ਦਿੱਲੀ 'ਚ ਕੋਰੋਨਾ ਮਰੀਜ਼ਾਂ ਦੀ ਤਾਦਾਦ 523 ਹੋਈ
24 ਘੰਟਿਆਂ 'ਚ 20 ਨਵੇਂ ਮਾਮਲੇ ਆਏ ਤੇ 18 ਮਰੀਜ਼ ਠੀਕ ਵੀ ਹੋਏ
ਅਸੀਂ 1 ਲੱਖ ਟੈਸਟਿੰਗ ਕਿੱਟਾਂ ਦਾ ਆਰਡਰ ਦਿਤੈ, ਜੋ ਸ਼ੁਕਰਵਾਰ ਤਕ ਪੁੱਜੇਗਾ : ਕੇਜਰੀਵਾਲ
ਨਵੀਂ ਦਿੱਲੀ, 6 ਅਪ੍ਰੈਲ (ਅਮਨਦੀਪ ਸਿੰਘ) : ਕੌਮੀ ਰਾਜਧਾਨੀ ਦਿੱਲੀ ਵਿਚ ਪਿਛਲੇ ਤਿੰਨ ਦਿਨਾਂ ਵਿਚ ਕੋਰੋਨਾ ਵਾਇਰਸ ਦੇ ਮਰੀਜ਼ਾਂ ਦੀ ਤਾਦਾਦ ਵਿਚ ਵਾਧਾ ਹੋ ਗਿਆ ਹੈ। 24 ਘੰਟਿਆਂ ਵਿਚ ਹੀ ਦਿੱਲੀ 'ਚ 20 ਨਵੇਂ ਮਾਮਲੇ ਸਾਹਮਣੇ ਆਏ ਹਨ। ਹੁਣ ਕਰੋਨਾ ਦੇ 523 ਮਰੀਜ਼ ਹੋ ਗਏ ਹਨ।
ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਦਸਿਆ ਹੈ ਕਿ ਪਿਛਲੇ ਕੁੱਝ ਦਿਨਾਂ ਵਿਚ ਇਕਦਮ ਕੋਰੋਨਾ ਦੇ ਮਾਮਲਿਆਂ ਵਿਚ ਵਾਧਾ ਹੋ ਗਿਆ ਹੈ, ਜਿਨ੍ਹਾਂ 'ਚੋਂ ਸਿਰਫ਼ 330 ਮਰਕਜ਼ ਵਾਲੇ ਹਨ।
ਐਤਵਾਰ ਤਕ ਦਿੱਲੀ 'ਚ 503 ਕੋਰੋਨਾ ਮਰੀਜ਼ ਸਨ ਤੇ ਹੁਣ ਤਕ 20 ਨਵੇਂ ਮਰੀਜ਼ ਸਾਹਮਣੇ ਆਏ ਚੁਕੇ ਹਨ ਅਤੇ ਮਰੀਜ਼ਾਂ ਦੀ ਗਿਣਤੀ ਵਧ ਕੇ 523 ਪੁੱਜ ਗਈ ਹੈ। ਜੋ 20 ਨਵੇਂ ਕੇਸ ਸਾਹਮਣੇ ਆਏ ਹਨ, ਉਨ੍ਹਾਂ 'ਚ ਨਿਜ਼ਾਮੂਦੀਨ ਮਰਕਜ਼ ਦੇ 10 ਜਣੇ ਸ਼ਾਮਲ ਹਨ ਤੇ 10 ਹੋਰ ਹਨ। ਕੁਲ ਮਾਮਲਿਆਂ ਵਿਚ 330 ਮਰਕਜ਼ ਦੇ ਹਨ, 61 ਜਣੇ ਉਹ ਹਨ, ਜੋ ਵਿਦੇਸ਼ ਤੋਂ ਪੁੱਜੇ ਸਨ। 7 ਜਣਿਆਂ ਦੀ ਮੌਤ ਹੋ ਚੁਕੀ ਹੈ ਜਿਨ੍ਹਾਂ 'ਚ 24 ਘੰਟਿਆਂ ਵਿਚ ਹੋਈ ਇਕ ਮੌਤ ਵੀ ਸ਼ਾਮਲ ਹੈ। ਹਾਲ ਦੀ ਘੜੀ 25 ਜਣੇ ਆਈਸੀਯੂ ਵਿਚ ਹਨ ਤੇ 8 ਜਣਿਆਂ ਨੂੰ ਵੈਂਟੀਲੇਟਰ 'ਤੇ ਰਖਿਆ ਹੋਇਆ ਹੈ। ਬਾਕੀਆਂ ਦੀ ਹਾਲਤ ਜਿਉਂ ਦੀ ਤਿਉਂ ਹੈ।
