PM ਨਰਿੰਦਰ ਮੋਦੀ ਅਤੇ PM ਐਂਥਨੀ ਅਲਬਾਨੀਜ਼ ਨੇ ਸਮਝੌਤਿਆਂ ਸਬੰਧੀ ਕੀਤਾ ਐਲਾਨ
ਮੈਲਬਰਨ : ਭਾਰਤ ਅਤੇ ਆਸਟ੍ਰੇਲੀਆ ਵਿਚਾਲੇ ਯੂਰੇਨੀਅਮ ਡੀਲ 'ਤੇ ਮੋਹਰ ਲੱਗ ਗਈ ਹੈ । ਮੈਲਬਰਨ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਆਸਟ੍ਰੇਲੀਆਈ ਪ੍ਰਧਾਨ ਮੰਤਰੀ ਐਂਥਨੀ ਅਲਬਾਨੀਜ਼ ਨੇ ਮੀਟਿੰਗ ਤੋਂ ਬਾਅਦ ਸਾਂਝੀ ਪ੍ਰੈਸ ਕਾਨਫਰੰਸ ਵਿੱਚ ਰੱਖਿਆ, ਵਪਾਰ, ਊਰਜਾ, ਸਪੇਸ ਅਤੇ ਮਹੱਤਵਪੂਰਨ ਖਣਿਜਾਂ ਸਮੇਤ ਕਈ ਖੇਤਰਾਂ ਵਿੱਚ ਸਮਝੌਤਿਆਂ ਦਾ ਐਲਾਨ ਕੀਤਾ।
ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਆਸਟ੍ਰੇਲੀਆ ਤੋਂ ਭਾਰਤ ਨੂੰ ਯੂਰੇਨੀਅਮ ਮਿਲਣ ਨਾਲ ਭਾਰਤ ਦੇ ਸਾਫ਼ ਊਰਜਾ ਮਿਸ਼ਨ ਨੂੰ ਮਜ਼ਬੂਤੀ ਮਿਲੇਗੀ । ਉਨ੍ਹਾਂ ਨੇ ਦੱਸਿਆ ਕਿ ਭਾਰਤ ਅਤੇ ਆਸਟ੍ਰੇਲੀਆ ਮਿਲ ਕੇ 'ਕ੍ਰਿਟੀਕਲ ਮਿਨਰਲਜ਼ ਕਾਰੀਡੋਰ' ਵੀ ਵਿਕਸਿਤ ਕਰਨਗੇ । ਕੋਕੋਸ (ਕੀਲਿੰਗ) ਟਾਪੂ 'ਤੇ ਸਪੇਸ ਟ੍ਰੈਕਿੰਗ ਟਰਮੀਨਲ ਬਣਾਇਆ ਜਾਵੇਗਾ, ਜਿਸ ਨਾਲ ਭਾਰਤ ਦੇ ਗਗਨਯਾਨ ਮਿਸ਼ਨ ਨੂੰ ਮਦਦ ਮਿਲੇਗੀ।
ਦੋਵਾਂ ਦੇਸ਼ਾਂ ਨੇ 'ਆਸਟ੍ਰੇਲੀਆ-ਭਾਰਤ ਸਾਈਬਰ, ਕ੍ਰਿਟੀਕਲ ਟੈਕਨਾਲੋਜੀ ਅਤੇ ਸਪਲਾਈ ਚੇਨ' ਪਾਰਟਨਰਸ਼ਿਪ ਸ਼ੁਰੂ ਕਰਨ 'ਤੇ ਸਹਿਮਤੀ ਜਤਾਈ ਹੈ । ਇਸ ਦੇ ਤਹਿਤ ਦੋਵੇਂ ਦੇਸ਼ ਆਰਟੀਫੀਸ਼ੀਅਲ ਇੰਟੈਲੀਜੈਂਸ, ਕੁਆਂਟਮ ਕੰਪਿਊਟਿੰਗ, ਸੈਮੀਕੰਡਕਟਰ, ਸਾਈਬਰ ਸਿਕਿਊਰਿਟੀ ਅਤੇ ਡਿਜੀਟਲ ਰੇਜ਼ੀਲੀਐਂਸ ਵਰਗੇ ਖੇਤਰਾਂ ਵਿੱਚ ਇੱਕਠੇ ਖੋਜ (ਰਿਸਰਚ) ਕਰਨਗੇ।
