ਫਾਰਮੇਸੀ ਅਫ਼ਸਰ ਦੀ ਪੋਸਟ ਲਈ 18 ਜੁਲਾਈ ਨੂੰ ਲਿਆ ਸੀ ਲਿਖਤੀ ਇਮਤਿਹਾਨ, ਬਾਬਾ ਫ਼ਰੀਦ ਯੂਨੀਵਰਸਿਟੀ ਵੱਲੋਂ ਪੁਲਿਸ ਨੂੰ ਦਿੱਤੀ 28 ਲੋਕਾਂ ਦੀ ਸੂਚੀ
ਫਰੀਦਕੋਟ: 18 ਜੁਲਾਈ ਨੂੰ ਪੰਜਾਬ ਸਰਕਾਰ ਦੇ ਸਿਹਤ ਵਿਭਾਗ ਲਈ ਫ਼ਰਮੇਸੀ ਅਫਸਰਾਂ ਦੀਆਂ ਨਿਯੁਕਤੀਆਂ ਲਈ ਰੱਖੇ ਗਏ ਲਿਖਤੀ ਪੇਪਰ, ਜੋ ਬਾਬਾ ਫ਼ਰੀਦ ਯੂਨੀਵਰਸਿਟੀ ਵੱਲੋਂ ਕੰਡਕਟ ਕਰਵਾਇਆ ਜਾ ਰਿਹਾ ਸੀ ਤਾਂ ਉਸ ਇਮਤਿਹਾਨ ਦੌਰਾਨ ਬਲੂਟੁਥ ਡਿਵਾਈਸ ਰਾਹੀਂ ਪੇਪਰ ਕਰਨ ਨੂੰ ਲੈ ਕੇ ਫਰੀਦਕੋਟ ਦੇ ਅਤੇ ਫਿਰੋਜ਼ਪੁਰ ਦੇ ਵੱਖ ਵੱਖ ਕੇਂਦਰਾਂ ਤੋਂ 28 ਉਮੀਦਵਾਰਾਂ ਨੂੰ ਕਾਬੂ ਕੀਤਾ, ਜੋ ਬਲੂਟੁਥ ਡਿਵਾਈਸ ਰਾਹੀਂ ਬਾਹਰ ਬੈਠੇ ਵਿਅਕਤੀਆਂ ਦੀ ਮਦਦ ਲੈ ਕੇ ਪੇਪਰ ਕਰ ਰਹੇ ਸਨ। ਫਿਲਹਾਲ ਯੂਨੀਵਰਸਿਟੀ ਵੱਲੋਂ 28 ਉਮੀਦਵਾਰਾਂ ਨੂੰ ਪੁਲਿਸ ਹਵਾਲੇ ਕਰ ਉਨ੍ਹਾਂ ਖਿਲਾਫ ਨਿਯਮਾਂ ਅਨੁਸਾਰ ਕਾਰਵਾਈ ਕਰਨ ਦੀ ਸਿਫਾਰਿਸ਼ ਕੀਤੀ ਗਈ ਹੈ।
ਇਸ ਮੌਕੇ ਬਾਬਾ ਫ਼ਰੀਦ ਯੂਨੀਵਰਸਿਟੀ ਦੇ ਰਜਿਸਟਰਾਰ ਅਰਵਿੰਦ ਕੁਮਾਰ ਨੇ ਦੱਸਿਆ ਕਿ ਇਸ ਲਿਖਤੀ ਪੇਪਰ ਦੌਰਾਨ ਪਹਿਲਾ ਤੋਂ ਹੀ ਸ਼ੱਕ ਸੀ ਕਿ ਇਸ ਦੌਰਾਨ ਕੁੱਝ ਗਲਤ ਮੰਸ਼ਾ ਨਾਲ ਉਮੀਦਵਾਰ ਆ ਸਕਦੇ ਹਨ, ਜਿਸ ਲਈ ਪੂਰੀ ਨਿਗਰਾਨੀ ਰੱਖੀ ਗਈ ਸੀ ਅਤੇ ਇਸੇ ਚੌਕਸੀ ਦੇ ਚੱਲਦੇ ਹੀ ਫਰੀਦਕੋਟ ਦੇ ਵੱਖ ਵੱਖ ਸੈਂਟਰਾਂ ’ਚੋਂ 24 ਅਤੇ ਫਿਰੋਜ਼ਪੁਰ ਤੋਂ 4 ਉਮੀਦਵਾਰਾਂ ਨੂੰ ਬਲੂਟੁਥ ਜ਼ਰੀਏ ਨਕਲ ਕਰਨ ਦੇ ਇਲਜ਼ਾਮਾਂ ’ਚ ਕਾਬੂ ਕੀਤਾ ਗਿਆ ਜਿਨ੍ਹਾਂ ਦੀ ਸੂਚੀ ਪੁਲਿਸ ਨੂੰ ਦੇ ਦਿੱਤੀ ਗਈ ਹੈ ਅਤੇ ਪੰਜਾਬ ਸਰਕਾਰ ਦੇ ਨਿਯਮਾਂ ਅਨੁਸਾਰ ਬਣਦੀ ਕਾਰਵਾਈ ਦੀ ਸਿਫਾਰਿਸ਼ ਕੀਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਪੇਪਰ ਲੀਕ ਦਾ ਕੋਈ ਮਾਮਲਾ ਨਹੀਂ, ਬਲਕਿ ਨਕਲ ਦਾ ਮਾਮਲਾ ਹੈ, ਜਿਸ ਅਨੁਸਾਰ ਹੁਣ ਕਾਰਵਾਈ ਅਮਲ ’ਚ ਲਿਆਂਦੀ ਜਾਵੇਗੀ।
