ਗੁਹਾਟੀ, 23 ਨਵੰਬਰ : ਆਸਾਮ ਦੇ ਸਿਹਤ ਮੰਤਰੀ ਹੇਮੰਤ ਬਿਸਵਾ ਸਰਮਾ ਨੇ ਕਿਹਾ ਹੈ ਕਿ ਕੈਂਸਰ ਜਿਹੀ ਮਾਰੂ ਬੀਮਾਰੀ ਪਿਛਲੇ ਜਨਮ ਦੇ ਕਰਮਾਂ ਦਾ ਨਤੀਜਾ ਹੈ। ਉਨ੍ਹਾਂ ਕਿਹਾ, 'ਇਹ ਰੱਬੀ ਨਿਆਂ ਹੈ। ਰੱਬੀ ਨਿਆਂ ਹੋ ਕੇ ਰਹਿੰਦਾ ਹੈ। ਕੋਈ ਇਸ ਤੋਂ ਬਚ ਨਹੀਂ ਸਕਦਾ।'ਹੇਮੰਤ ਨੇ ਕਿਹਾ ਕਿ ਇਹ ਜ਼ਰੂਰੀ ਨਹੀਂ ਕਿ ਗ਼ਲਤੀ ਅਸੀਂ ਹੀ ਕਰੀਏ, ਕਈ ਵਾਰ ਮਾਤਾ ਪਿਤਾ ਵੀ ਗ਼ਲਤੀ ਕਰ ਜਾਂਦੇ ਹਨ ਜਿਸ ਦੀ ਸਜ਼ਾ ਬੱਚਿਆਂ ਨੂੰ ਭੁਗਤਣੀ ਪੈਂਦੀ ਹੈ। ਸਿਹਤ ਮੰਤਰੀ ਨੇ ਕਿਹਾ ਕਿ ਕੈਂਸਰ ਹੋਣਾ ਅਤੇ ਐਕਸੀਡੈਂਟ ਹੋਣਾ ਪਿਛਲੇ ਜਨਮ ਦੇ ਕਰਮਾਂ ਦਾ ਨਤੀਜਾ ਹੈ। 

ਹੇਮੰਤ ਦੇ ਬਿਆਨ ਦੀ ਤਿੱਖੀ ਨਿਖੇਧੀ ਹੋ ਰਹੀ ਹੈ। ਕਾਂਗਰਸ ਆਗੂ ਪੀ ਚਿਦੰਬਰਮ ਨੇ ਕਿਹਾ, 'ਹੇਮੰਤ ਨੇ ਕਿਹਾ ਹੈ ਕਿ ਕੈਂਸਰ ਪਿਛਲੇ ਜਨਮ ਦੇ ਕਰਮਾਂ ਦਾ ਨਤੀਜਾ ਹੈ। ਇਕ ਬੰਦੇ 'ਤੇ ਪਾਰਟੀ ਬਦਲਣ ਦਾ ਕੀ ਇਹ ਅਸਰ ਹੁੰਦਾ ਹੈ? ਹੇਮੰਤ ਪਹਿਲਾਂ ਕਾਂਗਰਸ ਵਿਚ ਸੀ ਅਤੇ ਫਿਰ ਭਾਜਪਾ ਵਿਚ ਸ਼ਾਮਲ ਹੋ ਗਿਆ। ਚਿਦੰਬਰਮ ਦੀ ਗੱਲ ਦਾ ਜਵਾਬ ਦਿੰਦਿਆਂ ਹੇਮੰਤ ਨੇ ਕਿਹਾ, 'ਸਰ ਪਲੀਜ਼, ਬਿਆਨ ਨੂੰ ਤੋੜੋ-ਮਰੋੜੋ ਨਾ। ਹਿੰਦੂ ਧਰਮ ਕਰਮ ਦੇ ਆਧਾਰ 'ਤੇ ਫੱਲ 'ਤੇ ਯਕੀਨ ਕਰਦਾ ਹੈ ਅਤੇ ਮਨੁੱਖ ਨੂੰ ਦੁੱਖ ਬੁਰੇ ਕਰਮਾਂ ਕਰ ਕੇ ਮਿਲਦਾ ਹੈ। ਕੀ ਤੁਸੀਂ ਇਸ 'ਤੇ ਯਕੀਨ ਨਹੀਂ ਕਰਦੇ? ਮੈਨੂੰ ਨਹੀਂ ਪਤਾ ਕਿ ਤੁਹਾਡੀ ਪਾਰਟੀ ਵਿਚ ਹਿੰਦੂ ਦਰਸ਼ਨ ਬਾਰੇ ਚਰਚਾ ਹੁੰਦੀ ਵੀ ਹੈ ਜਾਂ ਨਹੀਂ।'  (ਏਜੰਸੀ)