਈ ਸੀ। ਪ੍ਰਦਰਸ਼ਨਕਾਰੀ, ਜੋ ਕਿ ‘ਕਾਕਰੋਚ ਜਨਤਾ ਪਾਰਟੀ’ (ਸੀ.ਜੇ.ਪੀ.) ਦੀ ਅਗਵਾਈ ਹੇਠ ਐਨ.ਈ.ਈ.ਟੀ. ਅਤੇ ਜੇ.ਈ.ਈ. ਦੇ ਇਮਤਿਹਾਨਾਂ ਵਿਚ ਹੋਈਆਂ ਗੜਬੜੀਆਂ ਵਿਰੁਧ ਕੇਂਦਰੀ ਸਿੱਖਿਆ ਮੰਤਰੀ ਦੇ ਅਸਤੀਫ਼ੇ ਦੀ ਮੰਗ ਕਰ ਰਹੇ ਸਨ, ਪੁਲਿਸ ਕਾਰਵਾਈ ਤੋਂ ਬਾਅਦ ਗੁਰਦੁਆਰਾ ਸਾਹਿਬ ਵੱਲ ਵਧੇ।
ਜਦੋਂ ਸੜਕਾਂ ’ਤੇ ਹਫ਼ੜਾ-ਦਫ਼ੜੀ ਦਾ ਮਾਹੌਲ ਸੀ, ਤਾਂ ਗੁਰਦੁਆਰਾ ਸਾਹਿਬ ਦੇ ਸੇਵਾਦਾਰਾਂ ਨੇ ਸ਼ਰਨ ਲੱਭ ਰਹੇ ਨੌਜੁਆਨਾਂ ਲਈ ਦਰਵਾਜ਼ੇ ਖੋਲ੍ਹ ਦਿਤੇ। ਕਈ ਥੱਕੇ-ਟੁੱਟੇ ਪ੍ਰਦਰਸ਼ਨਕਾਰੀਆਂ ਨੇ ਗੁਰਦੁਆਰਾ ਸਾਹਿਬ ਦੇ ਸਾਂਝੇ ਹਾਲ ਵਿਚ ਆਰਾਮ ਕੀਤਾ ਅਤੇ ਲੰਗਰ ਛਕਿਆ। ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ (ਡੀ.ਐੱਸ.ਜੀ.ਐਮ.ਸੀ.) ਦੇ ਮੁੱਖ ਸਲਾਹਕਾਰ ਪਰਮਜੀਤ ਸਿੰਘ ਚੰਡੋਕ ਨੇ ਕਿਹਾ, ‘‘ਇੱਥੇ ਸੱਭ ਦਾ ਸਵਾਗਤ ਹੈ।
ਸਾਂਝਾ ਹਾਲ ਅਤੇ ਲੰਗਰ ਸੱਭ ਲਈ ਖੁੱਲ੍ਹੇ ਹਨ।’’ ਉਨ੍ਹਾਂ ਅੱਗੇ ਸਪੱਸ਼ਟ ਕੀਤਾ, ‘‘ਅਸੀਂ ਇੱਥੇ ਮਦਦ ਲਈ ਆਉਣ ਵਾਲੇ ਕਿਸੇ ਵੀ ਵਿਅਕਤੀ ਤੋਂ ਇਹ ਨਹੀਂ ਪੁੱਛਦੇ ਕਿ ਉਹ ਕਿੱਥੋਂ ਆਇਆ ਹੈ ਜਾਂ ਉਸ ਦੇ ਵਿਚਾਰ ਕੀ ਹਨ। ਜੇਕਰ ਕਿਸੇ ਨੂੰ ਭੋਜਨ ਜਾਂ ਬੈਠਣ ਦੀ ਜਗ੍ਹਾ ਚਾਹੀਦੀ ਹੈ, ਤਾਂ ਗੁਰਦੁਆਰਾ ਸਾਹਿਬ ਦੇ ਦਰਵਾਜ਼ੇ ਉਸ ਲਈ ਹਮੇਸ਼ਾ ਖੁੱਲ੍ਹੇ ਹਨ।’’
ਦੂਜੇ ਪਾਸੇ, ਬਾਹਰ ਸੜਕਾਂ ’ਤੇ ਭਾਰੀ ਪੁਲਿਸ ਬਲ ਤਾਇਨਾਤ ਸੀ ਅਤੇ ਬੈਰੀਕੇਡ ਲਗਾਏ ਗਏ ਸਨ, ਜਿਸ ਨਾਲ ਕਨਾਟ ਪਲੇਸ ਆਸ-ਪਾਸ ਟਰੈਫਿਕ ਜਾਮ ਦੀ ਸਥਿਤੀ ਬਣ ਗਈ। ਗੁਰਦੁਆਰਾ ਸਾਹਿਬ ਦੇ ਮਾਨਵਤਾਵਾਦੀ ਕਦਮ ਨੇ ਮੁਸ਼ਕਿਲ ਘੜੀ ਵਿਚ ਭਟਕ ਰਹੇ ਨੌਜੁਆਨਾਂ ਨੂੰ ਵੱਡੀ ਰਾਹਤ ਦਿਤੀ ।
