ਦੁਸ਼ਯੰਤ ਚੌਟਾਲਾ ਅਤੇ ਦਿਗਵਿਜੈ ਚੌਟਾਲਾ ਨੂੰ ਇਨੇਲੋ ਪਾਰਟੀ ਵਲੋਂ ਬਾਹਰ ਕੱਢ ਦਿਤਾ ਗਿਆ ਹੈ........
ਚੰਡੀਗੜ੍ਹ : ਦੁਸ਼ਯੰਤ ਚੌਟਾਲਾ ਅਤੇ ਦਿਗਵਿਜੈ ਚੌਟਾਲਾ ਨੂੰ ਇਨੇਲੋ ਪਾਰਟੀ ਵਲੋਂ ਬਾਹਰ ਕੱਢ ਦਿਤਾ ਗਿਆ ਹੈ। ਇਨੈਲੋ ਸੁਪ੍ਰੀਮੋ ਵਲੋਂ ਇਹ ਫ਼ੈਸਲਾ ਅੱਜ ਸ਼ਾਮੀ ਲਿਆ ਗਿਆ । ਇੰਡੀਅਨ ਨੈਸ਼ਨਲ ਲੋਕ ਦਲ (ਇਨੈਲੋ) ਦੇ ਪ੍ਰਧਾਨ ਚੌਧਰੀ ਓਮ ਪ੍ਰਕਾਸ਼ ਚੌਟਾਲਾ ਨੇ ਤੁਰਤ ਪ੍ਰਭਾਵ ਨਾਲ ਹਿਸਾਰ ਤੋਂ ਸੰਸਦ ਮੈਂਬਰ ਦੁਸ਼ਯੰਤ ਚੌਟਾਲਾ ਅਤੇ ਦਿਗਵਿਜੈ ਚੌਟਾਲਾ ਨੂੰ ਇਨੇਲੋ ਦੀ ਮੁਢਲੀ ਮੈਂਬਰਸ਼ਿਪ ਤੋਂ ਬਾਹਰ ਕਰ ਦਿਤਾ ਹੈ । ਉਨ੍ਹਾਂ ਨੇ ਦੁਸ਼ਯੰਤ ਚੌਟਾਲਾ ਨੂੰ ਪਾਰਲੀਮੈਂਟ ਵਿਚ ਪਾਰਟੀ ਦੀ ਸੰਸਦੀ ਸਮਿਤੀ ਦੀ ਅਗਵਾਈ ਤੋਂ ਵੀ ਹਟਾ ਦਿਤਾ ਹੈ।
ਦੁਸ਼ਯੰਤ ਚੌਟਾਲਾ ਅਤੇ ਦਿਗਵਿਜੈ ਸਿੰਘ ਦੋਹਾਂ ਉਤੇ ਹੀ 7 ਅਕਤੂਬਰ 2018 ਨੂੰ ਗੋਹਾਨਾ ਵਿੱਚ ਆਯੋਜਿਤ ਚੌਧਰੀ ਦੇਵੀ ਲਾਲ ਦੇ ਜਨਮ ਦਿਨ ਉਤਸਵ ਦੌਰਾਨ ਅਨੁਸ਼ਾਸਨਹੀਣਤਾ, ਹੁੜਦੰਗਬਾਜ਼ੀ ਅਤੇ ਪਾਰਟੀ ਅਗਵਾਈ ਵਿਰੁਧ ਅਸੰਤੋਸ਼ ਫੈਲਾਣ ਵਾਲੀ ਨਾਹਰੇਬਾਜ਼ੀ ਦੇ ਦੋਸ਼ ਲਗਾਏ ਗਏ ਸਨ । ਚੌਧਰੀ ਓਮ ਪ੍ਰਕਾਸ਼ ਚੌਟਾਲਾ ਨੇ ਪਾਰਟੀ ਦਫ਼ਤਰ ਨੂੰ ਸੂਚਿਤ ਕੀਤਾ ਹੈ ਕਿ ਅਸਲ ਵਿਚ ਇਸ ਮਾਮਲੇ ਵਿਚ ਉਨ੍ਹਾਂ ਨੂੰ ਕਿਸੇ ਵੀ ਬਾਹਰੀ ਪ੍ਰਮਾਣ ਦੀ ਲੋੜ ਨਹੀਂ ਸੀ ਕਿਉਂਕਿ ਉਹ ਆਪ ਉਸ ਉਤਸਵ ਵਿਚ ਮੌਜੂਦ ਸਨ ਤੇ ਉਨ੍ਹਾਂ ਨੇ ਅਨੁਸ਼ਾਸਨਹੀਣਤਾ ਅਤੇ ਹੁੜਦੰਗਬਾਜ਼ੀ ਦੀਆਂ ਘਟਨਾਵਾਂ ਆਪ ਦੇਖੀਆਂ
