ਸਟਾਰਮਰ ਦੇ ਸਮਰਥਕ ਬਾਹਰ
ਲੰਡਨ : ਬਰਤਾਨੀਆਂ ਦੇ ਨਵੇਂ ਪ੍ਰਧਾਨ ਮੰਤਰੀ ਐਂਡੀ ਬਰਨਹੈਮ ਨੇ ‘10 ਡਾਊਨਿੰਗ ਸਟ੍ਰੀਟ’ ਵਿਖੇ ਅਹੁਦਾ ਸੰਭਾਲਦਿਆਂ ਹੀ ਅਪਣੀ ਨਵੀਂ ਕੈਬਨਿਟ ਦਾ ਐਲਾਨ ਕਰ ਦਿਤਾ ਹੈ। ਇਸ ਨਵੀਂ ਫੇਰਬਦਲ ਵਿਚ ਉਨ੍ਹਾਂ ਨੇ ਭਾਰਤੀ ਮੂਲ ਦੇ ਬਨਾਉਟੀ ਬੁੱਧੀ (ਏ.ਆਈ.) ਮੰਤਰੀ ਕਨਿਸ਼ਕ ਨਾਰਾਇਣ ਨੂੰ ਪ੍ਰਮੁੱਖਤਾ ਦਿੰਦਿਆਂ ਕੈਬਨਿਟ ਰੈਂਕ ਵਿਚ ਤਰੱਕੀ ਦਿਤੀ ਹੈ, ਜਦਕਿ ਸਾਬਕਾ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਦੇ ਕਈ ਕਰੀਬੀ ਆਗੂਆਂ ਨੂੰ ਸਰਕਾਰ ਤੋਂ ਬਾਹਰ ਦਾ ਰਸਤਾ ਵਿਖਾ ਦਿਤਾ ਹੈ। ਕਨਿਸ਼ਕ ਨਾਰਾਇਣ, ਜੋ ਪਹਿਲਾਂ ਸਟਾਰਮਰ ਦੀ ਸਰਕਾਰ ਵਿਚ ਜੂਨੀਅਰ ਮੰਤਰੀ ਸਨ, ਹੁਣ ਕੈਬਨਿਟ ਦਫ਼ਤਰ ਅਤੇ ਬਿਜ਼ਨਸ, ਇਨੋਵੇਸ਼ਨ, ਸਾਇੰਸ ਐਂਡ ਟਰੇਡ ਵਿਭਾਗ ਦੇ ਤਹਿਤ ਏ.ਆਈ. ਮੰਤਰੀ ਵਜੋਂ ਜ਼ਿੰਮੇਵਾਰੀ ਸੰਭਾਲਣਗੇ।
ਬਿਹਾਰ ਦੇ ਮੁਜ਼ੱਫਰਪੁਰ ਨਾਲ ਸਬੰਧਤ 36 ਸਾਲ ਦੇ ਨਾਰਾਇਣ ਨੇ ਅਪਣੀ ਇਸ ਨਵੀਂ ਭੂਮਿਕਾ ਉਤੇ ਖੁਸ਼ੀ ਪ੍ਰਗਟਾਉਂਦਿਆਂ ਕਿਹਾ, ‘‘ਏ.ਆਈ. ਸੰਭਵ ਤੌਰ ਉਤੇ ਮਨੁੱਖੀ ਇਤਿਹਾਸ ਦੀ ਸੱਭ ਤੋਂ ਮਹੱਤਵਪੂਰਨ ਤਕਨਾਲੋਜੀ ਹੈ। ਇਸ ਦਾ ਪ੍ਰਭਾਵ ਹੋਰ ਖੇਤਰਾਂ ਨਾਲੋਂ ਕਿਤੇ ਵੱਡਾ ਹੋਵੇਗਾ।’’ ਉਨ੍ਹਾਂ ਅੱਗੇ ਚੁਨੌਤੀਆਂ ਉਤੇ ਕਿਹਾ,‘‘ਨੌਕਰੀਆਂ ਤੇ ਬਦਲਾਅ ਦੀ ਰਫ਼ਤਾਰ ਨੂੰ ਲੈ ਕੇ ਬਿ੍ਰਟਿਸ਼ ਜਨਤਾ ਦੀਆਂ ਚਿੰਤਾਵਾਂ ਬਿਲਕੁਲ ਜਾਇਜ਼ ਹਨ। ਦੇਸ਼ਾਂ ਕੋਲ ਇਹ ਤੈਅ ਕਰਨ ਲਈ ਬਹੁਤ ਛੋਟਾ ਸਮਾਂ ਹੈ ਕਿ ਉਹ ਏ.