ਮਿਆਦੀ ਕਿਰਤ ਬਲ ਸਰਵੇ (ਪੀ.ਐਲ.ਐਫ਼.ਐੱਸ.) 2025 ਨੇ ਪੰਜਾਬ ਅਤੇ ਹਰਿਆਣਾ ਵਿਚ ਬੇਰੁਜ਼ਗਾਰੀ ਦੀ ਚਿੰਤਾਜਨਕ ਤਸਵੀਰ ਪੇਸ਼ ਕੀਤੀ ਹੈ।
ਨਵੀਂ ਦਿੱਲੀ: ਮਿਆਦੀ ਕਿਰਤ ਬਲ ਸਰਵੇ (ਪੀ.ਐਲ.ਐਫ਼.ਐੱਸ.) 2025 ਨੇ ਪੰਜਾਬ ਅਤੇ ਹਰਿਆਣਾ ਵਿਚ ਬੇਰੁਜ਼ਗਾਰੀ ਦੀ ਚਿੰਤਾਜਨਕ ਤਸਵੀਰ ਪੇਸ਼ ਕੀਤੀ ਹੈ। ਕੌਮੀ ਪੱਧਰ ’ਤੇ ਬੇਰੁਜ਼ਗਾਰੀ ਦਰ 5.3% ਹੈ, ਪਰ ਪੰਜਾਬ ਵਿਚ ਇਹ 6.7% ਦਰਜ ਕੀਤੀ ਗਈ ਹੈ।
ਖ਼ਾਸ ਕਰ ਕੇ ਸੂਬੇ ਦੇ ਪਿੰਡਾਂ ਵਿਚ ਇਹ ਦਰ 7.4% ਤਕ ਪਹੁੰਚ ਗਈ ਹੈ। ਰੀਪੋਰਟ ਵਿਖਾਉਂਦੀ ਹੈ ਕਿ ਉੱਚ ਸਿੱਖਿਆ ਵੀ ਰੁਜ਼ਗਾਰ ਦੀ ਗਾਰੰਟੀ ਨਹੀਂ। ਗਰੈਜੂਏਟਾਂ ਦੀ ਬੇਰੁਜ਼ਗਾਰੀ ਪੰਜਾਬ ਵਿਚ 20.6% ਤਕ ਪਹੁੰਚ ਗਈ ਹੈ। ਪੋਸਟਗ੍ਰੈਜੂਏਟਾਂ ਵਿਚ ਵੀ ਪੰਜਾਬ ਵਿਚ ਬੇਰੁਜ਼ਗਾਰੀ 11.6% ਹੈ। ਇਸ ਹਾਲਾਤ ’ਤੇ ਮਾਹਰ ਚੇਤਾਵਨੀ ਦੇ ਰਹੇ ਹਨ। ਇਕ ਅਰਥਸ਼ਾਸਤਰੀ ਨੇ ਕਿਹਾ, ‘‘ਸਿਖਿਆ ਦਾ ਤੇਜ਼ੀ ਨਾਲ ਵਾਧਾ ਹੋਇਆ ਹੈ।
ਪਰ ਉਦਯੋਗਿਕ ਵਿਕਾਸ ਉਸੇ ਗਤੀ ਨਾਲ ਨਹੀਂ ਹੋਇਆ। ਇਸ ਕਰ ਕੇ ਡਿਗਰੀਧਾਰੀਆਂ ਨੂੰ ਢੁਕਵੀਆਂ ਨੌਕਰੀਆਂ ਨਹੀਂ ਮਿਲ ਰਹੀਆਂ।’’ ਪੰਜਾਬ ਵਿਚ ਉਦਯੋਗਿਕ ਵੰਨ-ਸੁਵੰਨਤਾ ਦੀ ਕਮੀ ਕਾਰਨ ਸਿੱਖਿਆਯੁਕਤ ਨੌਜੁਆਨਾਂ ਲਈ ਮੌਕੇ ਹੋਰ ਵੀ ਘੱਟ ਹਨ। ਰੀਪੋਰਟ ਇਹ ਵੀ ਦਰਸਾਉਂਦੀ ਹੈ ਕਿ ਬਹੁਤ ਸਾਰੇ ਨੌਜੁਆਨ ਅਪਣੇ ਆਪ-ਰੁਜ਼ਗਾਰ ਜਾਂ ਅਸੰਗਠਤ ਖੇਤਰ ਵਿਚ ਹਨ, ਜੋ ਉਨ੍ਹਾਂ ਦੀਆਂ ਉਮੀਦਾਂ ਨਾਲ ਮੇਲ ਨਹੀਂ ਖਾਂਦਾ। (ਏਜੰਸੀ)
