ਸਾਊਥ ਸਟਾਰ ਅਤੇ ਆਰਆਰਆਰ ਮੂਵੀ ਫੇਮ ਰਾਮ ਚਰਨ ਅੰਮ੍ਰਿਤਸਰ ਵਿਚ ਬੀਐਸਐਫ ਕੈਂਪ ਪਹੁੰਚੇ ਅਤੇ ਉਹਨਾਂ ਨੇ ਜਵਾਨਾਂ ਨਾਲ ਮੁਲਾਕਾਤ ਕੀਤੀ।
ਅੰਮ੍ਰਿਤਸਰ: ਸਾਊਥ ਸਟਾਰ ਅਤੇ ਆਰਆਰਆਰ ਮੂਵੀ ਫੇਮ ਰਾਮ ਚਰਨ ਅੰਮ੍ਰਿਤਸਰ ਵਿਚ ਬੀਐਸਐਫ ਕੈਂਪ ਪਹੁੰਚੇ ਅਤੇ ਉਹਨਾਂ ਨੇ ਜਵਾਨਾਂ ਨਾਲ ਮੁਲਾਕਾਤ ਕੀਤੀ। ਇਸ ਦੌਰਾਨ ਉਹਨਾਂ ਨੇ ਜਵਾਨਾਂ ਦੀ ਮੇਸ 'ਚ ਉਹਨਾਂ ਨਾਲ ਸਮਾਂ ਬਿਤਾਇਆ। ਹੈਦਰਾਬਾਦ ਤੋਂ ਆਪਣੇ ਨਿੱਜੀ ਸ਼ੈੱਫ ਨੂੰ ਵਿਸ਼ੇਸ਼ ਤੌਰ 'ਤੇ ਬੁਲਾ ਕੇ ਉਹਨਾਂ ਨੇ ਸੈਨਿਕਾਂ ਲਈ ਦੱਖਣੀ ਭਾਰਤੀ ਭੋਜਨ ਤਿਆਰ ਕਰਵਾਇਆ।
ਇਸ ਮੁਲਾਕਾਤ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ’ਤੇ ਕਾਫੀ ਵਾਇਰਲ ਹੋ ਰਹੀਆਂ ਹਨ। ਖਾਣਾ ਖਾ ਕੇ ਅਤੇ ਸਿਪਾਹੀਆਂ ਨਾਲ ਸਮਾਂ ਬਿਤਾਉਣ ਤੋਂ ਬਾਅਦ ਰਾਮ ਚਰਨ ਕਾਫ਼ੀ ਖ਼ੁਸ਼ ਨਜ਼ਰ ਆਏ। ਇਸ ਤੋਂ ਪਹਿਲਾਂ ਫਿਲਮ 'ਆਰਆਰਆਰ' ਦੀ ਸਫਲਤਾ ਤੋਂ ਬਾਅਦ ਰਾਮ ਚਰਨ ਨੇ ਸ੍ਰੀ ਦਰਬਾਰ ਸਾਹਿਬ 'ਚ ਲੰਗਰ ਲਗਾਇਆ ਸੀ।
ਉਹਨਾਂ ਦੀ ਪਤਨੀ ਉਪਾਸਨਾ ਨੇ ਵੀ ਸ੍ਰੀ ਦਰਬਾਰ ਸਾਹਿਬ ਮੱਥਾ ਟੇਕਿਆ ਅਤੇ ਉਥੇ ਲੰਗਰ ਸੇਵਾ ਵਿਚ 5 ਲੱਖ ਦੀ ਰਾਸ਼ੀ ਭੇਟ ਕੀਤੀ ਸੀ। ਦੱਸ ਦੇਈਏ ਕਿ ਨਿਰਦੇਸ਼ਕ ਐਸਐਸ ਰਾਜਾਮੌਲੀ ਦੀ ਫ਼ਿਲਮ 'ਆਰਆਰਆਰ' ਦੇ ਰਿਲੀਜ਼ ਹੋਣ ਤੋਂ ਬਾਅਦ ਅਭਿਨੇਤਾ ਰਾਮ ਚਰਨ ਦੀ ਲੋਕਪ੍ਰਿਯਤਾ ਕਾਫੀ ਵਧ ਗਈ ਹੈ।
ਹੁਣ ਉਹ ਪਿਛਲੇ ਕੁਝ ਦਿਨਾਂ ਤੋਂ ਅੰਮ੍ਰਿਤਸਰ ਵਿਚ ਨਿਰਦੇਸ਼ਕ ਸ਼ੰਕਰ ਦੀ ਆਉਣ ਵਾਲੀ ਫਿਲਮ ਆਰਸੀ 15 ਦੀ ਸ਼ੂਟਿੰਗ ਕਰ ਰਹੇ ਹਨ। ਉਹਨਾਂ ਨਾਲ ਅਦਾਕਾਰਾ ਕਿਆਰਾ ਅਡਵਾਨੀ ਨਜ਼ਰ ਆਵੇਗੀ। ਅਭਿਨੇਤਾ ਆਪਣੇ ਪਿਤਾ ਚਿਰੰਜੀਵੀ ਦੇ ਨਾਲ ਨਿਰਦੇਸ਼ਕ ਕੋਰਤਾਲਾ ਸਿਵਾ ਦੀ ਅਚਾਰੀਆ ਵਿਚ ਵੀ ਨਜ਼ਰ ਆਉਣਗੇ।