ਤਾਈਪੈ, 10 ਫ਼ਰਵਰੀ : ਤਾਈਵਾਨ 'ਚ ਭੂਚਾਲ ਕਾਰਨ ਡਿੱਗੇ ਹੋਟਲ ਵਿਚ ਖ਼ੋਜ ਅਤੇ ਬਚਾਅ ਮੁਲਾਜ਼ਮਾਂ ਨੂੰ ਦੋ ਹੋਰ ਲੋਕਾਂ ਦੀਆਂ ਲਾਸ਼ਾਂ ਮਿਲੀਆਂ ਹਨ, ਜੋ ਇਕ ਚੀਨੀ ਪਰਵਾਰ ਦੇ ਸਨ। ਤਾਈਵਾਨ ਸੈਂਟਰਲ ਐਮਰਜੈਂਸੀ ਆਪ੍ਰੇਸ਼ਨ ਸੈਂਟਰ ਨੇ ਦਸਿਆ ਕਿ ਬਚਾਅ ਮੁਲਾਜ਼ਮਾਂ ਨੂੰ ਇਮਾਰਤ ਦੇ ਮਲਬੇ 'ਚੋਂ ਦੋ ਲਾਸ਼ਾਂ ਮਿਲੀਆਂ ਹਨ। ਇਨ੍ਹਾਂ ਦੀ ਪਛਾਣ ਨਹੀਂ ਹੋਈ ਹੈ, ਪਰ ਤਾਈਵਾਨ ਦੀ ਸਰਕਾਰੀ ਮੀਡੀਆ ਨੇ ਦਸਿਆ ਕਿ ਇਹ ਦੋਵੇਂ ਚੀਨੀ ਮੁਸਾਫ਼ਰਾਂ ਦੇ ਇਕ ਪਰਵਾਰ ਦੇ ਮੈਂਬਰ ਲਗਦੇ ਹਨ। ਜ਼ਿਕਰਯੋਗ ਹੈ ਕਿ ਬੀਤੀ 6 ਫ਼ਰਵਰੀ ਨੂੰ ਤਾਈਵਾਨ ਦੇ
ਪ੍ਰਸਿੱਧ ਸੈਰ-ਸਰਾਟਾ ਕੇਂਦਰ ਹੁਆਲਿਨ ਕਾਊਂਟੀ ਦੇ ਪ੍ਰਸ਼ਾਂਤ ਮਹਾਸਾਗਰ ਵਾਲੇ ਤਟ 'ਤੇ 6.4 ਤੀਬਰਤਾ ਦਾ ਭੂਚਾਲ ਆਇਆ ਸੀ। ਉਸ ਲਾਪਤਾ ਚੀਨੀ ਪਰਵਾਰ 'ਚ ਇਕ ਜੋੜਾ, ਉਸ ਦਾ 12 ਸਾਲਾ ਬੇਟਾ ਅਤੇ ਦਾਦਾ-ਦਾਦੀ ਸ਼ਾਮਲ ਸਨ। ਅੱਜ ਇਹ ਦੋਵੇਂ ਲਾਸ਼ਾਂ ਮਿਲਣ ਮਗਰੋਂ ਮ੍ਰਿਤਕਾਂ ਦੀ ਗਿਣਤੀ 14 ਹੋ ਗਈ ਹੈ। ਇਸ ਭੂਚਾਲ 'ਚ 280 ਲੋਕ ਜ਼ਖ਼ਮੀ ਹੋਏ ਸਨ। ਤਿੰਨ ਲੋਕ ਹਾਲੇ ਵੀ ਲਾਪਤਾ ਹਨ। (ਪੀਟੀਆਈ)
