ਵਾਇਰਲ ਹੋ ਰਿਹਾ ਵੀਡੀਓ 5 ਜਨਵਰੀ 2022 ਨਹੀਂ ਸਗੋਂ 26 ਦਿਸੰਬਰ 2021 ਦਾ ਹੈ। ਵੀਡੀਓ ਵਿਚ ਦਿੱਸ ਰਿਹਾ ਮਾਰਚ ਬਹਿਬਲ ਕਲਾਂ ਗੋਲੀਕਾਂਡ ਦੇ ਇਨਸਾਫ ਲਈ ਕੱਢਿਆ ਗਿਆ ਸੀ।
RSFC (Team Mohali)- ਦੇਸ਼ ਦੇ ਪ੍ਰਧਾਨਮੰਤਰੀ ਨਰੇਂਦਰ ਮੋਦੀ ਨੇ 5 ਜਨਵਰੀ 2022 ਨੂੰ ਪੰਜਾਬ ਦੇ ਫਿਰੋਜ਼ਪੁਰ ਵਿਖੇ ਰੈਲੀ ਕਰਨੀ ਸੀ। ਇਸ ਰੈਲੀ ਨੂੰ ਲੈ ਕੇ PM ਪੰਜਾਬ ਵੀ ਆਏ ਪਰ ਸੁਰੱਖਿਆ ਕਾਰਨਾਂ ਕਰਕੇ ਇਹ ਰੈਲੀ ਰੱਦ ਹੋ ਗਈ ਸੀ। ਭਾਜਪਾ ਨੇ ਰੈਲੀ ਰੱਦ ਹੋਣ ਤੋਂ ਬਾਅਦ ਪੰਜਾਬ ਦੇ ਮੁੱਖ ਮੰਤਰੀ ਅਤੇ ਕਾਂਗਰੇਸ ਸਰਕਾਰ ਨੂੰ ਨਿਸ਼ਾਨੇ 'ਤੇ ਲਿਆ। ਹੁਣ ਇਸ ਰੈਲੀ ਨੂੰ ਲੈ ਕੇ ਇੱਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ। ਇਸ ਵੀਡੀਓ ਵਿਚ ਕੁਝ ਬਾਈਕ ਸਵਾਰ ਨੌਜਵਾਨਾਂ ਨੂੰ ਖਾਲਿਸਤਾਨ ਜ਼ਿੰਦਾਬਾਦ ਦੇ ਨਾਅਰੇ ਲਾਉਂਦੇ ਵੇਖਿਆ ਜਾ ਸਕਦਾ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਵੀਡੀਓ 5 ਜਨਵਰੀ 2022 ਦਾ ਹੈ ਅਤੇ ਇਸ ਵੀਡੀਓ ਵਿਚ ਦਿੱਸ ਰਹੇ ਨੌਜਵਾਨਾਂ ਕਰਕੇ ਹੀ ਰੈਲੀ ਰੱਦ ਹੋਈ ਸੀ। ਦਾਅਵੇ ਅਨੁਸਾਰ PM ਦੀ ਰੈਲੀ ਨੂੰ ਰੋਕਣ ਵਾਲੇ ਲੋਕਾਂ ਨੇ ਖਾਲਿਸਤਾਨ ਜ਼ਿੰਦਾਬਾਦ ਦੇ ਨਾਅਰੇ ਲਾਏ।
ਇਸ ਵੀਡੀਓ ਨੂੰ ਸ਼ੇਅਰ ਕਰਦਿਆਂ ਸਿੱਖ ਸਮੁਦਾਏ 'ਤੇ ਨਿਸ਼ਾਨਾ ਸਾਧਿਆ ਜਾ ਰਿਹਾ ਹੈ।
ਰੋਜ਼ਾਨਾ ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਪਾਇਆ ਕਿ ਵਾਇਰਲ ਹੋ ਰਿਹਾ ਵੀਡੀਓ 5 ਜਨਵਰੀ 2022 ਨਹੀਂ ਸਗੋਂ 26 ਦਿਸੰਬਰ 2021 ਦਾ ਹੈ। ਵੀਡੀਓ ਵਿਚ ਦਿੱਸ ਰਿਹਾ ਮਾਰਚ ਬਹਿਬਲ ਕਲਾਂ ਗੋਲੀਕਾਂਡ ਦੇ ਇਨਸਾਫ ਲਈ ਕੱਢਿਆ ਗਿਆ ਸੀ।
ਵਾਇਰਲ ਪੋਸਟ
ਟਵਿੱਟਰ ਯੂਜ਼ਰ "Narendra Modi fan" ਨੇ ਅੱਜ 6 ਜਨਵਰੀ 2022 ਨੂੰ ਵਾਇਰਲ ਵੀਡੀਓ ਸ਼ੇਅਰ ਕਰਦਿਆਂ ਲਿਖਿਆ, "Why Did The Congress Government Not Arrest Those Who Raised Slogans Of Khalistan Zindabad Yesterday ? #PresidentRuleInPunjab"
ਇਸ ਪੋਸਟ ਨੂੰ ਹੇਠਾਂ ਕਲਿਕ ਕਰ ਵੇਖਿਆ ਜਾ ਸਕਦਾ ਹੈ।
Why Did The Congress Government Not Arrest Those Who Raised Slogans Of Khalistan Zindabad Yesterday ? #PresidentRuleInPunjab pic.twitter.com/AxCcRtjRvh
— Narendra Modi fan (@narendramodi177) January 6, 2022
ਪੜਤਾਲ
ਪੜਤਾਲ ਦੀ ਸ਼ੁਰੂਆਤ ਕਰਦੇ ਹੋਏ ਅਸੀਂ ਸਭਤੋਂ ਪਹਿਲਾਂ ਵੀਡੀਓ ਨੂੰ ਧਿਆਨ ਨਾਲ ਵੇਖਿਆ ਅਤੇ ਇਸ ਪੋਸਟ 'ਤੇ ਆਏ ਕਮੈਂਟਾਂ ਨੂੰ ਪੜ੍ਹਨਾ ਸ਼ੁਰੂ ਕੀਤਾ। ਟਵਿੱਟਰ ਅਕਾਊਂਟ "☬NeverForget1984☬" ਨੇ ਇਸ ਵਾਇਰਲ ਪੋਸਟ 'ਤੇ ਕਮੈਂਟ ਕਰਕੇ ਕਿਹਾ ਕਿ ਇਹ ਵੀਡੀਓ ਹਾਲੀਆ ਨਹੀਂ ਬਲਕਿ 26 ਦਿਸੰਬਰ 2021 ਦਾ ਹੈ ਜਦੋਂ ਸ਼੍ਰੀ ਫਤਹਿਗੜ੍ਹ ਸਾਹਿਬ ਜਾਣ ਮੌਕੇ ਨੌਜਵਾਨਾਂ ਵੱਲੋਂ ਕੇਸਰੀ ਮਾਰਚ ਨਾਮਕ ਰੈਲੀ ਕੱਢੀ ਗਈ ਸੀ।
This video is of 26 Dec 2021 from a Bike March in Remembrance of Chhote Sahibzade in Sirhind Punjab, not in ferozpur. Stop Defaming Punjab and Sikhs pic.twitter.com/057rMZ46hB
— ☬NeverForget1984☬ (@WeNeverForget84) January 6, 2022
