ਮਨੀਲਾ, 19 ਦਸੰਬਰ : ਮੱਧ ਫ਼ਲੀਪੀਨਜ਼ ਵਿਚ ਤਬਾਹੀ ਮਚਾਉਣ ਵਾਲੇ ਟ੍ਰੋਪੀਕਲ ਤੂਫ਼ਾਨ 'ਚ ਮਰਨ ਵਾਲਿਆਂ ਦੀ ਗਿਣਤੀ 43 ਹੋ ਗਈ ਹੈ।
ਅਧਿਕਾਰੀਆਂ ਨੇ ਦਸਿਆ ਕਿ ਤੂਫ਼ਾਨ ਦੌਰਾਨ ਹੋਈ ਬਾਰਿਸ਼ ਕਾਰਨ ਜ਼ਮੀਨ ਖਿਸਕਣ ਕਰ ਕੇ ਕਈ ਲੋਕ ਲਾਪਤਾ ਹੋਏ ਅਤੇ ਲਾਪਤਾ ਲੋਕਾਂ ਦੀ ਭਾਲ ਦੀ ਉਮੀਦ ਵੀ ਹੌਲੀ-ਹੌਲੀ ਘੱਟਦੀ ਜਾ ਰਹੀ ਹੈ। ਮੱਧਮ ਗਤੀ ਨਾਲ ਅੱਗੇ ਵੱਧ ਰਿਹਾ ਕਾਈ-ਟਕ ਤੂਫਾਨ ਸੋਮਵਾਰ ਨੂੰ ਇਥੋਂ ਦਖਣੀ ਚੀਨੀ ਸਮੁੰਦਰ ਵਲ ਵੱਧ ਗਿਆ। ਤੂਫ਼ਾਨ ਕਾਰਨ ਇਥੇ ਕਈ ਦਿਨਾਂ ਤਕ ਭਾਰੀ ਮੀਂਹ ਪਿਆ, ਜਿਸ ਨਾਲ ਭਿਆਨਕ ਹੜ੍ਹ ਅਤੇ ਜ਼ਮੀਨ ਖਿਸਕਣ ਦੀਆਂ ਖ਼ਬਰਾਂ ਸਾਹਮਣੇ ਆਈਆਂ ਹਨ। ਸਰਕਾਰ ਦੀ ਐਮਰਜੈਂਸੀ ਨਿਰੀਖਕ ਏਜੰਸੀ ਨੇ ਤਾਜ਼ਾ ਅੰਕੜਿਆਂ ਵਿਚ ਮ੍ਰਿਤਕਾਂ ਦੀ ਗਿਣਤੀ 43 ਦੱਸੀ ਹੈ ਅਤੇ ਕਿਹਾ ਹੈ ਕਿ 45 ਹੋਰ ਲੋਕ ਅਜੇ ਵੀ ਲਾਪਤਾ ਹਨ। ਇਨ੍ਹਾਂ 'ਚ ਕਈਆਂ ਦੇ ਮਿੱਟੀ ਦੇ ਢੇਰ ਹੇਠਾਂ ਦੱਬੇ ਹੋਣ ਦਾ ਖ਼ਦਸ਼ਾ ਪ੍ਰਗਟਾਇਆ ਹੈ। ਐਮਰਜੈਂਸੀ ਨਿਰੀਖਕ ਅਧਿਕਾਰੀ ਸੋਫਰੋਨੀਓ ਡਾਸਿਲੋ ਨੇ ਏ.ਐਫ.ਪੀ. ਨੂੰ ਫੋਨ 'ਤੇ ਦਸਿਆ ਕਿ ਬਚਾਅ ਕਾਰਜ ਅਜੇ ਵੀ ਜਾਰੀ ਹਨ, ਪਰ ਸਾਨੂੰ ਕੋਈ ਵੀ ਵਿਅਕਤੀ ਜੀਵਤ ਨਹੀਂ ਮਿਲ ਰਿਹਾ ਹੈ। ਸਾਨੂੰ ਸਿਰਫ ਲਾਸ਼ਾਂ ਹੀ ਮਿਲ ਰਹੀਆਂ ਹਨ। (ਪੀਟੀਆਈ)
