ਚੰਡੀਗੜ੍ਹ, 30 ਜਨਵਰੀ (ਸਰਬਜੀਤ ਢਿੱਲੋਂ): ਮਿਊਂਸਪਲ ਕਾਰਪੋਰੇਸ਼ਨ ਦੇ ਜਨਰਲ ਹਾਊਸ ਦੀ ਮੀਟਿੰਗ ਮੇਅਰ ਦਿਵੇਸ਼ ਮੋਦਗਿਲ ਦੀ ਅਗਵਾਈ ਵਿਚ ਹੋਈ। ਇਸ ਮੌਕੇ ਭਾਜਪਾ ਤੇ ਕਾਂਗਰਸੀ ਕੌਂਸਲਰਾਂ ਵਿਚ ਰਾਜਪਾਲ ਦੇ ਭਾਸ਼ਨ ਨੂੰ ਲੈ ਕੇ ਥੋੜ੍ਹੀ ਬਹੁਤੀ ਨੋਕ-ਝੋਕ ਮਗਰੋਂ ਵਿੱਤ ਤੇ ਠੇਕਾ ਕਮੇਟੀ ਦੀ 5 ਮੈਂਬਰੀ ਕਮੇਟੀ ਦੀ ਚੋਣ ਅਤੇ ਸ਼ਹਿਰ ਦੇ ਵਿਕਾਸ ਲਈ ਦੋ-ਤਿੰਨ ਵਿਕਾਸ ਏਜੰਡੇ ਪਾਸ ਕੀਤੇ। ਇਸ ਮੌਕੇ ਹਾਊਸ ਨੇ ਮੇਅਰ ਦਿਵੇਸ਼ ਮੋਦਗਿਲ ਨੂੰ ਤਿੰਨ ਹੋਰ ਕਮੇਟੀਆਂ ਗਠਨ ਕਰਨ ਦਾ ਅਧਿਕਾਰ ਦਿਤਾ। ਵਿੱਤ ਤੇ ਠੇਕਾ ਕਮੇਟੀ ਕਰੇਗੀ ਬਜਟ ਪ੍ਰਸਤਾਵ ਪਾਸ: ਜਨਰਲ ਹਾਊਸ ਵਲੋਂ ਨਗਰ ਨਿਗਮ ਦੀ ਵਿੱਤ ਅਤੇ ਠੇਕਾ ਅਹਿਮ ਕਮੇਟੀ ਦਾ ਸਰਬਸੰਮਤੀ ਨਾਲ  ਗਠਨ ਕਰ ਦਿਤਾ ਹੈ। ਇਸ ਵਿਚ ਸਾਬਕਾ ਮੇਅਰ ਰਾਜਬਾਲਾ ਮਲਿਕ, ਹੀਰਾ ਨੇਗੀ, ਗੁਰਬਖ਼ਸ਼ ਰਾਵਤ, ਅਨਿਲ ਦੂਬੇ, ਫਰਮੀਲਾ ਨੂੰ ਚੁਣਿਆ ਗਿਆ। ਨਗਰ ਨਿਗਮ ਦੇ ਵਿੱਤੀ ਵਰ੍ਹੇ ਦੇ ਬਜਟ ਲਈ ਵਿੱਤ ਤੇ ਠੇਕਾ ਕਮੇਟੀ ਪ੍ਰਸਤਾਵਤ ਬਜਟ ਪਾਸ ਕਰੇਗੀ। ਇਸ ਮਗਰੋਂ ਨਗਰ ਨਿਗਮ ਦੇ ਜਨਰਲ ਹਾਊਸ ਵਿਚ ਮਤਾ ਪਾਸ ਕੀਤਾ ਜਾਵੇਗਾ। 

ਹਾਊਸ ਵਿਚ ਤਿੰਨ ਕਮੇਟੀਆਂ ਦੇ ਗਠਨ ਲਈ ਪ੍ਰਸਤਾਵ ਪਾਸ: ਤਿੰਨ ਕਮੇਟੀਆਂ ਰੋਡ ਕਮੇਟੀ, ਹਾਊਸ ਟੈਕਸ ਸਮੀਖਿਆ ਕਮੇਟੀ, ਜਲ ਸਪਲਾਈ ਤੇ ਮਲ ਨਿਕਾਸੀ ਕਮੇਟੀ ਦੇ ਗਠਨ ਲਈ ਮਤਾ ਪਾਸ ਕੀਤਾ ਗਿਆ। ਇਨ੍ਹਾਂ ਕਮੇਟੀਆਂ ਦਾ ਗਠਨ ਮੇਅਰ ਸੀਨੀਅਰ ਕੌਂਸਲਰ ਅਤੇ ਅਫ਼ਸਰਾਂ ਦੀ ਸਲਾਹ ਨਾਲ ਕਰਨਗੇ।  ਸੈਕਟਰ-17 ਸਬ ਸਿਟੀ ਦਾ ਵਿਕਾਸ: ਕਾਫ਼ੀ ਲੰਮੇ ਸਮੇਂ ਤੋਂ ਸੈਕਟਰ-17 'ਚ ਵੱਖ-ਵੱਖ ਸ਼ੋਅ ਰੂਮਾਂ ਨੂੰ ਜੋੜ ਕੇ ਰਸਤਿਆਂ ਦੀ ਮੁੜ ਉਸਾਰੀ ਕਰਨ, ਮਜ਼ਦੂਰਾਂ ਦੀ ਸਹਾਇਤਾ ਨਾਲ ਖ਼ਰਾਬ ਢਾਂਚੇ ਨੂੰ ਤੋੜ ਕੇ ਤੇ ਕੰਕਰੀਟ ਦੀ ਉਸਾਰੀ ਕਰਨ ਲਈ 4 ਕਰੋੜ 58 ਲੱਖ ਰੁਪਏ ਦਾ ਮਤਾ ਪਾਸ ਕੀਤਾ ਗਿਆ, ਜਿਸ ਨਾਲ ਸੈਕਟਰ-17 ਵਿਚ ਮੁੜ ਰੌਣਕ ਤੇ ਖ਼ੂਬਸੂਰਤੀ ਪਰਤੇਗੀ। ਇਸ ਤੋਂ ਇਲਾਵਾ ਮਿਊਂਸਪਲ ਕਾਰਪੋਰੇਸ਼ਨ ਸੈਕਟਰ-48 ਵਿਚ ਅਧੂਰੀ ਪਈ ਗਰੀਨ ਬੈਲਟ ਦੀ ਉਸਾਰੀ ਕਰਨ, ਇਲੈਕਟ੍ਰੀਕਲ ਵਿਭਾਗ ਵਿਚ ਖ਼ਾਲੀ ਪਈਆਂ ਐਸ.ਡੀ.ਓ. ਲੈਵਲ ਦੀਆਂ ਅਸਾਮੀਆਂ 'ਤੇ ਤਰੱਕੀ ਰਾਹੀਂ ਤੇ ਸਿੱਧੀ ਭਰਤੀ ਕਰਨ ਸਮੇਤ ਕਈ ਪ੍ਰਸਤਾਵ ਪਾਸ ਕੀਤੇ ਗਏ।