ਲੰਦਨ, 7 ਸਤੰਬਰ (ਹਰਜੀਤ
ਸਿੰਘ ਵਿਰਕ) : ਬ੍ਰਿਟੇਨ ਦੀ ਮਹਾਰਾਣੀ ਐਲੀਜ਼ਾਬੇਥ-2 ਦੇ ਪੜਪੋਤੇ ਪ੍ਰਿੰਸ ਜਾਰਜ ਨੇ
ਵੀਰਵਾਰ ਤੋਂ ਸਕੂਲ ਜਾਣਾ ਸ਼ੁਰੂ ਕਰ ਦਿਤਾ ਹੈ। ਉਹ ਪਹਿਲੇ ਦਿਨ ਅਪਣੇ ਪਿਤਾ ਪ੍ਰਿੰਸ
ਵਿਲੀਅਮ ਨਾਲ ਸਕੂਲ ਗਏ। ਇਸ ਅਹਿਮ ਮੌਕੇ ਉਨ੍ਹਾਂ ਦੀ ਮਾਂ ਕੇਟ ਮਿਡਲਟਨ ਨਾਲ ਨਹੀਂ ਜਾ
ਸਕੀ, ਕਿਉਂਕਿ ਉਹ ਇਸ ਸਮੇਂ ਗਰਭਵਤੀ ਹੈ।
ਦੱਸਣਯੋਗ ਹੈ ਕਿ ਕੇਨਸਗਿੰਟਨ ਪੈਲੇਸ ਵਲੋਂ
ਬੀਤੇ ਸੋਮਵਾਰ ਨੂੰ ਐਲਾਨ ਹੋਇਆ ਸੀ ਕਿ 35 ਸਾਲਾ ਕੇਟ ਫਿਰ ਤੋਂ ਮਾਂ ਬਣਨ ਵਾਲੀ ਹੈ।
ਪ੍ਰਿੰਸ ਵਿਲੀਅਮ ਅਪਣੇ ਘਰ ਕੇਨਸਗਿੰਟਨ ਪੈਲੇਸ ਤੋਂ 4 ਸਾਲ ਦੇ ਜਾਰਜ ਨੂੰ ਲੈ ਕੇ ਦਖਣੀ
ਪਛਮੀ ਲੰਦਨ ਸਥਿਤ ਥਾਮਸ ਬੈਟਰਸੀ ਸਕੂਲ ਪਹੁੰਚੇ। ਪ੍ਰਿੰਸ ਜਾਰਜ ਪਹਿਲੇ ਦਿਨ ਥੋੜਾ
ਘਬਰਾਉਂਦੇ ਹੋਏ ਅਤੇ ਪਿਤਾ ਦਾ ਹੱਥ ਫੜ ਕੇ ਸਕੂਲ ਜਾਂਦੇ ਨਜ਼ਰ ਆਏ। ਉਨ੍ਹਾਂ ਨੇ ਡੂੰਘੇ
ਨੀਲੇ ਰੰਗ ਦੀ ਸਕੂਲ ਯੂਨੀਫਾਰਮ ਪਹਿਨੀ ਹੋਈ ਸੀ। ਜ਼ਿਕਰਯੋਗ ਹੈ ਕਿ ਪ੍ਰਿੰਸ ਜਾਰਜ ਸ਼ਾਹੀ
ਗੱਦੀ ਦੇ ਉੱਤਰਾਧਿਕਾਰੀ ਦੀ ਕਤਾਰ ਵਿਚ ਤੀਜੇ ਨੰਬਰ 'ਤੇ ਹਨ। ਉਹ ਪ੍ਰਿੰਸ ਵਿਲੀਅਮ ਅਤੇ
ਕੇਟ ਦੀ ਪਹਿਲੀ ਔਲਾਦ ਹੈ। ਜਾਰਜ ਦੀ ਛੋਟੀ ਭੈਣ ਪ੍ਰਿੰਸਜ਼ ਚਾਰਲੋਟ ਹੈ।