ਉਨ੍ਹਾਂ ਦਸਿਆ, “25 ਮਾਰਚ ਨੂੰ ਹਰ ਰੋਜ਼ ਸਾਡੀ ਸਮਰਥਾ 100-125 ਜਣਿਆਂ ਦੇ ਟੈਸਟ ਕਰਨ ਦੀ ਸੀ, ਜੋ 1 ਅਪ੍ਰੈਲ ਪਿਛੋਂ 500 ਜਣਿਆਂ ਦੇ ਟੈਸਟ ਕਰਨ ਦੀ ਹੋ ਗਈ ਸੀ ਅਤੇ ਹੁਣ ਇਹ ਸਮਰਥਾ ਵਧ ਕੇ ਇਕ ਹਜ਼ਾਰ ਟੈਸਟ ਰੋਜ਼ ਦੇ ਕਰਨ ਦੀ ਹੋ ਚੁਕੀ ਹੈ। ਅਸੀਂ ਇਕ ਲੱਖ ਟੈਸਟਿੰਗ ਕਿੱਟਾਂ ਦੇ ਆਰਡਰ ਦੇ ਚੁਕੇ ਹਾਂ ਤੇ ਉਮੀਦ ਹੈ ਕਿ ਸ਼ੁਕਰਵਾਰ ਤਕ ਇਹ ਕਿੱਟਾਂ ਮਿਲ ਜਾਣਗੀਆਂ। ਫਿਰ ਵੱਧ ਤੋਂ ਵੱਧ ਟੈਸਟ ਕਰ ਕੇ ਪਤਾ ਲੱਗ ਸਕੇਗਾ ਕਿ ਕਿੰਨੇ ਲੋਕਾਂ ਨੂੰ ਕਰੋਨਾ ਵਾਇਰਸ ਦੀ ਲਾਗ ਲੱਗ ਚੁਕੀ ਹੈ ਤੇ ਉਨ੍ਹਾਂ ਦਾ ਇਲਾਜ ਕੀਤਾ ਜਾ ਸਕੇਗਾ।
ਕੇਂਦਰ ਸਰਕਾਰ ਵਲੋਂ ਦਿੱਲੀ ਲਈ 27 ਹਜ਼ਾਰ ਪੀਪੀਈ ਕਿੱਟਾਂ ਅਲਾਟ
ਅੱਜ ਸ਼ਾਮ ਨੂੰ ਡਿਜ਼ੀਟਲ ਪੱਤਰਕਾਰ ਮਿਲਣੀ ਰਾਹੀਂ ਮੁੱਖ ਮੰਤਰੀ ਨੇ ਦਸਿਆ ਕਿ ਕਰੋਨਾ ਕਰ ਕੇ ਉਨ੍ਹਾਂ ਕੇਂਦਰ ਸਰਕਾਰ ਤੋਂ ਡਾਕਟਰਾਂ ਲਈ ਪੀਪੀਈ ਕਿੱਟਾਂ (ਮਤਲਬ ਡਾਕਟਰਾਂ ਲਈ ਨਿੱਜੀ ਸੁਰੱਖਿਆ ਸੂਟ) ਦੀ ਮੰਗ ਕੀਤੀ ਸੀ ਤੇ ਚੰਗੀ ਗੱਲ ਹੈ ਕਿ ਹੁਣ ਕੇਂਦਰ ਸਰਕਾਰ ਨੇ 27 ਹਜ਼ਾਰ ਕਿੱਟਾਂ ਦਿੱਲੀ ਲਈ ਅਲਾਟ ਕਰ ਦਿਤੀਆਂ ਹਨ ਜਿਸ ਨਾਲ ਡਾਕਟਰਾਂ ਦੀ ਸੁਰੱਖਿਆ ਵਿਚ ਮਦਦ ਮਿਲੇਗੀ। ਉਨ੍ਹਾਂ ਮੋਦੀ ਸਰਕਾਰ ਦਾ ਧਨਵਾਦ ਕਰਦਿਆਂ ਕਿਹਾ ਕਿ ਕਰੋਨਾ ਵਿਰੁਧ ਇਹ ਲੜਾਈ ਦੇਸ਼ ਦੀ ਸਾਂਝੀ ਹੈ ਤੇ ਸਾਰਿਆਂ ਨੂੰ ਇਕਮੁੱਠ ਹੋ ਕੇ ਹੀ ਲੜਨੀ ਹੈ।