ਸਾਰੇ ਅਤਿਵਾਦੀਆਂ ਦੇ ਖ਼ਤਮ ਹੋਣ ਤਕ ਪਾਕਿਸਤਾਨ ਵਿਰੁਧ ਕਾਰਵਾਈ ਜਾਰੀ ਰਹਿਣ ਦੀ ਉਮੀਦ ਪ੍ਰਗਟਾਈ
ਨਵੀਂ ਦਿੱਲੀ : ਪਹਿਲਗਾਮ ਅਤਿਵਾਦੀ ਹਮਲੇ ਦੇ ਪੀੜਤਾਂ ਦੇ ਰਿਸ਼ਤੇਦਾਰਾਂ ਨੇ ਬੁਧਵਾਰ ਨੂੰ ਪਾਕਿਸਤਾਨ ਅਤੇ ਮਕਬੂਜ਼ਾ ਕਸ਼ਮੀਰ ’ਚ ਅਤਿਵਾਦੀ ਕੈਂਪਾਂ ਵਿਰੁਧ ਭਾਰਤ ਦੇ ‘ਆਪਰੇਸ਼ਨ ਸਿੰਦੂਰ’ ਦਾ ਸਵਾਗਤ ਕੀਤਾ ਹੈ। ਕਈਆਂ ਨੇ ਉਮੀਦ ਪ੍ਰਗਟਾਈ ਕਿ ਪਾਕਿਸਤਾਨ ’ਚ ਅਤਿਵਾਦੀ ਟਿਕਾਣਿਆਂ ਵਿਰੁਧ ਭਾਰਤ ਦੀ ਇਹ ਕਾਰਵਾਈ ਅੱਗੇ ਵੀ ਜਾਰੀ ਰਹੇਗੀ। ਪਹਿਲਗਾਮ ਅਤਿਵਾਦੀ ਹਮਲੇ ’ਚ 26 ਸੈਲਾਨੀਆਂ ਦੀ ਮੌਤ ਹੋ ਗਈ ਸੀ।
ਅਮਰਾਵਤੀ ’ਚ ਆਂਧਰਾ ਪ੍ਰਦੇਸ਼ ਦੇ ਦੋ ਸੈਲਾਨੀਆਂ ਜੇ.ਸੀ. ਚੰਦਰ ਮੌਲੀ (68) ਅਤੇ ਐਸ. ਮਧੂਸੂਦਨ (45) ਦੀ 22 ਅਪ੍ਰੈਲ ਨੂੰ ਜੰਮੂ-ਕਸ਼ਮੀਰ ਦੇ ਪਹਿਲਗਾਮ ’ਚ ਅਤਿਵਾਦੀਆਂ ਨੇ ਗੋਲੀ ਮਾਰ ਕੇ ਹੱਤਿਆ ਕਰ ਦਿਤੀ ਸੀ। ਮੌਲੀ ਦੇ ਭਰਾ ਕੁਮਾਰ ਰਾਜਾ ਨੇ ਕਿਹਾ, ‘‘ਸਰਕਾਰ ਨੇ ਜੋ ਵੀ ਕੀਤਾ ਹੈ, ਉਹ ਚੰਗਾ ਕਦਮ ਹੈ। ਸਰਕਾਰ ਨੇ ਉਨ੍ਹਾਂ (ਪਾਕਿਸਤਾਨ) ਦੇ ਕਿਸੇ ਵੀ ਨਾਗਰਿਕ ਨੂੰ ਹੱਥ ਨਹੀਂ ਲਾਇਆ, ਸਿਰਫ ਅਤਿਵਾਦੀ ਮਾਰੇ ਗਏ ਹਨ। ਇਸ ਲਈ ਇਹ ਚੰਗਾ ਸੰਕੇਤ ਹੈ, ਚੰਗੀ ਕੋਸ਼ਿਸ਼ ਹੈ। ਅਸੀਂ ਇਸ ਦਾ ਸਵਾਗਤ ਕਰਦੇ ਹਾਂ।’’ ਹਾਲਾਂਕਿ, ਉਨ੍ਹਾਂ ਨੇ ਕਿਹਾ ਕਿ ਮੌਲੀ ਦਾ ਪਰਵਾਰ ਅਜੇ ਵੀ ਸਦਮੇ ਦੀ ਸਥਿਤੀ ’ਚ ਹੈ, ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਦੇ ਨੁਕਸਾਨ ਦੀ ਭਰਪਾਈ ਨਹੀਂ ਕੀਤੀ ਜਾ ਸਕਦੀ। ਉਸ ਨੇ ਕਿਹਾ ਕਿ ਮੌਲੀ ਦੀ ਪਤਨੀ ਮੰਗਲਵਾਰ ਨੂੰ ਮੁੜ ਤਣਾਅ ’ਚ ਚਲੀ ਗਈ ਜਦੋਂ ਉਸ ਨੂੰ ਅਪਣੇ ਮਾਰੇ ਗਏ ਪਤੀ ਦੀ ਅੰਗੂਠੀ ਅਤੇ ਘੜੀ ਇਕ ਕੋਰੀਅਰ ’ਚ ਮਿਲੀ।
