ਕਾਮੇਡੀ ਪ੍ਰੇਮੀਆਂ ਨੂੰ ਇਕ ਵਾਰ ਫ਼ਿਰ ਤੋਂ ਹਸਾਉਣ ਆਏ ਕਪਿਲ ਸ਼ਰਮਾ ਦੀ ਛੋਟੇ ਪਰਦੇ 'ਤੇ ਵਾਪਸੀ ਦਰਸ਼ਕਾਂ ਨੂੰ ਸ਼ਾਇਦ ਪਸੰਦ ਨਹੀਂ ਆਈ
ਕਾਮੇਡੀ ਪ੍ਰੇਮੀਆਂ ਨੂੰ ਇਕ ਵਾਰ ਫ਼ਿਰ ਤੋਂ ਹਸਾਉਣ ਆਏ ਕਪਿਲ ਸ਼ਰਮਾ ਦੀ ਛੋਟੇ ਪਰਦੇ 'ਤੇ ਵਾਪਸੀ ਦਰਸ਼ਕਾਂ ਨੂੰ ਸ਼ਾਇਦ ਪਸੰਦ ਨਹੀਂ ਆਈ। ਜਿਸ ਦੇ ਨਤੀਜੇ ਵਜੋਂ ਕਪਿਲ ਨੂੰ ਅਪਣੇ ਸ਼ੋਅ ਦੇ ਪ੍ਰਸਾਰ ਤੋਂ ਤੁਰਤ ਬਾਅਦ ਹੀ ਲੋਕਾਂ ਦੀ ਅਲੋਚਨਾ ਦਾ ਸ਼ਿਕਾਰ ਹੋਣਾ ਪਿਆ। ਦਰਅਸਲ ਲੰਮੇ ਸਮੇਂ ਦੇ ਬ੍ਰੇਕ ਤੋਂ ਬਾਅਦ ਸੋਨੀ ਐਂਟਰਟੇਨਮੈਂਟ 'ਤੇ ਕਪਿਲ ਨੇ ਅਪਣੇ ਨਵੇਂ ਸ਼ੋਅ 'ਫ਼ੈਮਲੀ ਟਾਈਮ ਵਿਦ ਕਪਿਲ ਸ਼ਰਮਾ' ਨਾਲ ਵਾਪਸੀ ਕੀਤੀ ।
ਜਿਥੇ ਉਨ੍ਹਾਂ ਨੇ ਪਹਿਲੇ ਐਪੀਸੋਡ ਵਿਚ ਪਹਿਲਾਂ ਦੇ ਮੁਕਾਬਲੇ ਬਹੁਤ ਕੁੱਝ ਵਖਰਾ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਸੋਸ਼ਲ ਮੀਡੀਆ 'ਤੇ ਸ਼ੋਅ ਨੂੰ ਲੈ ਕੇ ਮਿਲ ਰਹੀਆਂ ਪ੍ਰਤੀਕਿਰਿਆਵਾਂ ਨੂੰ ਦੇਖ ਕੇ ਅਜਿਹਾ ਲਗਦਾ ਹੈ ਜਿਵੇਂ ਇਸ ਵਾਰ ਦਰਸ਼ਕਾਂ ਨੂੰ ਉਨ੍ਹਾਂ ਦਾ ਸ਼ੋਅ ਕੁੱਝ ਖ਼ਾਸ ਨਹੀਂ ਲੱਗਾ। ਸ਼ੋਅ ਨੂੰ ਲੈ ਕੇ ਲੋਕਾਂ ਨੇ ਕਪਿਲ ਸ਼ਰਮਾ ਨੂੰ ਟਵਿਟਰ 'ਤੇ ਅਪਣੇ ਪ੍ਰਤੀਕਰਮ ਦਿਤੇ ਜਿਨ੍ਹਾਂ ਵਿਚ ਲੋਕਾਂ ਨੇ ਲਿਖਿਆ ਕਿ ਗੇਮ ਦੀ ਜਗ੍ਹਾ ਕਾਮੇਡੀ ਸ਼ੋਅ ਲਿਆਉਣਾ ਸੀ, ਲੋਕਾਂ ਨੇ ਕਿਹਾ ਕਿ ਇਹ ਸ਼ੋਅ ਬਹੁਤ ਬੋਰੀਅਤ ਨਾਲ ਭਰਿਆ ਹੈ। ਐਨੀ ਬੇਸਬਰੀ ਨਾਲ ਇੰਤਜ਼ਾਰ ਕਰਨ ਤੋਂ ਬਾਅਦ ਇਹ ਉਮੀਦ ਨਹੀਂ ਸੀ। ਸ਼ੋਅ ਬਾਰੇ ਬੋਲਦਿਆਂ ਲੋਕਾਂ ਨੇ ਕਿਹਾ ਕਿ ਕਪਿਲ ਦਾ ਸ਼ੋਅ ਦੇਖਣ ਨਾਲੋਂ ਬਿਹਤਰ ਹੈ ਕਿ ਫ਼ਿਲਮ ਬਾਹੂਬਲੀ ਨੂੰ 6 ਵਾਰ ਦੇਖ ਲਈਏ। ਇੰਨਾ ਹੀ ਨਹੀ, ਕਈਆਂ ਨੇ ਮੋਦੀ ਦੀ ਸੁੱਤੇ ਹੋਏ ਫ਼ੋਟੋ ਪੋਸਟ ਕਰ ਕੇ ਕਿਹਾ ਕਿ ਮੈਨੂੰ ਕਪਿਲ ਦਾ ਸ਼ੋਅ ਦੇਖ ਕੇ ਅਜਿਹਾ ਮਹਿਸੂਸ ਹੋ ਰਿਹਾ ਹੈ। ਦਸ ਦਈਏ ਕਿ ਕਪਿਲ ਦੇ ਸ਼ੋਅ ਦੌਰਾਨ ਲੋਕਾਂ ਨੂੰ ਲਗਿਆ ਸੀ ਕਿ ਕੁੱਝ ਨਵਾਂ ਹੋਵੇਗਾ ਪਰ ਅਜਿਹਾ ਕੁੱਝ ਨਹੀਂ ਹੋਇਆ। ਸ਼ੋਅ 'ਚ ਕਪਿਲ ਉਸ ਤਰ੍ਹਾਂ ਹੀ ਆਗਾਜ਼ ਕੀਤਾ ਜਿਵੇਂ ਕਿ ਪਹਿਲਾਂ ਕਰਦੇ ਸਨ। ਹਾਲਾਂਕਿ ਸ਼ੋਅ ਦੇ ਸਥਾਈ ਮਹਿਮਾਨ ਵਜੋਂ ਰਹਿਣ ਵਾਲੇ ਸਾਬਕਾ ਭਾਰਤੀ ਕ੍ਰਿਕਟਰ ਅਤੇ ਸਾਂਸਦ ਨਵਜੋਤ ਸਿੰਘ ਸਿੱਧੂ ਦੀ ਐਂਟਰੀ ਜ਼ਰੂਰ ਸਰਪ੍ਰਾਈਜ਼ਿੰਗ ਰਹੀ। ਜਿਸ ਦਾ ਖ਼ੁਲਾਸਾ ਨਹੀਂ ਕੀਤਾ ਗਿਆ ਸੀ। ਦਸ ਦਈਏ ਕਿ ਐਂਟਰੀ ਕਰਨ ਤੋਂ ਬਾਅਦ ਸਿੱਧੂ ਵੀ ਅਪਣੇ ਪੁਰਾਣੇ ਰੰਗ ਵਿੱਚ ਹੀ ਨਜ਼ਰ ਆਏ ਜਿਨ੍ਹਾਂ ਨੇ ਆਉਂਦੇ ਹੀ ਕਪਿਲ ਦੀ ਖਿਚਾਈ ਵੀ ਕਰ ਦਿਤੀ ਕਿ ਫ਼ਿਲਮ ਫਿਰੰਗੀ ਫ਼ਲਾਪ ਕਰਾ ਕੇ ਵਾਪਸ ਆ ਗਿਆ ਹੈ। ਕਾਮੇਡੀ ਨਾਇਟਸ ਵਿਦ ਕਪਿਲ ਅਤੇ ਦ ਕਪਿਲ ਸ਼ਰਮਾ ਸ਼ੋਅ ਦੀ ਤਰ੍ਹਾਂ ਇਸ ਸ਼ੋਅ ਦੀ ਸ਼ੁਰੁਆਤ ਵੀ ਕਪਿਲ ਨੇ ਚੁਟਕਲੇ ਸੁਣਾ ਕੇ ਕੀਤੀ ਅਤੇ ਸਿੱਧੂ ਨਾਲ ਮਜ਼ਾਕੀਆ ਗੱਲਬਾਤ ਨਾਲ ਕੀਤੀ ਅਤੇ ਵਿਚ ਵਿਚ ਸ਼ੋਅ ਦੇਖਣ ਆਏ ਦਰਸ਼ਕਾਂ ਨੂੰ ਸਵਾਲ ਜਵਾਬ ਵੀ ਕੀਤੇ ਅਤੇ ਗੇਮ ਸ਼ੋਅ ਹੋਣ ਦੇ ਨਾਤੇ ਉਨ੍ਹਾਂ ਨੂੰ ਗਿਫ਼ਟ ਹੈਂਪਰ ਵੀ ਦਿਤੇ।