ਵਿੰਟੇਜ ਕਾਰ/ਬਾਈਕ ਰੈਲੀ ਨੂੰ ਦਿਤੀ ਹਰੀ ਝੰਡੀ
ਚੰਡੀਗੜ੍ਹ : ਰਾਜਪਾਲ ਬਨਵਾਰੀਲਾਲ ਪੁਰੋਹਿਤ ਨੇ ਚੰਡੀਗੜ੍ਹ ਦੇ ਸੈਕਟਰ-42 ਸਥਿਤ ਝੀਲ ਵਿਖੇ ਆਈਕੌਨਿਕ ਵੀਕ ਦਾ ਉਦਘਾਟਨ ਕੀਤਾ। ਪਹਿਲੇ ਦਿਨ ਜਿੱਥੇ ਆਈ.ਟੀ.ਬੀ.ਪੀ ਦੇ ਜਵਾਨਾਂ ਅਤੇ ਕੁੱਤਿਆਂ ਦੇ ਅਦਭੁਤ ਕਾਰਨਾਮੇ ਦੇਖ ਕੇ ਲੋਕ ਤਾੜੀਆਂ ਮਾਰਨ ਲਈ ਮਜਬੂਰ ਹੋ ਗਏ, ਉੱਥੇ ਹੀ ਵਿੰਟੇਜ ਕਾਰ ਰੈਲੀ, ਬਾਈਕ ਰੈਲੀ ਅਤੇ ਸੱਭਿਆਚਾਰਕ ਪ੍ਰੋਗਰਾਮ ਵੀ ਕਰਵਾਇਆ ਗਿਆ। ਅਜ਼ਾਦੀ ਦੇ ਅੰਮ੍ਰਿਤ ਮਹੋਤਸਵ ਤਹਿਤ ਕਰਵਾਏ ਜਾ ਰਹੇ ਇਸ ਹਫ਼ਤੇ ਵਿੱਚ 13 ਮਾਰਚ ਤੱਕ ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਪ੍ਰੋਗਰਾਮ ਕਰਵਾਏ ਜਾਣਗੇ।
ਉਦਘਾਟਨੀ ਸਮਾਗਮ ਵਿੱਚ ਪ੍ਰਬੰਧਕਾਂ ਨੇ ਕਿਹਾ ਕਿ ਅਜ਼ਾਦੀ ਦਾ ਅੰਮ੍ਰਿਤ ਮਹੋਤਸਵ ਦੇਸ਼ ਲਈ ਮਾਣ ਵਾਲੀ ਗੱਲ ਹੈ। ਇਹ ਚੰਗੇ ਸ਼ਾਸਨ ਦੇ ਸੁਪਨੇ ਦੀ ਪੂਰਤੀ ਦਾ ਤਿਉਹਾਰ ਹੈ ਅਤੇ ਵਿਸ਼ਵ ਸ਼ਾਂਤੀ ਅਤੇ ਵਿਕਾਸ ਦਾ ਤਿਉਹਾਰ ਹੈ। ਪ੍ਰੋਗਰਾਮ ਵਿੱਚ ITBP ਦੇ ਜਵਾਨਾਂ ਨੇ ਮੋਟਰਸਾਇਕਲ 'ਤੇ ਕਰਤੱਬ ਦਿਖਾਉਂਦੇ ਹੋਏ ਬਾਈਕ ਨੂੰ ਅੱਗ ਦੇ ਗੋਲੇ 'ਚੋਂ ਕੱਢ ਕੇ ਲੋਕਾਂ ਨੂੰ ਤਾੜੀਆਂ ਮਾਰਨ ਲਈ ਮਜਬੂਰ ਕਰ ਦਿੱਤਾ।
ਇਸ ਤੋਂ ਬਾਅਦ ਆਈਟੀਬੀਪੀ ਦੇ ਕੁੱਤਿਆਂ ਦੇ ਦਸਤੇ ਦੁਆਰਾ ਇੱਕ ਖੋਜ ਅਤੇ ਬਚਾਅ ਮੁਹਿੰਮ ਵੀ ਕੀਤੀ ਗਈ। ਔਰਤਾਂ ਨੂੰ ਸਵੈ-ਰੱਖਿਆ ਅਤੇ ਸਸ਼ਕਤ ਬਣਾਉਣ ਲਈ ਇੱਕ ਸਵੈ-ਰੱਖਿਆ ਸਿਖਲਾਈ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ। ਇਸ ਵਿੱਚ ਪੁਲਿਸ ਵੱਲੋਂ ਸਿਖਲਾਈ ਪ੍ਰਾਪਤ ਵਿਦਿਆਰਥਣਾਂ ਨੇ ਸਵੈ-ਰੱਖਿਆ ਦੀਆਂ ਵੱਖ-ਵੱਖ ਤਕਨੀਕਾਂ ਦਾ ਪ੍ਰਦਰਸ਼ਨ ਕੀਤਾ।