ਪਹਿਲਗਾਮ ਅਤਿਵਾਦੀ ਹਮਲੇ ’ਚ ਅਪਣੇ ਪਿਤਾ ਅਤੇ ਦੋ ਚਾਚਿਆਂ ਨੂੰ ਗੁਆਉਣ ਵਾਲੇ ਹਰਸ਼ਲ ਲੇਲੇ ਨੇ ‘ਆਪਰੇਸ਼ਨ ਸਿੰਦੂਰ’ ਚਲਾਉਣ ’ਤੇ ਤਸੱਲੀ ਪ੍ਰਗਟਾਈ। ਲੇਲੇ ਨੇ ਕਿਹਾ, ‘‘ਮੈਂ ਸੰਤੁਸ਼ਟ ਹਾਂ, ਮੇਰੇ ਮਰਹੂਮ ਪਿਤਾ ਹੁਣ ਸ਼ਾਂਤੀ ਨਾਲ ਹੋਣਗੇ।’’ ਲੇਲੇ ਨੇ 22 ਅਪ੍ਰੈਲ ਨੂੰ ਅਪਣੀਆਂ ਅੱਖਾਂ ਸਾਹਮਣੇ ਅਤਿਵਾਦੀਆਂ ਨੂੰ ਅਪਣੇ ਪਿਤਾ ਅਤੇ ਚਾਚਿਆਂ ਨੂੰ ਗੋਲੀ ਮਾਰਦੇ ਹੋਏ ਵੇਖਿਆ ਸੀ। ਠਾਣੇ ਜ਼ਿਲ੍ਹੇ ਦੇ ਡੋਮਬੀਵਲੀ ’ਚ ਉਸ ਨੇ ਪੱਤਰਕਾਰਾਂ ਨੂੰ ਕਿਹਾ, ‘‘ਸਾਡੀ ਉਮੀਦ ਹੈ ਕਿ ਅਜਿਹੀਆਂ ਹੋਰ ਕਾਰਵਾਈਆਂ ਕੀਤੀਆਂ ਜਾਣੀਆਂ ਚਾਹੀਦੀਆਂ ਹਨ।’’
ਹਰਸ਼ਲ ਦੇ ਪਿਤਾ ਸੰਜੇ ਲੇਲੇ ਅਤੇ ਉਸ ਦੇ ਰਿਸ਼ਤੇਦਾਰ ਅਤੁਲ ਮੋਨੇ ਅਤੇ ਹੇਮੰਤ ਜੋਸ਼ੀ ਉਨ੍ਹਾਂ 26 ਲੋਕਾਂ ਵਿਚ ਸ਼ਾਮਲ ਸਨ, ਜਿਨ੍ਹਾਂ ਨੇ 22 ਅਪ੍ਰੈਲ ਨੂੰ ਅਤਿਵਾਦੀ ਹਮਲੇ ਵਿਚ ਅਪਣੀ ਜਾਨ ਗੁਆ ਦਿਤੀ ਸੀ। ਅਤੁਲ ਮੋਨੇ ਦੀ ਪਤਨੀ ਅਨੁਸ਼ਕਾ ਮੋਨੇ ਨੇ ਕਿਹਾ ਕਿ ਉਹ ਜਾਣਦੀ ਸੀ ਕਿ ਉਸ ਦਾ ਘਾਟਾ ਨਾ ਪੂਰਾ ਹੋਣ ਵਾਲਾ ਹੈ, ਫਿਰ ਵੀ ਬੁਧਵਾਰ ਦਾ ਜਵਾਬ ਮਹੱਤਵਪੂਰਨ ਸੀ। ਉਨ੍ਹਾਂ ਕਿਹਾ, ‘‘ਜਿਨ੍ਹਾਂ ਨੂੰ ਅਸੀਂ ਗੁਆ ਦਿਤਾ ਉਹ ਕਦੇ ਵਾਪਸ ਨਹੀਂ ਆਉਣਗੇ। ਪਰ ਫੌਜ ਦੀ ਇਹ ਕਾਰਵਾਈ, ਇਹ ਸ਼ਕਤੀਸ਼ਾਲੀ ਜਵਾਬ, ਉਨ੍ਹਾਂ ਦੀ ਕੁਰਬਾਨੀ ਨੂੰ ਸੱਚੀ ਸ਼ਰਧਾਂਜਲੀ ਹੈ।’’ ਇਕ ਰਿਸ਼ਤੇਦਾਰ ਜਯੰਤ ਭਾਵੇ ਨੇ ਕਿਹਾ, ‘‘ਇਹ ਉਹ ਨਿਆਂ ਸੀ ਜਿਸ ਦੀ ਅਸੀਂ ਉਮੀਦ ਕਰ ਰਹੇ ਸੀ।’’
