ਬਾਲੀਵੁੱਡ ਦੇ ਸ਼ਹਿਨਸ਼ਾਹ ਆਪਣੀ ਅਦਾਕਾਰੀ ਦੇ ਨਾਲ-ਨਾਲ ਆਪਣੇ ਹਸਮੁੱਖ ਸੁਭਾਅ ਦੇ ਲਈ ਵੀ ਜਾਣੇ ਜਾਂਦੇ ਹਨ। ਇਸੇ ਤਰ੍ਹਾਂ ਅਮਿਤਾਭ ਬੱਚਨ ਨੂੰ ਸੋਸ਼ਲ ਮੀਡੀਆ 'ਤੇ ਵੀ ਕਾਫੀ ਐਕਟਿਵ ਦੇਖਿਆ ਜਾਂਦਾ ਹੈ ਅਤੇ ਅਕਸਰ ਹੀ ਆਪਣੀ ਇੱਛਾ ਵੀ ਸੋਸ਼ਲ ਮੀਡੀਆ ਰਾਹੀਂ ਜ਼ਾਹਿਰ ਕਰ ਦਿੰਦੇ ਹਨ।
ਇਹਨਾਂ ਇੱਛਾਵਾਂ ਦੀ ਲੜੀ ਵਿਚ ਅਮਿਤਾਭ ਨੇ ਦੀਪਿਕਾ ਪਾਦੁਕੋਣ ਅਤੇ ਕੈਟਰੀਨਾ ਕੈਫ ਨਾਲ ਮੁੱਖ ਭੂਮਿਕਾ ਨਿਭਾਉਣ ਦੀ ਇੱਛਾ ਜ਼ਾਹਿਰ ਕਰਦੇ ਹੋਏ ਆਪਣਾ 'ਬਾਇਓਡਾਟਾ' ਸੋਸ਼ਲ ਮੀਡੀਆ 'ਤੇ ਸਾਂਝਾ ਕੀਤਾ ਹੈ ਜਿਥੇ ਉਹਨਾ ਨੇ ਕਿਹਾ ਹੈ ਕਿ ਇਨ੍ਹਾਂ ਦੋਵਾਂ ਦਾ ਕੱਦ ਉੱਚਾ ਹੈ, ਅਤੇ ਇਸੇ ਕਾਰਨ ਹੀ ਫਿਲਮਕਾਰਾਂ ਨੂੰ ਹੋਰ ਅਦਾਕਾਰਾਂ ਦੇ ਨਾਲ ਉਨ੍ਹਾਂ ਨੂੰ ਲੈਣ 'ਚ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਅਮਿਤਾਭ ਨੇ ਟਵਿਟਰ 'ਤੇ ਇਕ ਖਬਰ ਦੀ ਕਟਿੰਗ ਨਾਲ ਆਪਣਾ ਬਾਇਓਡਾਟਾ ਸਾਂਝਾ ਕੀਤਾ ਹੈ।
ਦੱਸ ਦੇਈਏ ਕਿ ਸਾਂਝੀ ਕੀਤੀ ਅਖਬਾਰ ਦੀ ਕਟਿੰਗ 'ਚ ਦੱਸਿਆ ਗਿਆ ਕਿ ਫਿਲਮ ਨਿਰਮਾਤਾਵਾਂ ਨੂੰ ਦੀਪਿਕਾ ਅਤੇ ਕੈਟਰੀਨਾ ਨੂੰ ਸ਼ਾਹਿਦ ਅਤੇ ਆਮਿਰ ਨਾਲ ਕੰਮ ਕਰਨ 'ਚ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਸੀ। ਬਾਇਓਡਾਟਾ 'ਚ ਬੱਚਨ ਨੇ ਆਪਣਾ ਜਨਮ ਸਥਾਨ, ਭਾਸ਼ਾਵਾਂ ਦੀ ਜਾਣਕਾਰੀ, ਉਮਰ ਅਤੇ ਕਰੀਅਰ ਬਾਰੇ ਜਾਣਕਾਰੀ ਦਿੱਤੀ ਹੈ।
ਉਨ੍ਹਾਂ ਨੇ ਦੀਪਿਕਾ ਨਾਲ 'ਪੀਕੂ' ਫਿਲਮ 'ਚ ਕੰਮ ਕੀਤਾ ਹੈ ਜਦਕਿ 2013 'ਚ ਆਈ 'ਬੂਮ' ਫਿਲਮ 'ਚ ਉਨ੍ਹਾਂ ਨੇ ਕੈਟਰੀਨਾ ਨਾਲ ਕੰਮ ਕੀਤਾ ਸੀ। ਇਸ ਤੋਂ ਇਲਾਵਾ ਉਹ ਆਮਿਰ ਖਾਨ ਦੇ ਨਾਲ ਆਉਣ ਵਾਲੀ ਫਿਲਮ 'ਠੱਗਜ਼ ਆਫ ਹਿੰਦੁਸਤਾਨ' 'ਚ ਕੈਟਰੀਨਾ ਨਾਲ ਵੱਡੇ ਪਰਦੇ 'ਤੇ ਨਜ਼ਰ ਆਉਣਗੇ।
