ਮਾਰਚ ਵਿਚ ਹਿੱਸਾ ਲੈ ਕੇ ਧੀ ਦੀ ਆਵਾਜ਼ ਬਣਨ ਦਾ ਲਿਆ ਪ੍ਰਣ
ਨਵੀਂ ਦਿੱਲੀ: 1999 ਦੀ ਕਾਰਗਿਲ ਜੰਗ ਦੇ ਅਨੁਭਵੀ ਰਾਜੇਸ਼ ਮੱਲ, ਜੋ ਉੱਤਰਾਖੰਡ ਦੇ ਦੇਹਰਾਦੂਨ ਦੇ ਰਹਿਣ ਵਾਲੇ ਹਨ, ਸੋਮਵਾਰ ਨੂੰ ਜੰਤਰ-ਮੰਤਰ ਤੋਂ ਸੰਸਦ ਵਲ ਕੱਢੇ ਗਏ ਵਿਰੋਧ ਮਾਰਚ ਦੌਰਾਨ ਅਪਣੀ 23 ਸਾਲ ਦੀ ਮਿ੍ਰਤਕ ਧੀ ਦੀ ਤਸਵੀਰ ਨੂੰ ਛਾਤੀ ਨਾਲ ਲਗਾ ਕੇ ਚੱਲਦੇ ਨਜ਼ਰ ਆਏ।
ਉਨ੍ਹਾਂ ਦੀ ਧੀ, ਰੀਆ ਕੁਮਾਰੀ ਥਾਪਾ, ਜੋ ਨੀਟ ਇਮਤਿਹਾਨ ਦੀ ਤਿਆਰੀ ਕਰ ਰਹੀ ਸੀ, ਨੇ ਬੀਤੇ ਜੂਨ ਮਹੀਨੇ ਅਪਣੇ ਘਰ ਵਿਚ ਕਥਿਤ ਤੌਰ ’ਤੇ ਆਤਮਹੱਤਿਆ ਕਰ ਲਈ ਸੀ। ਉਸ ਦੇ ਕਮਰੇ ’ਚੋਂ ਇਕ ਨੋਟ ਮਿਲਿਆ ਸੀ ਜਿਸ ਵਿਚ ਲਿਖਿਆ ਸੀ, ‘‘ਮੰਮੀ-ਡੈਡੀ, ਮੈਂ ਤੁਹਾਨੂੰ ਪਿਆਰ ਕਰਦੀ ਹਾਂ।
ਕਿਸੇ ਦੀ ਗ਼ਲਤੀ ਨਹੀਂ ਹੈ।’’ ਧੀ ਦੀ ਮੌਤ ਤੋਂ ਬਾਅਦ, ਰਾਜੇਸ਼ ਮੱਲ ਨੇ ਉਸ ਦੀ ਤਸਵੀਰ ਨੂੰ ਅਪਣੇ ਨਾਲ ਰੱਖਣਾ ਸ਼ੁਰੂ ਕਰ ਦਿਤਾ ਹੈ ਤਾਂ ਜੋ ਸਰਕਾਰ ਤੋਂ ਜਵਾਬਦੇਹੀ ਮੰਗੀ ਜਾ ਸਕੇ। ਮਾਰਚ ਦੌਰਾਨ ਗੱਲਬਾਤ ਕਰਦਿਆਂ ਰਾਜੇਸ਼ ਮੱਲ ਨੇ ਕਿਹਾ, ‘‘ਮੈਂ ਅਪਣੀ ਧੀ ਦੀ ਤਸਵੀਰ ਨੂੰ ਉੱਥੇ ਲੈ ਕੇ ਜਾਵਾਂਗਾ ਜਿੱਥੇ ਵੀ ਸਰਕਾਰ ਦੀ ਜਵਾਬਦੇਹੀ ਮੰਗਣ ਲਈ ਅਜਿਹੇ ਪ੍ਰਦਰਸ਼ਨ ਹੋਣਗੇ। ਚਾਹੇ ਉਹ ਸੁਣਨ ਜਾਂ ਨਾ, ਮੈਂ ਅਪਣੀ ਧੀ ਦੀ ਆਵਾਜ਼ ਬਣਾਂਗਾ।’’ਉਨ੍ਹਾਂ ਸਰਕਾਰੀ ਰਵੱਈਏ ’ਤੇ ਦੁੱਖ ਪ੍ਰਗਟ ਕਰਦਿਆਂ ਕਿਹਾ, ‘‘ਸੱਭ ਤੋਂ ਵੱਡੀ ਤ੍ਰਾਸਦੀ ਇਹ ਹੈ ਕਿ ਸਰਕਾਰ ਨੇ ਹੁਣ ਤਕ ਅਫ਼ਸੋਸ ਵੀ ਪ੍ਰਗਟ ਨਹੀਂ ਕੀਤਾ।’’