ਪਹਿਲਗਾਮ ਹਮਲੇ ਦੌਰਾਨ ਗਰਦਨ ’ਚ ਜ਼ਖਮੀ ਹੋਏ ਨਵੀਂ ਮੁੰਬਈ ਦੇ ਵਸਨੀਕ ਸੁਬੋਧ ਪਾਟਿਲ (60) ਨੇ ਵੀ ਸੰਤੁਸ਼ਟੀ ਜ਼ਾਹਰ ਕੀਤੀ। ਉਨ੍ਹਾਂ ਕਿਹਾ, ‘‘ਮੈਂ ਜ਼ਿਆਦਾ ਬੋਲਣ ਦੇ ਯੋਗ ਨਹੀਂ ਹਾਂ ਪਰ ਮੈਂ ਕਹਾਂਗਾ ਕਿ ਇਹ ਚੰਗਾ ਹੈ ਕਿ ਭਾਰਤ ਨੇ ਬਦਲਾ ਲਿਆ।’’
ਪਹਿਲਗਾਮ ਅਤਿਵਾਦੀ ਹਮਲੇ ਦੇ ਪੀੜਤ ਲੈਫਟੀਨੈਂਟ ਵਿਨੈ ਨਰਵਾਲ ਦੇ ਪਿਤਾ ਰਾਜੇਸ਼ ਨਰਵਾਲ ਨੇ ਭਾਰਤ ਦੇ ਜਵਾਬ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਮੋਦੀ ਸਰਕਾਰ ਨੇ ਸਖਤ ਸੰਦੇਸ਼ ਦਿਤਾ ਹੈ ਅਤੇ ਹੁਣ 22 ਅਪ੍ਰੈਲ ਦੇ ਹਮਲੇ ਦੇ ਦੋਸ਼ੀ ਭਵਿੱਖ ਵਿਚ ਅਜਿਹੇ ਹਮਲਿਆਂ ਨੂੰ ਦੁਹਰਾਉਣ ਤੋਂ ਪਹਿਲਾਂ 100 ਵਾਰ ਸੋਚਣਗੇ। ਰਾਜੇਸ਼ ਨਰਵਾਲ ਨੇ ਕਰਨਾਲ ’ਚ ਅਪਣੀ ਰਿਹਾਇਸ਼ ’ਤੇ ਪੱਤਰਕਾਰਾਂ ਨੂੰ ਕਿਹਾ, ‘‘ਜਦੋਂ ਇਹ (ਪਹਿਲਗਾਮ ਘਟਨਾ) ਵਾਪਰੀ ਤਾਂ ਵੀ ਤੁਸੀਂ (ਮੀਡੀਆ) ਮੇਰੇ ਘਰ ਆਏ ਅਤੇ ਪੁਛਿਆ ਕਿ ਮੈਨੂੰ ਸਰਕਾਰ ਤੋਂ ਕੀ ਉਮੀਦ ਹੈ। ਮੇਰਾ ਜਵਾਬ ਸੀ ਕਿ ਮੈਨੂੰ ਸਾਡੀ ਸਰਕਾਰ ’ਤੇ ਭਰੋਸਾ ਹੈ। ਅੱਜ ਸਰਕਾਰ ਨੇ ਇਸ ਵਿਸ਼ਵਾਸ ਨੂੰ ਜਾਇਜ਼ ਠਹਿਰਾਇਆ ਹੈ।’’ ਇਸ ਤੋਂ ਪਹਿਲਾਂ ਜਦੋਂ ਵਿਨੈ ਨਰਵਾਲ ਦੀ ਮਾਂ ਆਸ਼ਾ ਤੋਂ ਪਹਿਲਗਾਮ ਘਟਨਾ ’ਤੇ ਭਾਰਤ ਦੀ ਪ੍ਰਤੀਕਿਰਿਆ ਬਾਰੇ ਪੁਛਿਆ ਗਿਆ ਤਾਂ ਉਨ੍ਹਾਂ ਨੇ ਪੱਤਰਕਾਰਾਂ ਨੂੰ ਕਿਹਾ, ‘‘ਇਹ ਬਹੁਤ ਚੰਗੀ ਗੱਲ ਹੈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਪਹਿਲਗਾਮ ਹਮਲੇ ਦਾ ਬਦਲਾ ਲਿਆ ਹੈ। ਮੈਂ ਉਨ੍ਹਾਂ (ਸਰਕਾਰ) ਦੇ ਨਾਲ ਹਾਂ, ਲੋਕ ਉਨ੍ਹਾਂ ਦੇ ਨਾਲ ਹਨ ਅਤੇ ਸਾਡਾ ਪੂਰਾ ਪਰਵਾਰ ਉਨ੍ਹਾਂ ਦੇ ਨਾਲ ਹੈ।’’ ਉਨ੍ਹਾਂ ਕਿਹਾ, ‘‘ਮੈਂ ਅਪਣੀ ਫੌਜ ਨੂੰ ਕਰਾਰਾ ਜਵਾਬ ਦੇਣ ਲਈ ਕਹਿਣਾ ਚਾਹੁੰਦੀ ਹਾਂ ਤਾਂ ਜੋ ਅਜਿਹੀਆਂ ਘਟਨਾਵਾਂ (ਪਹਿਲਗਾਮ ਵਰਗੀਆਂ) ਦੁਬਾਰਾ ਨਾ ਵਾਪਰਨ।’’ ਨਰਵਾਲ (26) ਦਾ ਵਿਆਹ ਕਰੀਬ ਤਿੰਨ ਹਫਤੇ ਪਹਿਲਾਂ ਹੋਇਆ ਸੀ ਅਤੇ ਉਹ ਅਪਣੀ ਪਤਨੀ ਹਿਮਾਂਸ਼ੀ ਨਾਲ ਦਖਣੀ ਕਸ਼ਮੀਰ ਦੇ ਪਹਿਲਗਾਮ ਕਸਬੇ ’ਚ ਹਨੀਮੂਨ ’ਤੇ ਗਿਆ ਸੀ, ਜਦੋਂ ਅਤਿਵਾਦੀਆਂ ਨੇ ਉਸ ਨੂੰ ਗੋਲੀ ਮਾਰ ਦਿਤੀ ।
ਅਨੰਤਨਾਗ ’ਚ ਪਹਿਲਗਾਮ ਅਤਿਵਾਦੀ ਹਮਲੇ ਦੌਰਾਨ ਸੈਲਾਨੀਆਂ ਦੀ ਰੱਖਿਆ ਕਰਦੇ ਹੋਏ ਅਪਣੀ ਜਾਨ ਕੁਰਬਾਨ ਕਰਨ ਵਾਲੇ ਪੋਨੀਵਾਲਾ ਸਈਦ ਆਦਿਲ ਹੁਸੈਨ ਸ਼ਾਹ ਦੇ ਪਿਤਾ ਨੇ ਬੁਧਵਾਰ ਨੂੰ ਕਿਹਾ ਕਿ ਪਾਕਿਸਤਾਨ ਅਤੇ ਪਾਕਿਸਤਾਨ ਦੇ ਕਬਜ਼ੇ ਵਾਲੇ ਜੰਮੂ-ਕਸ਼ਮੀਰ ’ਚ ਅਤਿਵਾਦੀ ਕੈਂਪਾਂ ’ਤੇ ਫੌਜੀ ਹਮਲਿਆਂ ਨੇ ਉਨ੍ਹਾਂ ਦੇ ਬੇਟੇ ਦੀ ਹੱਤਿਆ ਦਾ ਬਦਲਾ ਲਿਆ ਹੈ। ਸ਼ਾਹ ਦੇ ਪਰਵਾਰ ਨੇ ਜਵਾਬੀ ਕਾਰਵਾਈ ਲਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਹਥਿਆਰਬੰਦ ਬਲਾਂ ਦਾ ਧੰਨਵਾਦ ਕੀਤਾ। ਸ਼ਾਹ ਦੇ ਪਿਤਾ ਸਈਦ ਹੈਦਰ ਸ਼ਾਹ ਨੇ ਕਿਹਾ, ‘‘ਮੈਨੂੰ ਖੁਸ਼ੀ ਹੈ ਕਿ ਉਨ੍ਹਾਂ (ਪੀੜਤ) ਦੀ ਆਤਮਾ ਨੂੰ ਸ਼ਾਂਤੀ ਮਿਲੇਗੀ।’’
