Peom in punjabi
ਸੁਣਿਆ ਬੜੀ ਤੇਜ਼ ਤਕਰਾਰ ਏ ਭਾਬੀ, ਪਰ ਬਜ਼ੁਰਗ ਵੀ ਹੁੰਦੇ, ਘਰ ਦੀ ਚਾਬੀ।
ਸੁਣਿਆ ਬੜੀ ਤੇਜ਼ ਤਕਰਾਰ ਏ ਭਾਬੀ,
ਪਰ ਬਜ਼ੁਰਗ ਵੀ ਹੁੰਦੇ, ਘਰ ਦੀ ਚਾਬੀ।
ਕਰ ਸੇਵਾ ਕੁਝ ਕਮਾ ਲਈਏ,
ਜੀਵਨ ਅਪਣੇ ਨੂੰ ਸਫ਼ਲ ਬਣਾ ਲਈਏ।
ਸੁਣਿਆ ਬੜੀ ਤੇਜ਼ ਤਕਰਾਰ ਏ ਭਾਬੀ...
ਕਹਿੰਦੇ, ਸਿਆਣੇ ਹੁੰਦੇ ਮਿੱਠੇ ਮੇਵੇ,
ਰੱਬ ਕਿਸੇ ਕਿਸੇ ਨੂੰ ਦੇਵੇ।
ਜੇ ਨਾ ਘਰ ਵਿਚ ਹੋਣ ਸਿਆਣੇ,
ਵਿਗੜ ਜਾਂਦੇ ਨੇ ਸਾਰੇ ਨਿਆਣੇ।
ਘਰ ਵਿਚ ਹੁੰਦੀ ਰਹੇ ਖਰਾਬੀ,
ਸੁਣਿਆ ਬੜੀ ਤੇਜ਼ ਤਕਰਾਰ ਏ ਭਾਬੀ
ਗੱਲ ਬਜ਼ੁਰਗ ਸਿਆਣੇ ਕਰਦੇ,
ਪੋਤੇ ਪੋਤੀਆਂ ਨੂੰ ਪਿਆਰ ਨੇ ਕਰਦੇ।
ਘਰ ਵਿਚ ਬੰਦੇ ਕਈ ਸੋਚਣ,
ਕਲੇਸ਼ ਲਈ ਘਰ ਤਿਆਰ ਨੇ ਕਰਦੇ।
ਭੱਜੀ ਫਿਰੂਗੀ ਘੜਾ ਭੰਨਣ ਲਈ,
ਤੁਰਗੀ ਜਦੋਂ ਰੂਹ ਨਵਾਬੀ।
ਸੁਣਿਆ ਬੜੀ ਤੇਜ਼ ਤਕਰਾਰ ਏ ਭਾਬੀ
ਸਿਆਣਿਆਂ ਬਿਨਾਂ ਸੁੰਨਾ ਵਿਹੜਾ,
ਬਿਨਾਂ ਉਨ੍ਹਾਂ ਸਾਰ ਲਵੇਗਾ ਕਿਹੜਾ,
ਇਹ ਜ਼ਮੀਨਾਂ, ਇਹ ਜਾਇਦਾਦਾਂ,
ਬਜ਼ੁਰਗ ਹੀ ਹੈ ਬਣਾ ਗਿਆ ਜਿਹੜਾ।
‘ਗੋਸਲ’ ਦਿਓਰ ਦੀ ਗੱਲ ਮੰਨੇ ਛੇਤੀ,
ਪੈਂਰੀ ਪੈ ਜਾਅ ਸਤਾਬੀ।
ਸੁਣਿਆ ਬੜੀ ਤੇਜ਼ ਤਕਰਾਰ ਏ ਭਾਬੀ
ਪਰ ਬਜ਼ੁਰਗ ਹੀ ਹੁੰਦੇ, ਘਰ ਦੀ ਚਾਬੀ,
- ਬਹਾਦਰ ਸਿੰਘ ਗੋਸਲ
(ਮੋ 98764-52223)
