5551 ਕਰੋੜ ਰੁਪਏ ਦਾ ਫ਼ੇਮਾ ਉਲੰਘਣ ਮਾਮਲਾ
ਨਵੀਂ ਦਿੱਲੀ: ਇਨਫ਼ੋਰਸਮੈਂਟ ਡਾਇਰੈਕਟੋਰੇਟ ਨੇ 5551 ਕਰੋੜ ਰੁਪਏ ਦੇ ਕਥਿਤ ਵਿਦੇਸ਼ੀ ਵਟਾਂਦਰਾ ਉਲੰਘਣਾ (ਫ਼ੇਮਾ) ਮਾਮਲੇ ’ਚ ਸ਼ਾਓਮੀ ਟੈਕਨਾਲੋਜੀਜ਼ ਇੰਡੀਆ, ਉਸ ਦੇ ਸੀ.ਐਫ਼.ਓ. ਸਮੀਰ ਰਾਓ, ਸਾਬਕਾ ਐਮ.ਡੀ. ਮਨੁ ਜੈਨ ਅਤੇ ਤਿੰਨ ਵਿਦੇਸ਼ੀ ਬੈਂਕਾਂ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਹੈ।
ਵਿਦੇਸ਼ੀ ਵਟਾਂਦਰਾ ਪ੍ਰਬੰਧਨ ਐਕਟ ਹੇਠ ਨਿਪਟਾਰਾ ਕਰਨ ਵਾਲੀ ਅਥਾਰਟੀ ਨੇ ਸ਼ਾਓਮੀ ਟੈਕਨਾਲੋਜੀਜ਼ ਇੰਡੀਆ ਪ੍ਰਾਈਵੇਟ ਲਿਮਟਡ, ਇਸ ਦੇ ਦੋ ਕਾਰਜਕਾਰੀਆਂ, ਸਿਟੀ ਬੈਂਕ, ਐਚ.ਐਸ.ਬੀ.ਸੀ. ਬੈਂਕ ਅਤੇ ਡਾਊਸ਼ੇ ਬੈਂਕ ਏ.ਜੀ. ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤੇ ਹਨ।
ਕੇਂਦਰੀ ਜਾਂਚ ਏਜੰਸੀ ਨੇ ਵਿਦੇਸ਼ਾਂ ’ਚ ਰਾਇਲਿਟੀ ਅਦਾ ਕਰਨ ਦੇ ਬਹਾਨੇ ‘ਅਣਅਧਿਕਾਰਤ’ ਤੌਰ ’ਤੇ ਭਿਜਵਾਏ ਸ਼ਾਓਮੀ ਟੈਕਨਾਲੋਜੀਜ਼ ਇੰਡੀਆ ਪ੍ਰਾ. ਲਿਮ. ਦੇ 5551.27 ਕਰੋੜ ਰੁਪਏ ਦੇ ਫ਼ੰਡ ਜ਼ਬਤ ਕਰ ਲਏ ਹਨ ਜੋ ਕਿ ਇਸ ਫ਼ੇਮਾ ਅਧੀਨ ਇਸ ਦੇ ਬੈਂਕ ਖਾਤਿਆਂ ’ਚ ਪਏ ਸਨ।
ਫ਼ੇਮਾ ਅਧੀਨ ਈ.ਡੀ. ਜਾਂਚ ਖ਼ਤਮ ਹੋਣ ਤੋਂ ਬਾਅਦ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਜਾਂਦਾ ਹੈ ਅਤੇ ਇਕ ਵਾਰੀ ਫੈਸਲਾ ਹੋਣ ਤੋਂ ਬਾਅਦ ਦੋਸ਼ੀ ਨੂੰ ਜੁਰਮਾਨਾ ਅਦਾ ਕਰਨਾ ਪੈਂਦਾ ਹੈ।