ਅਤੇ ਇਹ ਵੀ ਵੇਖਿਆ ਕਿ ਉਨ੍ਹਾਂ ਦੇ ਭਾਸ਼ਣ ਵਿਚ ਵੀ ਲਗਾਤਾਰ ਵਿਘਨ ਪਾਇਆ ਗਿਆ ਸੀ । ਪਰ ਫਿਰ ਵੀ ਉਨ੍ਹ੍ਹਾਂ ਨੇ ਇਸ ਪੂਰੇ ਮਾਮਲੇ ਨੂੰ ਅਨੁਸ਼ਾਸਨ ਕਾਰਵਾਈ ਸਮਿਤੀ ਦੇ ਸਪੁਰਦ ਕੀਤਾ ਸੀ ਜਿਸ ਤੋਂ ਬਾਅਦ ਸਮਿਤੀ ਇਸ ਸਿੱਟੇ ਉਤੇ ਪਹੁੰਚੀ ਕਿ ਦੋਵੇਂ ਦੋਸ਼ੀ ਹਨ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਇਹ ਵੇਖਦੇ ਹੋਏ ਕਿ ਦੋਵੇਂ ਉਨ੍ਹਾਂ ਦੇ ਅਪਣੇ ਪਰਵਾਰ ਦੇ ਹੀ ਮੈਂਬਰ ਹਨ। ਇਸ ਲਈ ਉਨ੍ਹਾਂ ਵਿਰੁਧ ਕੋਈ ਕਾਰਵਾਈ ਕਰਨਾ ਉਨ੍ਹਾਂ ਲਈ ਸੋਖਾ ਫ਼ੈਸਲਾ ਨਹੀਂ ਸੀ ।
ਪਰ ਉਹ ਪਿਤਾ ਚੌਧਰੀ ਦੇਵੀਲਾਲ ਦੇ ਸਿਧਾਂਤਾਂ ਤੇ ਆਦਰਸ਼ਾਂ ਦੀ ਪਾਲਣਾ ਕਰਦੇ ਰਹੇ ਹਨ ਅਤੇ ਜਨਨਾਇਕ ਦੀ ਤਰ੍ਹ੍ਹਾਂ ਹੀ ਉਹ ਵੀ ਇਹ ਮੰਨਦੇ ਹਨ ਕਿ ਪਾਰਟੀ ਕਿਸੇ ਵੀ ਵਿਅਕਤੀ ਵਿਸ਼ੇਸ਼ ਜਾਂ ਪਰਵਾਰ ਦੇ ਮੈਂਬਰ ਨਾਲੋਂ ਵੱਡੀ ਹੁੰਦੀ ਹੈ। ਉਨ੍ਹਾਂ ਕਿਹਾ ਕਿ ਉਹ ਇਸ ਮਾਮਲੇ ਵਿਚ ਅਨੁਸ਼ਾਸਨ ਕਾਰਵਾਈ ਸਮਿਤੀ ਦੀਆਂ ਸਿਫਾਰਸ਼ਾ ਨਾਲ ਸਹਿਮਤ ਹਨ ਤਾਂ ਹੀ ਉਨ੍ਹਾਂ ਨੇ ਪਾਰਟੀ ਦਫ਼ਤਰ ਨੂੰ ਇਹ ਹਦਾਇਤ ਦਿਤੀ ਕਿ ਉਨ੍ਹਾਂ ਦੇ ਪੋਤਰਿਆਂ ਨੂੰ ਪਾਰਟੀ ਵਿਚੋਂ ਕੱਢੇ ਜਾਣ ਦੇ ਫ਼ੈਸਲੇ ਨੂੰ ਤੁਰਤ ਪ੍ਰਭਾਵ ਵਲੋਂ ਲਾਗੂ ਕੀਤਾ ਜਾਵੇ ।