ਚੰਡੀਗੜ੍ਹ, 25 ਅਕਤੂਬਰ (ਤਰੁਣ ਭਜਨੀ): ਪੰਜਾਬ ਦੀ ਮਸ਼ਹੂਰ ਮਠਿਆਈ ਦੀ ਦੁਕਾਨ ਅਤੇ ਰੈਸਟੋਰੈਂਟ ਗੋਪਾਲ ਸਵੀਟਸ 'ਤੇ ਬੁਧਵਾਰ ਨੂੰ ਆਮਦਨ ਕਰ ਵਿਭਾਗ ਨੇ ਛਾਪਾ ਮਾਰਿਆ। ਸੱਭ ਤੋਂ ਪਹਿਲਾਂ ਪਟਿਆਲਾ ਵਿਚ ਛਾਪੇਮਾਰੀ ਹੋਈ। ਇਸ ਤੋਂ ਬਾਅਦ ਚੰਡੀਗੜ੍ਹ ਅਤੇ ਪੰਚਕੂਲਾ ਵਿਚ ਛਾਪਾ ਮਾਰਿਆ ਗਿਆ। ਦਸਿਆ ਜਾ ਰਿਹਾ ਹੈ ਕਿ ਗੋਪਾਲ ਸਵੀਟਸ ਦੀਆਂ 19 ਸ਼ਾਖ਼ਾਵਾਂ 'ਤੇ ਇਹ ਛਾਪਾ ਮਾਰਿਆ ਗਿਆ ਹੈ। ਵਿਭਾਗ ਦੀ ਟੀਮ ਨੇ ਸਾਰੀਆਂ ਥਾਵਾਂ 'ਤੇ ਦਸਤਾਵੇਜ਼ਾਂ ਦੀ ਜਾਂਚ ਕੀਤੀ। ਚੰਡੀਗੜ੍ਹ ਵਿਚ ਸ਼ਾਮ ਤਕ ਆਮਦਨ ਕਰ ਵਿਭਾਗ ਦੀ ਟੀਮ ਵਲੋਂ ਦੁਕਾਨ ਬੰਦ ਕਰਵਾ ਕੇ ਜਾਂਚ ਜਾਰੀ ਸੀ।

ਜਾਣਕਾਰੀ ਮੁਤਾਬਕ ਬੁਧਵਾਰ ਨੂੰ ਦਿੱਲੀ ਤੋਂ ਆਮਦਨ ਕਰ ਵਿਭਾਗ ਦੇ ਅਧਿਕਾਰੀਆਂ ਦੀ ਇਕ ਟੀਮ ਪਟਿਆਲਾ ਪੁੱਜੀ। ਇਥੇ ਟੀਮ ਨੇ ਗੋਪਾਲ ਸਵੀਟਸ ਦੀਆਂ ਸਾਰੀਆਂ ਸ਼ਾਖ਼ਾਵਾਂ ਵਿਚ ਛਾਪਾ ਮਾਰਿਆ। ਇਨ੍ਹਾਂ ਵਿਚ ਅਰਬਨ ਅਸਟੇਟ, ਲੀਲਾ ਭਵਨ ਅਤੇ ਫੁਆਰਾ ਚੌਕ ਸ਼ਾਮਲ ਹਨ। ਇਸੇ ਤਰ੍ਹਾਂ ਚੰਡੀਗੜ੍ਹ ਸੈਕਟਰ-8, 35 ਅਤੇ 15 ਵਿਚ ਅਧਿਕਾਰੀਆਂ ਨੇ ਗੋਪਾਲ ਸਵੀਟਸ ਦੇ ਰੀਕਾਰਡ ਦੀ ਜਾਂਚ ਕੀਤੀ। ਚੰਡੀਗੜ੍ਹ ਤੋਂ ਬਾਅਦ ਪੰਚਕੂਲਾ ਵਿਚ ਵੀ ਆਮਦਨ ਕਰ ਵਿਭਾਗ ਦੀ ਟੀਮ ਵਲੋਂ ਗੋਪਾਲ ਸਵੀਟਸ ਤੇ ਛਾਪੇਮਾਰੀ ਹੋਈ। ਇਸ ਦੌਰਾਨ ਕਿਸੇ ਨੂੰ ਅੰਦਰ ਦਾਖ਼ਲ ਨਹੀ ਹੋਣ ਦਿਤਾ ਗਿਆ। ਸੂਤਰਾਂ ਅਨੁਸਾਰ ਚੰਡੀਗੜ੍ਹ ਆਮਦਨ ਕਰ ਵਿਭਾਗ ਦੀ ਟੀਮ ਵੀ ਦਿੱਲੀ ਤੋਂ ਆਈ ਟੀਮ ਦਾ ਸਹਿਯੋਗ ਕਰ ਰਹੀ ਹੈ।