ਅੱਗੇ ਵਧਦੇ ਹੋਏ ਅਸੀਂ ਕਮੈਂਟ ਨੂੰ ਧਿਆਨ ਵਿਚ ਰੱਖਿਆ ਅਤੇ ਵੀਡੀਓ ਦੇ ਲਿੰਕ ਨੂੰ ਅੱਗੇ InVID ਟੂਲ ਵਿਚ ਪਾਇਆ। InVID ਟੂਲ ਰਹੀ ਅਸੀਂ ਵੀਡੀਓ ਦੇ ਕੀਫ਼੍ਰੇਮਸ ਕੱਢੇ ਅਤੇ ਉਨ੍ਹਾਂ ਨੂੰ ਗੂਗਲ ਰਿਵਰਸ ਇਮੇਜ ਟੂਲ ਵਿਚ ਅਪਲੋਡ ਕਰ ਸਰਚ ਕੀਤਾ।
ਸਾਨੂੰ ਇਹ ਵੀਡੀਓ ਕਈ ਪੁਰਾਣੇ ਪੋਸਟਾਂ 'ਤੇ ਅਪਲੋਡ ਮਿਲਿਆ। ਸਾਨੂੰ ਇਸ ਵੀਡੀਓ ਸਣੇ 2 ਵੀਡੀਓ ਮਿਲੇ ਜਿਨ੍ਹਾਂ ਵਿਚ ਬਾਈਕ ਸਵਾਰ ਖਾਲਿਸਤਾਨ ਜ਼ਿੰਦਾਬਾਦ ਦੇ ਨਾਅਰੇ ਲਗਾ ਰਹੇ ਸਨ। ਟਵਿੱਟਰ ਅਕਾਊਂਟ Preet ਨੇ ਇਨ੍ਹਾਂ ਦੋਵੇਂ ਵੀਡੀਓਜ਼ ਨੂੰ 27 ਦਿਸੰਬਰ 2021 ਨੂੰ ਸ਼ੇਅਰ ਕੀਤਾ ਸੀ। ਅਸੀਂ ਇਨ੍ਹਾਂ ਦੋਵੇਂ ਵੀਡੀਓਜ਼ ਨੂੰ ਧਿਆਨ ਨਾਲ ਵੇਖਿਆ। ਸਾਨੂੰ ਇੱਕ ਵੀਡੀਓ ਵਿਚ ਕਈ ਦੁਕਾਨਾਂ ਦੇ ਬੋਰਡ ਨਜ਼ਰ ਆਏ। ਅਜਿਹਾ ਹੀ ਸਾਨੂੰ ਇੱਕ ਦੁਕਾਨ ਦਾ ਬੋਰਡ ਨਜ਼ਰ ਆਇਆ ਅਤੇ ਅਸੀਂ ਬੋਰਡ 'ਤੇ ਦਿੱਤੇ ਨੰਬਰ 'ਤੇ ਕਾਲ ਕੀਤਾ।
"ਸੁਰੱਖਿਆ ਅਤੇ ਨਿਜੀ ਕਾਰਨਾਂ ਕਰਕੇ ਅਸੀਂ ਦੁਕਾਨ ਦੀ ਜਾਣਕਾਰੀ ਤੁਹਾਂਨੂੰ ਨਹੀਂ ਦੱਸ ਸਕਦੇ।"
ਦੁਕਾਨ 'ਤੇ ਫੋਨ ਕਰਨ 'ਤੇ ਸਾਨੂੰ ਦੁਕਾਨ ਦੇ ਮਾਲਿਕ ਨੇ ਦੱਸਿਆ ਕਿ ਇਹ ਵੀਡੀਓ ਫਰੀਦਕੋਟ ਦਾ ਹੈ। ਹਾਲਾਂਕਿ ਦੁਕਾਨ ਦੇ ਮਾਲਿਕ ਨੇ ਇਸ ਵੀਡੀਓ ਦੀ ਮਿਤੀ ਬਾਰੇ ਕੋਈ ਪੁਸ਼ਟੀ ਨਹੀਂ ਕੀਤੀ।
ਅੱਗੇ ਵਧਦੇ ਹੋਏ ਅਸੀਂ ਵੀਡੀਓ ਨੂੰ ਲੈ ਕੇ ਸਾਡੇ ਰੋਜ਼ਾਨਾ ਸਪੋਕਸਮੈਨ ਦੇ ਫਰੀਦਕੋਟ ਇੰਚਾਰਜ ਸੁਖਜਿੰਦਰ ਸਿੰਘ ਨਾਲ ਗੱਲਬਾਤ ਕੀਤੀ। ਸੁਖਜਿੰਦਰ ਨੇ ਵੀਡੀਓ ਦੀ ਪੂਰੀ ਜਾਂਚ ਕੀਤੀ ਅਤੇ ਸਾਨੂੰ ਅਸਲ ਮਾਮਲੇ ਬਾਰੇ ਦੱਸਿਆ। ਸੁਖਜਿੰਦਰ ਨੇ ਸਾਨੂੰ ਦੱਸਿਆ, "ਇਹ ਵੀਡੀਓ ਬਹਿਬਲ ਕਲਾਂ ਗੋਲੀਕਾਂਡ ਦੇ ਇਨਸਾਫ ਨੂੰ ਲੈ ਕੇ ਕੱਢੇ ਗਏ ਇੱਕ ਮਾਰਚ ਦਾ ਵੀਡੀਓ ਹੈ। ਵਾਇਰਲ ਵੀਡੀਓ ਪਿੰਡ ਜਿਉਣ ਵਾਲਾ ਤੋਂ ਚੱਲ ਬਹਿਬਲਕਲਾਂ ਪਹੁੰਚੇ ਮਾਰਚ ਦੀ ਹੈ ਜੋ ਮੋਗਾ ਕੋਟਕਪੂਰਾ ਰੋਡ ਤੋਂ ਬਹਿਬਲ ਕਲਾਂ ਨੂੰ ਜਾਂਦੇ ਰਸਤੇ ਵਿਚਕਾਰ ਦੀ ਹੈ। ਇਹ ਕੋਈ ਕੇਸਰੀ ਮਾਰਚ ਨਹੀਂ ਸੀ। ਰਹੀ ਗੱਲ ਦੂਜੇ ਵੀਡੀਓ ਦੀ ਜਿਸਦੇ ਵਿਚ ਦੁਕਾਨਾਂ ਦੇ ਬੋਰਡ ਨਜ਼ਰ ਆ ਰਹੇ ਹਨ। ਉਹ ਵੀਡੀਓ ਕੋਟਕਪੂਰਾ ਦੇ ਬੱਤੀਆਂ ਵਾਲੇ ਚੋਂਕ ਤੋਂ ਬਹਿਬਲਕਲਾਂ ਜਾ ਰਹੇ ਰਸਤੇ ਵਿਚਕਾਰ ਦੀ ਹੈ। ਜਿਸ ਵਿਚ ਕੋਟਕਪੂਰਾ ਦੇ ਇਕ ਨਾਮੀ ਹਸਪਤਾਲ ਦਾ ਬੋਰਡ ਵੀ ਦਿਖ ਰਿਹਾ ਹੈ ਅਤੇ ਇਹ ਦੋਵੇਂ ਵੀਡੀਓਜ਼ 26 ਦਿਸੰਬਰ 2021 ਦੇ ਹਨ।"
"ਮਤਲਬ ਸਾਫ ਸੀ ਕਿ ਇਹ ਵੀਡੀਓ ਨਾ ਹੀ 5 ਜਨਵਰੀ 2022 ਦਾ ਹੈ ਅਤੇ ਨਾ ਹੀ ਫਤਹਿਗੜ੍ਹ ਸਾਹਿਬ ਜਾਣ ਵਾਲੇ ਕਿਸੇ ਜੱਥੇ ਦਾ"
ਨਤੀਜਾ- ਰੋਜ਼ਾਨਾ ਸਪੋਕਸਮੈਨ ਨੇ ਆਪਣੀ ਪੜਤਾਲ ਵਿਚ ਪਾਇਆ ਕਿ ਵਾਇਰਲ ਹੋ ਰਿਹਾ ਵੀਡੀਓ 5 ਜਨਵਰੀ 2022 ਨਹੀਂ ਸਗੋਂ 26 ਦਿਸੰਬਰ 2021 ਦਾ ਹੈ। ਵੀਡੀਓ ਵਿਚ ਦਿੱਸ ਰਿਹਾ ਮਾਰਚ ਬਹਿਬਲ ਕਲਾਂ ਗੋਲੀਕਾਂਡ ਦੇ ਇਨਸਾਫ ਲਈ ਕੱਢਿਆ ਗਿਆ ਸੀ।
Claim- Protesters who blocked PM's Convoy Raised Slogans Of Khalistan Zindabad
Claimed By- Twitter Account Narendra Modi fan
Fact Check- Fake
ਡਿਸਕਲੇਮਰ: ਇਸ ਰਿਪੋਰਟ ਵਿਚ ਕੁਝ ਤੱਥਾਂ ਨੂੰ ਅਪਡੇਟ ਕੀਤਾ ਗਿਆ ਹੈ। ਰਿਪੋਰਟ ਅਪਡੇਟ ਕਰਨ ਦੀ ਪ੍ਰਕਿਰਿਆ SOP ਦੇ ਅਨੁਸਾਰ ਹੀ ਹੈ। ਇਸ ਅਪਡੇਟ ਤੋਂ ਇਸ ਰਿਪੋਰਟ ਦੇ ਨਤੀਜੇ ਵਿਚ ਕੋਈ ਬਦਲਾਅ ਨਹੀਂ ਹੋਇਆ ਹੈ।
