ਹਾਲਾਂਕਿ, ਲਗਭਗ 120 ਅਫਗਾਨ ਸਿੱਖ ਅਜੇ ਵੀ ਕੈਨੇਡੀਅਨ ਵੀਜ਼ਾ ਦੀ ਉਡੀਕ ਕਰ ਰਹੇ ਹਨ
Afghan Sikhs resettled in Canada : ਸਾਲ 2021 'ਚ ਤਾਲਿਬਾਨ ਦੇ ਅਫਗਾਨਿਸਤਾਨ 'ਤੇ ਕਬਜ਼ਾ ਕਰਨ ਤੋਂ ਬਾਅਦ ਕਈ ਅਫਗਾਨ ਸਿੱਖ ਭਾਰਤ ਭੱਜ ਆਏ ਸਨ ਪਰ ਹੁਣ ਉਨ੍ਹਾਂ ਵਿਚੋਂ ਲਗਭਗ ਦੋ ਤਿਹਾਈ (ਲਗਭਗ 230 ਵਿਅਕਤੀ) ਨਿੱਜੀ ਸਪਾਂਸਰਾਂ ਅਤੇ ਸਿੱਖ ਫਾਊਂਡੇਸ਼ਨਾਂ ਦੀ ਮਦਦ ਨਾਲ ਕੈਨੇਡਾ ਚਲੇ ਗਏ ਹਨ। ਇਹ ਸਪਾਂਸਰ ਪਹਿਲੇ ਸਾਲ ਲਈ ਵਿੱਤੀ ਸਹਾਇਤਾ, ਰਿਹਾਇਸ਼, ਕਰਿਆਨੇ ਅਤੇ ਸਿੱਖਿਆ ਪ੍ਰਦਾਨ ਕਰਦੇ ਹਨ।
‘ਦ ਪ੍ਰਿੰਟ’ ਵਲੋਂ ਜਾਰੀ ਇਕ ਰੀਪੋਰਟ ਅਨੁਸਾਰ ਦਿੱਲੀ ਵਿੱਚ ਖਾਲਸਾ ਦੀਵਾਨ ਵੈਲਫੇਅਰ ਸੁਸਾਇਟੀ ਇਨ੍ਹਾਂ ਯਤਨਾਂ ਵਿੱਚ ਤਾਲਮੇਲ ਕਰ ਰਹੀ ਹੈ। ਹਾਲਾਂਕਿ, ਲਗਭਗ 120 ਅਫਗਾਨ ਸਿੱਖ ਅਜੇ ਵੀ ਕੈਨੇਡੀਅਨ ਵੀਜ਼ਾ ਦੀ ਉਡੀਕ ਕਰ ਰਹੇ ਹਨ, ਜਿਨ੍ਹਾਂ ਵਿਚੋਂ 80 ਜਾਣ ਲਈ ਤਿਆਰ ਹਨ ਪਰ ਕੈਨੇਡੀਅਨ ਸਰਕਾਰ ਦੀ ਪ੍ਰਕਿਰਿਆ ਕਾਰਨ ਜਨਵਰੀ 2025 ਤੱਕ ਦੇਰੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਕੈਨੇਡਾ ਵਿੱਚ ਵੱਡੀ ਗਿਣਤੀ ਵਿੱਚ ਸਿੱਖ ਪ੍ਰਵਾਸੀ ਹਨ ਅਤੇ ਸ਼ਰਨਾਰਥੀਆਂ ਲਈ ਨਾਗਰਿਕਤਾ ਦਾ ਇੱਕ ਆਸਾਨ ਰਸਤਾ ਹੈ, ਜੋ ਇਸ ਨੂੰ ਇੱਕ ਆਕਰਸ਼ਕ ਵਿਕਲਪ ਬਣਾਉਂਦਾ ਹੈ। ਮਨਮੀਤ ਸਿੰਘ ਭੁੱਲਰ ਫਾਊਂਡੇਸ਼ਨ ਸਮੇਤ ਨਿੱਜੀ ਸਪਾਂਸਰਾਂ ਨੇ ਅਫਗਾਨ ਸਿੱਖਾਂ ਦੀ ਸਹਾਇਤਾ ਕਰਨ ਵਿੱਚ ਮਹੱਤਵਪੂਰਣ ਭੂਮਿਕਾ ਨਿਭਾਈ ਹੈ।
ਜ਼ਿਕਰਯੋਗ ਹੈ ਕਿ ਪਿਛਲੇ ਮਹੀਨਿਆਂ ’ਚ ਕੈਨੇਡਾ ਦੇ ਮੀਡੀਆ ’ਚ ਰੀਪੋਰਟਾਂ ਆਈਆਂ ਸਨ ਕਿ ਇਹ ਸਿੱਖ ਅਸਲ ’ਚ ਕੈਨੇਡਾ ਜਾਣਾ ਚਾਹੁੰਦੇ ਸਨ ਪਰ ਕੈਨੇਡੇਆਈ ਫ਼ੌਜ ਵਲੋਂ ਛੇਤੀ ਪ੍ਰਬੰਧ ਨਾ ਹੋਣ ਕਾਰਨ ਇਨ੍ਹਾਂ ਨੂੰ ਜਲਦਬਾਜ਼ੀ ’ਚ ਭਾਰਤ ਆਉਣ ਵਾਲੇ ਜਹਾਜ਼ ’ਚ ਚੜ੍ਹਨਾ ਪਿਆ।