ਪ੍ਰਬੰਧਕਾਂ ਨੇ ਵਿਦਿਆਰਥਣਾਂ ਦੀ ਕਾਰਗੁਜ਼ਾਰੀ ਦੀ ਸ਼ਲਾਘਾ ਕਰਨ ਦੇ ਨਾਲ-ਨਾਲ ਵੱਧ ਤੋਂ ਵੱਧ ਔਰਤਾਂ ਨੂੰ ਅਜਿਹੇ ਸਮਾਗਮਾਂ ਵਿੱਚ ਭਾਗ ਲੈਣ ਲਈ ਪ੍ਰੇਰਿਤ ਕੀਤਾ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਔਰਤਾਂ ਦਾ ਆਤਮਵਿਸ਼ਵਾਸ ਵਧਦਾ ਹੈ।
ਪ੍ਰੋਗਰਾਮ ਵਿੱਚ ਲਾਈਟ ਐਂਡ ਸਾਊਂਡ ਸ਼ੋਅ ਨੇ ਵੀ ਲੋਕਾਂ ਦਾ ਮਨ ਮੋਹ ਲਿਆ। ਇਸ ਵਿੱਚ ਰੰਗੀਨ ਵਿਜ਼ੂਅਲ ਪੇਸ਼ਕਾਰੀਆਂ, ਅਤਿ-ਆਧੁਨਿਕ ਲੇਜ਼ਰ ਟੈਕਨਾਲੋਜੀ ਅਤੇ ਵੌਇਸ-ਓਵਰ ਦਾ ਇੱਕ ਸੁਮੇਲ ਦਿਖਾਇਆ ਗਿਆ। ਦੁਬਈ ਤੋਂ ਆਏ ਕਲਾਕਾਰਾਂ ਅਤੇ ਰੁਦਰਾਕਸ਼ ਬੈਂਡ ਨੇ ਸੰਗੀਤਕ ਸ਼ਾਮ ਨੂੰ ਹੋਰ ਵੀ ਮਨੋਰੰਜਨ ਭਰਪੂਰ ਬਣਾ ਦਿਤਾ।
ਵਾਤਾਵਰਣ ਵਿਭਾਗ ਵੱਲੋਂ ਸੋਮਵਾਰ ਨੂੰ ਜੰਗਲਾਤ ਸੈਰ ਸਪਾਟਾ, ਲੀ ਕਾਰਬੁਜ਼ੀਅਰ ਸੈਂਟਰ ਵਿਖੇ ਵਰਕਸ਼ਾਪ, ਅੰਡਰਪਾਸ ਸੈਕਟਰ 17 ਵਿਖੇ ਵਰਕਸ਼ਾਪ, ਕਵੀ ਸੰਮੇਲਨ ਅਤੇ ਲਾਈਟ ਐਂਡ ਸਾਊਂਡ ਸ਼ੋਅ ਦਾ ਆਯੋਜਨ ਕੀਤਾ ਜਾਵੇਗਾ।
ਇਸ ਮੌਕੇ ਗ੍ਰਹਿ ਸਕੱਤਰ ਨਿਤਿਨ ਯਾਦਵ, ਕਮਿਸ਼ਨਰ ਨਗਰ ਨਿਗਮ ਸ਼੍ਰੀਮਤੀ ਅਨਿੰਦਿਤਾ ਮਿੱਤਰਾਸ, ਸਕੱਤਰ ਸੱਭਿਆਚਾਰ ਵਿਨੋਦ ਪੀ ਕਾਵਲੇ, ਡਿਪਟੀ ਕਮਿਸ਼ਨਰ ਵਿਨੈ ਪ੍ਰਤਾਪ ਸਿੰਘ, ਡੀਆਈਜੀ ਚੰਡੀਗੜ੍ਹ ਓਮਵੀਰ ਸਿੰਘ ਬਿਸ਼ਨੋਈ, ਆਈਜੀ (ਆਈਟੀਬੀਪੀ) ਸ੍ਰੀ ਈਸ਼ਵਰ ਸਿੰਘ ਦੁਹਾਨਅਤੇ ਚੰਡੀਗੜ੍ਹ ਪ੍ਰਸ਼ਾਸਨ ਦੇ ਹੋਰ ਸੀਨੀਅਰ ਅਧਿਕਾਰੀ ਵੀ ਮੌਜੂਦ ਸਨ।