ਤਿਕੋਣੀ ਲੜੀ ਦੇ ਫਾਈਨਲ 'ਚ 29 ਗੇਂਦਾਂ ਵਿੱਚ ਬਣਾਈਆਂ 94 ਦੌੜਾਂ
ਦਾਂਬੁਲਾ (ਸ੍ਰੀਲੰਕਾ) : ਭਾਰਤ ਦੇ ਨੌਜਵਾਨ ਕ੍ਰਿਕਟਰ ਵੈਭਵ ਸੂਰਿਆਵੰਸ਼ੀ ਨੇ 50 ਓਵਰਾਂ ਦੇ ਕ੍ਰਿਕਟ ਵਿੱਚ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਬਣਾਉਣ ਦਾ 20 ਸਾਲ ਪੁਰਾਣਾ ਵਿਸ਼ਵ ਰਿਕਾਰਡ ਤੋੜ ਦਿੱਤਾ ਹੈ । ਸ੍ਰੀਲੰਕਾ ਏ ਵਿਰੁੱਧ ਚੱਲ ਰਹੇ ਤਿਕੋਣੀ ਲੜੀ ਦੇ ਫਾਈਨਲ ਵਿੱਚ ਵੈਭਵ ਨੇ 29 ਗੇਂਦਾਂ ਵਿੱਚ 94 ਦੌੜਾਂ ਬਣਾਈਆਂ ਜਦਿਕ ਉਸਨੇ ਸਿਰਫ਼ 11 ਗੇਂਦਾਂ ਵਿੱਚ ਅਰਧ ਸੈਂਕੜਾ ਪੂਰਾ ਕੀਤਾ।
ਵੈਭਵ ਤੋਂ ਪਹਿਲਾਂ ਇਸ ਫਾਰਮੈਟ ਵਿੱਚ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਸ੍ਰੀਲੰਕਾ ਦੇ ਕੌਸ਼ਲਿਆ ਵੀਰਰਤਨੇ ਨੇ ਬਣਾਇਆ ਸੀ। ਉਸ ਨੇ 2006 ਵਿੱਚ ਰਾਗਾਮਾ ਕ੍ਰਿਕਟ ਕਲੱਬ ਲਈ ਖੇਡਦੇ ਹੋਏ 12 ਗੇਂਦਾਂ ਵਿੱਚ ਅਰਧ ਸੈਂਕੜਾ ਪੂਰਾ ਕੀਤਾ। ਸੀਨੀਅਰ ਪੱਧਰ 'ਤੇ 50 ਓਵਰਾਂ ਦੀ ਕ੍ਰਿਕਟ ਵਿੱਚ ਦੋ ਤਰ੍ਹਾਂ ਦੇ ਮੈਚ ਹੁੰਦੇ ਹਨ ਲਿਸਟ ਏ ਅਤੇ ਵਨ ਡੇਅ ਇੰਟਰਨੈਸ਼ਨਲ । ਹਰੇਕ ਵਨ ਡੇਅ ਇੰਟਰਨੈਸ਼ਨਲ ਵੀ ਆਪਣੇ ਆਪ ਵਿੱਚ ਲਿਸਟ ਏ ਮੈਚ ਹੁੰਦਾ ਹੈ। ਇੱਕ ਰੋਜ਼ਾ ਇੰਟਰਨੈਸ਼ਨਲ ਵਿੱਚ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਏਬੀ ਡੀਵਿਲੀਅਰਜ਼ ਨੇ ਬਣਾਇਆ ਸੀ। ਉਸਨੇ 2015 ਵਿੱਚ ਵੈਸਟਇੰਡੀਜ਼ ਵਿਰੁੱਧ 15 ਗੇਂਦਾਂ ਵਿੱਚ 50 ਦੌੜਾਂ ਬਣਾਈਆਂ ਸਨ।
