ਵੀਆਈਪੀ ਡਿਊਟੀਆਂ ਅਤੇ ਮੁਲਾਜ਼ਮਾਂ ਦੀ ਘਾਟ ਬਣੀ ਮੁੱਖ ਵਜ੍ਹਾ
ਜਗਰਾਉਂ (ਪਰਮਜੀਤ ਸਿੰਘ ਗਰੇਵਾਲ) : ਪੰਜਾਬ ਵਿਚ ਥਾਣਿਆਂ ਅਤੇ ਚੌਕੀਆਂ ਵਿਚ ਮੁਲਾਜ਼ਮਾਂ ਦੀ ਘਾਟ ਕਾਰਨ ਪੁਲਿਸ ਵਿਭਾਗ ਅਤੇ ਆਮ ਜਨਤਾ ਦੋਹਾਂ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪੁਲਿਸ ਦੇ ਅਧਿਕਾਰੀ ਅਤੇ ਕਰਮਚਾਰੀ ਲਗਾਤਾਰ ਵਧਦੇ ਕੰਮ ਦੇ ਬੋਝ ਅਤੇ ਉਚ ਅਧਿਕਾਰੀਆਂ ਦੇ ਦਬਾਅ ਕਾਰਨ ਤਣਾਅ ਵਿਚ ਜੀ ਰਹੇ ਹਨ, ਜਿਸ ਦੇ ਨਤੀਜੇ ਵਜੋਂ ਸੈਂਕੜੇ ਮੁਲਾਜ਼ਮ ਸਮੇਂ ਤੋਂ ਪਹਿਲਾਂ ਹੀ ਸੇਵਾ ਮੁਕਤੀ ਲੈਣ ਨੂੰ ਤਰਜੀਹ ਦੇ ਰਹੇ ਹਨ।
ਜਾਣਕਾਰੀ ਅਨੁਸਾਰ, ਪੰਜਾਬ ਪੁਲਿਸ ਦੇ ਕਈ ਅਧਿਕਾਰੀ ਅਤੇ ਕਰਮਚਾਰੀ ਦਿਨ-ਰਾਤ ਡਿਊਟੀ ਕਰਨ ਲਈ ਮਜਬੂਰ ਹਨ। ਵੀਆਈਪੀ ਡਿਊਟੀਆਂ ਕਾਰਨ ਕਈ ਵਾਰ ਉਨ੍ਹਾਂ ਨੂੰ 24-24 ਘੰਟੇ ਤਕ ਲਗਾਤਾਰ ਕੰਮ ਕਰਨਾ ਪੈਂਦਾ ਹੈ। ਬਿਮਾਰੀ ਜਾਂ ਕਿਸੇ ਜ਼ਰੂਰੀ ਨਿਜੀ ਕੰਮ ਲਈ ਵੀ ਛੁੱਟੀ ਮਿਲਣੀ ਮੁਸ਼ਕਲ ਬਣ ਜਾਂਦੀ ਹੈ, ਜਿਸ ਨਾਲ ਉਨ੍ਹਾਂ ਦੀ ਸਿਹਤ ’ਤੇ ਗੰਭੀਰ ਅਸਰ ਪੈ ਰਿਹਾ ਹੈ।
ਥਾਣਿਆਂ ਅਤੇ ਚੌਕੀਆਂ ਵਿਚ ਸਟਾਫ਼ ਦੀ ਘਾਟ ਹੋਣ ਕਰ ਕੇ ਮੌਜੂਦਾ ਮੁਲਾਜ਼ਮਾਂ ’ਤੇ ਕੰਮ ਦਾ ਵਧੇਰੇ ਬੋਝ ਪੈ ਰਿਹਾ ਹੈ। ਇਸ ਦਬਾਅ ਹੇਠ ਕਈ ਵਾਰ ਉਨ੍ਹਾਂ ਨੂੰ ਉੱਚ ਅਧਿਕਾਰੀਆਂ ਦੇ ਰੋਹ ਦਾ ਵੀ ਸਾਹਮਣਾ ਕਰਨਾ ਪੈਂਦਾ ਹੈ। ਹਾਲਾਤ ਇਥੋਂ ਤਕ ਪਹੁੰਚ ਗਏ ਹਨ ਕਿ ਕੁੱਝ ਮੁਲਾਜ਼ਮ ਤਣਾਅ ਨੂੰ ਸਹਿ ਨਾ ਸਕਣ ਕਾਰਨ ਖ਼ੁਦਕੁਸ਼ੀ ਵਰਗੇ ਕਦਮ ਵੀ ਚੁੱਕੇ ਹਨ। ਇਸ ਤੋਂ ਇਲਾਵਾ ਕਈ ਥਾਣੇਦਾਰਾਂ ਨੂੰ ਰੋਜ਼ਾਨਾ ਅਦਾਲਤੀ ਪੇਸ਼ੀਆਂ ’ਤੇ ਵੀ ਜਾਣਾ ਪੈਂਦਾ ਹੈ।
ਥਾਣਿਆਂ ਵਿਚ ਮੁਲਾਜ਼ਮਾਂ ਦੀ ਘਾਟ ਕਦੋਂ ਪੂਰੀ ਕਰੇਗੀ ਸਰਕਾਰ?
ਪੰਜਾਬ ਦੇ ਥਾਣਿਆਂ ਵਿਚ ਮੁਲਾਜ਼ਮਾਂ ਦੀ ਭਾਰੀ ਘਾਟ ਇਕ ਗੰਭੀਰ ਸਮੱਸਿਆ ਬਣੀ ਹੋਈ ਹੈ। ਜਿਥੇ ਹੋਰ ਰਾਜਾਂ ਜਿਵੇਂ ਯੂਪੀ ਵਿਚ ਇਕ ਥਾਣੇ ਵਿਚ 200 ਤੋਂ 500 ਤਕ ਮੁਲਾਜ਼ਮ ਹੁੰਦੇ ਹਨ, ਉਥੇ ਪੰਜਾਬ ਵਿਚ ਇਹ ਗਿਣਤੀ ਕੇਵਲ 15 ਤੋਂ 20 ਤਕ ਹੀ ਸੀਮਿਤ ਹੈ, ਜਦਕਿ ਇਕ ਥਾਣੇ ਲਈ ਘੱਟੋ-ਘੱਟ 70 ਤੋਂ 80 ਮੁਲਾਜ਼ਮਾਂ ਦੀ ਲੋੜ ਹੁੰਦੀ ਹੈ।
ਇਸ ਦੇ ਨਾਲ ਹੀ ਪੁਲਿਸ ਦਾ ਵੱਡਾ ਹਿੱਸਾ ਵੀਆਈਪੀ ਡਿਊਟੀਆਂ ਵਿਚ ਲੱਗਾ ਹੋਇਆ ਹੈ। ਮਾਹਰਾਂ ਅਨੁਸਾਰ ਸਰਕਾਰ ਨੂੰ ਤੁਰੰਤ ਨਵੀਆਂ ਭਰਤੀਆਂ ਕਰ ਕੇ ਇਸ ਘਾਟ ਨੂੰ ਪੂਰਾ ਕਰਨਾ ਚਾਹੀਦਾ ਹੈ।