ਆਈ. ਨੂੰ ਆਕਾਰ ਦਿੰਦੇ ਹਨ ਜਾਂ ਇਸ ਵਲੋਂ ਆਕਾਰ ਲੈਂਦੇ ਹਨ। ਬਰਤਾਨੀਆਂ ਇਸ ਵੇਲੇ ਉਸੇ ਮੋੜ ਉਤੇ ਖੜਾ ਹੈ।?’’ ਭਾਰਤ-ਯੂ.ਕੇ. ਸਬੰਧਾਂ ਉਤੇ ਬੋਲਦਿਆਂ ਨਾਰਾਇਣ ਨੇ ਭਰੋਸਾ ਦਿਤਾ, ‘‘ਮੈਂ ਪੂਰੀ ਤਰ੍ਹਾਂ ਨਿਸ਼ਚਿਤ ਹਾਂ ਕਿ ਭਾਰਤ ਨਾਲ ਸਾਡੇ ਸਬੰਧਾਂ ਦੀ ਜੋ ਗੰਭੀਰਤਾ ਅਤੇ ਸਥਿਰਤਾ ਹੈ, ਉਹ ਆਉਣ ਵਾਲੇ ਮਹੀਨਿਆਂ ਅਤੇ ਸਾਲਾਂ ਵਿਚ ਵੀ ਬਰਕਰਾਰ ਰਹੇਗੀ।?’’
ਇਸ ਕੈਬਨਿਟ ਵਿਚ ਇਕ ਹੋਰ ਭਾਰਤੀ ਮੂਲ ਦੀ ਆਗੂ ਲੀਜ਼ਾ ਨੰਦੀ ਨੂੰ ‘ਡਿਜੀਟਲ, ਸਭਿਆਚਾਰ , ਮੀਡੀਆ ਅਤੇ ਖੇਡਾਂ’ ਦੇ ਮੰਤਰਾਲੇ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਗ੍ਰਹਿ ਮੰਤਰੀ ਦਾ ਅਹੁਦਾ ਸੰਭਾਲਣ ਵਾਲੀ ਸ਼ਬਾਨਾ ਮਹਿਮੂਦ ਨੇ ਅਪਣੀ ਵਚਨਬੱਧਤਾ ਦੁਹਰਾਉਂਦਿਆਂ ਕਿਹਾ, ‘‘ਅਸੀਂ ਅਪਣੀਆਂ ਸੜਕਾਂ ਨੂੰ ਸੁਰੱਖਿਅਤ ਬਣਾਉਣ ਅਤੇ ਅਪਣੀ ਇਮੀਗ੍ਰੇਸ਼ਨ ਪ੍ਰਣਾਲੀ ਨੂੰ ਸੱਭ ਲਈ ਨਿਰਪੱਖ ਬਣਾਉਣ ਲਈ ਵੱਡੇ ਸੁਧਾਰਾਂ ਦਾ ਕੰਮ ਸ਼ੁਰੂ ਕੀਤਾ ਸੀ। ਹੁਣ ਆਓ ਇਸ ਕੰਮ ਨੂੰ ਪੂਰਾ ਕਰੀਏ।?’’ ਨਵੇਂ ਪ੍ਰਧਾਨ ਮੰਤਰੀ ਬਰਨਹੈਮ ਨੇ ਸਟਾਰਮਰ ਦੇ ਕਰੀਬੀ ਸਮਰਥਕਾਂ ਡੇਵਿਡ ਲੈਮੀ, ਪੀਟਰ ਕਾਇਲ ਅਤੇ ਡੈਰਨ ਜੋਨਸ ਨੂੰ ਕੈਬਨਿਟ ਤੋਂ ਬਾਹਰ ਕਰ ਦਿਤਾ ਹੈ। ਦੂਜੇ ਪਾਸੇ, ਐਡ ਮਿਲੀਬੈਂਡ ਨੂੰ ਨਵਾਂ ਵਿਦੇਸ਼ ਮੰਤਰੀ, ਜੌਨ ਹੀਲੀ ਨੂੰ ਖਜ਼ਾਨਾ ਮੰਤਰੀ ਅਤੇ ਵੇਸ ਸਟ੍ਰੀਟਿੰਗ ਨੂੰ ਰੱਖਿਆ ਮੰਤਰੀ ਨਿਯੁਕਤ ਕੀਤਾ ਗਿਆ ਹੈ। (ਪੀ.ਟੀ.ਆਈ.)
