ਕੇਰਲ ਸਰਕਾਰ ਨੇ 26 ਸਾਲ ਦੇ ਉਸ ਨੌਜਵਾਨ ਦੇ ਪਰਵਾਰ ਨੂੰ 10 ਲੱਖ ਰੁਪਏ ਦੀ ਵਿੱਤੀ ਸਹਾਇਤਾ ਦੇਣ ਦਾ ਫ਼ੈਸਲਾ ਲਿਆ ਜਿਸ ਦੀ ਪਿਛਲੇ ਮਹੀਨੇ ਹਿਰਾਸਤ ਦੌਰਾਨ ਮੌਤ ਹੋ ਗਈ ਸੀ...
ਤਿਰੁਵਨੰਤਪੁਰਮ, 2 ਮਈ : ਕੇਰਲ ਸਰਕਾਰ ਨੇ 26 ਸਾਲ ਦੇ ਉਸ ਨੌਜਵਾਨ ਦੇ ਪਰਵਾਰ ਨੂੰ 10 ਲੱਖ ਰੁਪਏ ਦੀ ਵਿਤੀ ਸਹਾਇਤਾ ਦੇਣ ਦਾ ਫ਼ੈਸਲਾ ਲਿਆ ਜਿਸ ਦੀ ਪਿਛਲੇ ਮਹੀਨੇ ਹਿਰਾਸਤ ਦੌਰਾਨ ਮੌਤ ਹੋ ਗਈ ਸੀ।
ਇਸ ਮਾਮਲੇ ਨੂੰ ਲੈ ਕੇ ਸੂਬਾ ਪੁਲਿਸ ਵਿਰੁਧ ਵੱਡੇ ਪੱਧਰ 'ਤੇ ਪ੍ਰਦਰਸ਼ਨ ਹੋਏ ਸਨ। ਮੁੱਖ ਮੰਤਰੀ ਪਿਨਰਾਈ ਵਿਅਜਨ ਦੀ ਪ੍ਰਧਾਨਤਾ 'ਚ ਹੋਈ ਮੰਤਰੀਆਂ ਦੀ ਬੈਠਕ ਵਿਚ ਇਹ ਫ਼ੈਸਲਾ ਲਿਆ ਗਿਆ ਅਤੇ ਨਾਲ ਹੀ ਨੌਜਵਾਨ ਐਸ ਆਰ ਸ਼੍ਰੀਜੀਤ ਦੀ ਪਤਨੀ ਨੂੰ ਉਸ ਦੀ ਯੋਗਤਾ ਮੁਤਾਬਕ ਸਰਕਾਰੀ ਨੌਕਰੀ ਦੀ ਮੰਗ ਕਰਨ ਦਾ ਫ਼ੈਸਲਾ ਵੀ ਲਿਆ ਗਿਆ।
ਇਸ ਫ਼ੈਸਲੇ ਬਾਰੇ ਇਕ ਆਧਿਕਾਰਕ ਬਿਆਨ 'ਚ ਕਿਹਾ ਗਿਆ ਕਿ ਮੁੱਖ ਮੰਤਰੀ ਰਾਹਤ ਕੋਸ਼ ਤੋਂ 10 ਲੱਖ ਰੁਪਏ ਦੀ ਵਿਤੀ ਸਹਾਇਤਾ ਦਿਤੀ ਜਾਵੇਗੀ। ਬਾਅਦ 'ਚ ਇਹ ਰਾਸ਼ੀ ਸ਼੍ਰੀਜੀਤ ਦੀ ਮੌਤ ਲਈ ਜ਼ਿੰਮੇਵਾਰ ਪੁਲਿਸ ਕਰਮਚਾਰੀਆਂ ਤੋਂ ਵਸੂਲ ਕੀਤੀ ਜਾਵੇਗੀ। ਸ਼੍ਰੀਜੀਤ ਨੂੰ 55 ਸਾਲ ਦੇ ਇਕ ਵਿਅਕਤੀ ਦੀ ਮੌਤ ਦੇ ਮਾਮਲੇ 'ਚ ਹਿਰਾਸਤ ਵਿਚ ਲਿਆ ਗਿਆ ਸੀ ਅਤੇ ਨੌਂ ਅਪ੍ਰੈਲ ਨੂੰ ਇਕ ਨਿਜੀ ਹਸਪਤਾਲ 'ਚ ਉਸ ਦੀ ਮੌਤ ਹੋ ਗਈ ਸੀ।
ਉਸ ਦੇ ਰਿਸ਼ਤੇਦਾਰਾਂ ਨੇ ਦੋਸ਼ ਲਾਇਆ ਕਿ ਹਿਰਾਸਤ ਵਿਚ ਤਸੀਹੇ ਕਾਰਨ ਸ਼੍ਰੀਜੀਤ ਦੀ ਮੌਤ ਹੋ ਗਈ ਸੀ। ਹਾਲਾਂਕਿ, ਪੁਲਿਸ ਨੇ ਇਹਨਾਂ ਦੋਸ਼ਾਂ ਨੂੰ ਖ਼ਾਰਜ ਕਰਦੇ ਹੋਏ ਕਿਹਾ ਕਿ ਅਜਿਹਾ ਸ਼ੱਕ ਹੈ ਕਿ ਸ਼੍ਰੀਜੀਤ ਨੂੰ ਹਿਰਾਸਤ 'ਚ ਲਿਜਾਉਣ ਤੋਂ ਪਹਿਲਾਂ ਇਕ ਝਗੜੇ ਦੌਰਾਨ ਸੱਟਾਂ ਲੱਗੀਆਂ ਸਨ। ਸ਼੍ਰੀਜੀਤ ਦੀ ਮੌਤ ਦੇ ਸਬੰਧ 'ਚ ਹੁਣ ਤਕ ਇਕ ਸਰਕਿਲ ਇੰਸਪੈਕਟਰ, ਸਭ ਇੰਸਪੈਕਟਰ ਅਤੇ ਪੇਂਡੂ ਟਾਈਗਰ ਫ਼ੋਰਸ ਦੇ ਤਿੰਨ ਮੈਬਰਾਂ ਸਮੇਤ ਛੇ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।