ਪੁਣੇ ’ਚ ਪ੍ਰਗਤੀ ਜਗਦਾਲੇ, ਜਿਨ੍ਹਾਂ ਦਾ ਪਤੀ ਸੰਤੋਸ਼ ਪਹਿਲਗਾਮ ਅਤਿਵਾਦੀ ਹਮਲੇ ’ਚ ਮਾਰੇ ਗਏ 26 ਲੋਕਾਂ ’ਚੋਂ ਇਕ ਸੀ, ਨੇ ਵੀ ਨੂੰ ਆਪਰੇਸ਼ਨ ਸਿੰਦੂਰ ਨੂੰ ਪੀੜਤਾਂ ਨੂੰ ਢੁੱਕਵੀਂ ਸ਼ਰਧਾਂਜਲੀ ਦਸਿਆ। ਉਨ੍ਹਾਂ ਕਿਹਾ, ‘‘ਆਪਰੇਸ਼ਨ ਸਿੰਦੂਰ ਰਾਹੀਂ ਪਹਿਲਗਾਮ ਹਮਲੇ ’ਚ ਮਾਰੇ ਗਏ ਲੋਕਾਂ ਨੂੰ ਸ਼ਰਧਾਂਜਲੀ ਦਿਤੀ ਗਈ ਹੈ। ਮੈਂ ਆਪਰੇਸ਼ਨ ਸਿੰਦੂਰ ਚਲਾਉਣ ਲਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਧੰਨਵਾਦੀ ਹਾਂ। ਮੈਂ ਸ਼ੁਕਰਗੁਜ਼ਾਰ ਹਾਂ ਕਿ ਸਾਡੀਆਂ ਭਾਵਨਾਵਾਂ ਨੂੰ ਸਮਝ ਲਿਆ ਗਿਆ ਹੈ।’’ ਜੋੜੇ ਦੀ ਬੇਟੀ ਅਸਾਵਰੀ ਜਗਦਾਲੇ ਨੇ ਕਿਹਾ, ‘‘ਮੈਂ ਬਹੁਤ ਸ਼ੁਕਰਗੁਜ਼ਾਰ ਹਾਂ ਅਤੇ ਮਾਣ ਮਹਿਸੂਸ ਕਰਦੀ ਹਾਂ ਕਿ ਸਾਡੇ ਹਥਿਆਰਬੰਦ ਬਲਾਂ ਨੇ ਹਵਾਈ ਹਮਲਿਆਂ ਰਾਹੀਂ ਢੁਕਵਾਂ ਜਵਾਬ ਦਿਤਾ ਹੈ।’’
22 ਅਪ੍ਰੈਲ ਨੂੰ ਪਹਿਲਗਾਮ ਹਮਲੇ ’ਚ ਮਾਰੇ ਗਏ ਪੁਣੇ ਦੇ ਇਕ ਹੋਰ ਨਿਵਾਸੀ ਕੌਸਤੁਭ ਗਾਂਬੋਟੇ ਦੀ ਪਤਨੀ ਸੰਗੀਤਾ ਗਾਂਬੋਟੇ ਨੇ ਕਿਹਾ, ‘‘ਅਸੀਂ ਸਾਰੇ ਇਹ ਵੇਖਣ ਦੀ ਉਡੀਕ ਕਰ ਰਹੇ ਸੀ ਕਿ ਭਾਰਤ ਅਤਿਵਾਦੀ ਹਮਲੇ ਦਾ ਬਦਲਾ ਕਦੋਂ ਲਵੇਗਾ। ਅੱਜ ਆਪਰੇਸ਼ਨ ਸਿੰਦੂਰ ਨਾਲ ਭਾਰਤੀ ਹਥਿਆਰਬੰਦ ਬਲਾਂ ਨੇ ਪਹਿਲਗਾਮ ’ਚ ਹੋਏ ਕਾਇਰਾਨਾ ਹਮਲੇ ਦਾ ਢੁਕਵਾਂ ਜਵਾਬ ਦਿਤਾ।’’
ਗੁਜਰਾਤ ਦੇ ਭਾਵਨਗਰ ਦੀ ਇਕ ਔਰਤ, ਜਿਸ ਨੇ ਪਹਿਲਗਾਮ ਅਤਿਵਾਦੀ ਹਮਲੇ ’ਚ ਅਪਣੇ ਪਤੀ ਅਤੇ ਇਕ ਬੇਟੇ ਨੂੰ ਗੁਆ ਦਿਤਾ ਸੀ, ਨੇ ਬੁਧਵਾਰ ਨੂੰ ਆਪਰੇਸ਼ਨ ਸਿੰਦੂਰ ਲਈ ਭਾਰਤੀ ਹਥਿਆਰਬੰਦ ਬਲਾਂ ਦੀ ਸ਼ਲਾਘਾ ਕੀਤੀ ਅਤੇ ਸਰਕਾਰ ਨੂੰ ਅਪੀਲ ਕੀਤੀ ਕਿ ਉਹ ਪਾਕਿਸਤਾਨ ਦੇ ਖਾਤਮੇ ਤਕ ਉਸ ਵਿਰੁਧ ਕਾਰਵਾਈ ਜਾਰੀ ਰੱਖੇ। ਸੂਰਤ ਦੀ ਰਹਿਣ ਵਾਲੀ ਇਕ ਹੋਰ ਔਰਤ, ਜਿਸ ਦਾ ਪਤੀ ਵੀ ਹਮਲੇ ਵਿਚ ਮਾਰਿਆ ਗਿਆ ਸੀ, ਨੇ ਇਸ ਕਾਰਵਾਈ ’ਤੇ ਖੁਸ਼ੀ ਜ਼ਾਹਰ ਕੀਤੀ ਅਤੇ ਕਿਹਾ ਕਿ ਉਸ ਨੂੰ ਸਰਕਾਰ ’ਤੇ ਪੂਰਾ ਭਰੋਸਾ ਹੈ।
ਭਾਵਨਗਰ ’ਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਾਜਲਬੇਨ ਪਰਮਾਰ ਨੇ ਕਿਹਾ, ‘‘ਮੈਨੂੰ ਪਾਕਿਸਤਾਨ ’ਤੇ ਕੀਤੇ ਗਏ ਹਵਾਈ ਹਮਲੇ ’ਤੇ ਬਹੁਤ ਮਾਣ ਹੈ। ਮੈਂ ਹਥਿਆਰਬੰਦ ਬਲਾਂ ਨੂੰ ਸਲਾਮ ਕਰਦੀ ਹਾਂ ਅਤੇ ਭਾਰਤ ਮਾਤਾ ਦੀ ਸ਼ਲਾਘਾ ਕਰਦਾ ਹਾਂ। ਮੈਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਧੰਨਵਾਦੀ ਹਾਂ ਅਤੇ ਹਮਲਿਆਂ ਲਈ ਬਹੁਤ ਖੁਸ਼ ਹਾਂ। ਅਜਿਹੇ ਹਮਲੇ ਕਰਦੇ ਰਹੋ ਅਤੇ ਪਾਕਿਸਤਾਨ ਦਾ ਸਫਾਇਆ ਕਰਦੇ ਰਹੋ, ਇਹ ਮੇਰੀ ਮੋਦੀ ਸਾਹਿਬ ਨੂੰ ਪ੍ਰਾਰਥਨਾ ਹੈ।’’ ਪਹਿਲਗਾਮ ’ਚ ਹੋਏ ਭਿਆਨਕ ਅਤਿਵਾਦੀ ਹਮਲੇ ’ਚ ਮਾਰੇ ਗਏ 26 ਲੋਕਾਂ ’ਚ ਉਸ ਦਾ ਪਤੀ ਯਤੀਸ਼ ਪਰਮਾਰ ਅਤੇ ਉਨ੍ਹਾਂ ਦਾ ਬੇਟਾ ਸਮਿਤ ਵੀ ਸ਼ਾਮਲ ਸਨ। ਪਿਤਾ-ਪੁੱਤਰ ਗੁਜਰਾਤ ਦੇ ਉਨ੍ਹਾਂ ਤਿੰਨ ਵਿਅਕਤੀਆਂ ’ਚ ਸ਼ਾਮਲ ਸਨ, ਜਿਨ੍ਹਾਂ ਦੀ 22 ਅਪ੍ਰੈਲ ਨੂੰ ਹੋਏ ਹਮਲੇ ’ਚ ਮੌਤ ਹੋ ਗਈ ਸੀ।
ਮੱਧ ਪ੍ਰਦੇਸ਼ ਦੇ ਇੰਦੌਰ ’ਚ ਪਹਿਲਗਾਮ ਅਤਿਵਾਦੀ ਹਮਲੇ ਦੇ ਪੀੜਤ ਸੁਸ਼ੀਲ ਨਥਾਨੀਅਲ ਦੀ ਪਤਨੀ ਨੇ ਕਿਹਾ ਕਿ ਉਹ ਚਾਹੁੰਦੀ ਹੈ ਕਿ ਉਸ ਦੇ ਪਤੀ ਦੀ ਹੱਤਿਆ ਕਰਨ ਵਾਲੇ ਚਾਰ ਅਤਿਵਾਦੀ ਵੀ ਮਾਰੇ ਜਾਣ। ਨਥਾਨੀਅਲ ਦੀ ਪਤਨੀ ਜੈਨੀਫਰ (54) ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ, ‘‘ਜੋ ਕੁੱਝ ਵੀ ਹੋਇਆ ਉਹ ਸਹੀ ਹੈ ਪਰ ਉਨ੍ਹਾਂ ਚਾਰ ਲੋਕਾਂ (ਪਹਿਲਗਾਮ ਹਮਲੇ ਵਿਚ ਸ਼ਾਮਲ ਅਤਿਵਾਦੀਆਂ) ਨੂੰ ਵੀ ਖਤਮ ਕੀਤਾ ਜਾਣਾ ਚਾਹੀਦਾ ਹੈ। ਇਨ੍ਹਾਂ ਚਾਰ ਲੋਕਾਂ ਨੇ ਉਹ ਕੀਤਾ ਜੋ ਇਕ ਜਾਨਵਰ ਵੀ ਨਹੀਂ ਕਰੇਗਾ। ਮੈਂ ਸਿਰਫ ਇਸ ਦਾ ਹਿਸਾਬ ਚਾਹੁੰਦੀ ਹਾਂ ਅਤੇ ਇਨ੍ਹਾਂ ਲੋਕਾਂ ਨੂੰ ਵੀ ਉਹੀ ਸਜ਼ਾ ਮਿਲਣੀ ਚਾਹੀਦੀ ਹੈ। ਇਨ੍ਹਾਂ ਚਾਰਾਂ ਲੋਕਾਂ ਨੂੰ ਵੀ ਮਰਨਾ ਚਾਹੀਦਾ ਹੈ।’’ ਸੁਸ਼ੀਲ ਦੇ ਛੋਟੇ ਭਰਾ ਵਿਕਾਸ ਕੁਮਰਾਵਤ ਨੇ ਕਿਹਾ ਕਿ ਆਪਰੇਸ਼ਨ ਸਿੰਦੂਰ ਨੇ ਉਸ ਨੂੰ ਸੰਤੁਸ਼ਟੀ ਦਿਤੀ। ਉਨ੍ਹਾਂ ਕਿਹਾ ਕਿ ਇਸ ਮੁਹਿੰਮ ਦਾ ਨਾਂ ‘ਆਪਰੇਸ਼ਨ ਸਿੰਦੂਰ’ ਰਖਣਾ ਪਹਿਲਗਾਮ ਅਤਿਵਾਦੀ ਹਮਲੇ ’ਚ ਅਪਣੇ ਪਤੀਆਂ ਨੂੰ ਗੁਆਉਣ ਵਾਲੀਆਂ ਔਰਤਾਂ ਪ੍ਰਤੀ ਨਰਿੰਦਰ ਮੋਦੀ ਸਰਕਾਰ ਦੀ ਸੰਵੇਦਨਸ਼ੀਲਤਾ ਨੂੰ ਦਰਸਾਉਂਦਾ ਹੈ।
ਪਛਮੀ ਬੰਗਾਲ ਦੇ ਕੋਲਕਾਤਾ ਦੇ ਦੋ ਵਸਨੀਕਾਂ ਸਮੀਰ ਗੁਹਾ ਅਤੇ ਬਿਟਨ ਅਧਿਕਾਰੀ ਦੇ ਪਰਵਾਰਾਂ ਨੇ ਭਾਰਤ ਦੇ ਹਮਲੇ ’ਤੇ ਸੰਤੁਸ਼ਟੀ ਜ਼ਾਹਰ ਕਰਦਿਆਂ ਇਸ ਨੂੰ ਨਿਆਂ ਦੀ ਦਿਸ਼ਾ ’ਚ ਚੁਕਿਆ ਗਿਆ ਕਦਮ ਦਸਿਆ। ਗੁਹਾ ਦੀ ਪਤਨੀ ਨੇ ਅਪਣੇ ਘਰ ’ਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ, ‘‘ਮੈਨੂੰ ਖੁਸ਼ੀ ਹੈ ਕਿ ਸਾਡੇ ਦੇਸ਼ ਨੇ ਅਤਿਵਾਦੀ ਕੈਂਪਾਂ ਦੇ ਦਿਲ ’ਚ ਡੂੰਘੀ ਛਾਲ ਮਾਰੀ ਹੈ। ਅਸੀਂ ਬੇਨਤੀ ਕਰਾਂਗੇ ਕਿ ਇਹ ਹਮਲਾ ਉਦੋਂ ਤਕ ਜਾਰੀ ਰਹਿਣਾ ਚਾਹੀਦਾ ਹੈ ਜਦੋਂ ਤਕ ਸਾਡੇ ਗੁਆਂਢ ’ਚੋਂ ਅਤਿਵਾਦ ਦਾ ਖਾਤਮਾ ਨਹੀਂ ਹੋ ਜਾਂਦਾ।’’ ਹਾਲਾਂਕਿ ਉਹ ਅਜੇ ਵੀ ਸਦਮੇ ਨਾਲ ਜੂਝ ਰਹੀ ਹੈ, ਉਸ ਨੇ ਕਿਹਾ ਕਿ ਭਾਰਤ ਸਰਕਾਰ ਦੇ ਸਖਤ ਹੁੰਗਾਰੇ ਨੇ ਦੁਖੀ ਪਰਵਾਰਾਂ ਲਈ ਰਾਹਤ ਅਤੇ ਉਮੀਦ ਦੀ ਭਾਵਨਾ ਲਿਆਂਦੀ ਹੈ। ਗੁਹਾ ਦੇ ਜੀਜਾ ਨੇ ਤੁਰਤ ਅਤੇ ਸਖਤ ਕਾਰਵਾਈ ਲਈ ਕੇਂਦਰ ਦਾ ਧੰਨਵਾਦ ਕੀਤਾ।
ਪਹਿਲਗਾਮ ਹਮਲੇ ’ਚ ਅਪਣੇ ਪਤੀ ਨੂੰ ਗੁਆਉਣ ਵਾਲੀ ਓਡੀਸ਼ਾ ਦੀ ਪ੍ਰਿਆ ਦਰਸ਼ਨੀ ਆਚਾਰੀਆ ਨੇ ‘ਆਪਰੇਸ਼ਨ ਸਿੰਦੂਰ’ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਅਤਿਵਾਦੀਆਂ ਨੂੰ ਡਰ ’ਚ ਰਹਿਣਾ ਚਾਹੀਦਾ ਹੈ ਅਤੇ ਹੁਣ ਉਹ ਮਨੁੱਖੀ ਜ਼ਿੰਦਗੀ ਦੀ ਕੀਮਤ ਸਮਝਣਗੇ। ਆਚਾਰੀਆ ਦੇ ਪਤੀ ਪ੍ਰਸ਼ਾਂਤ ਸਤਪਥੀ 22 ਅਪ੍ਰੈਲ ਨੂੰ ਪਹਿਲਗਾਮ ਹਮਲੇ ’ਚ ਮਾਰੇ ਗਏ 26 ਲੋਕਾਂ ’ਚ ਸ਼ਾਮਲ ਸਨ। ਬਾਲਾਸੋਰ ਜ਼ਿਲ੍ਹੇ ਦੇ ਈਸ਼ਾਨੀ ਪਿੰਡ ’ਚ ਅਪਣੇ ਘਰ ’ਚ ਉਨ੍ਹਾਂ ਕਿਹਾ, ‘‘ਮੈਂ ਅਜਿਹਾ ਦਲੇਰ ਕਦਮ ਚੁੱਕਣ ਲਈ ਸਰਕਾਰ ਦਾ ਧੰਨਵਾਦ ਕਰਦੀ ਹਾਂ। ਫੌਜ ਦੇ ਜਵਾਨਾਂ ਨੇ ਮੇਰੇ ਪਤੀ ਦੀ ਲਾਸ਼ ਦੇ ਨੇੜੇ ਮੈਨੂੰ ਭਰੋਸਾ ਦਿਤਾ ਸੀ ਕਿ ਕਾਰਵਾਈ ਕੀਤੀ ਜਾਵੇਗੀ ਅਤੇ ਅਜਿਹਾ ਅੱਜ ਹੋਇਆ ਹੈ। ਮੈਨੂੰ ਖੁਸ਼ੀ ਹੈ ਕਿਉਂਕਿ ਅਤਿਵਾਦੀ ਹੁਣ ਮਨੁੱਖੀ ਜਾਨ ਦੀ ਕੀਮਤ ਨੂੰ ਸਮਝਣਗੇ ਅਤੇ ਇਹ ਕਿੰਨਾ ਕੀਮਤੀ ਹੈ। ਮੇਰੇ ਪਤੀ ਦੀ ਕੁਰਬਾਨੀ ਵਿਅਰਥ ਨਹੀਂ ਗਈ ਅਤੇ ਜਿਨ੍ਹਾਂ ਅਤਿਵਾਦੀਆਂ ਨੇ ਅਪਣੇ ਪਰਵਾਰਾਂ ਦੇ ਸਾਹਮਣੇ ਬੇਕਸੂਰ ਲੋਕਾਂ ਨੂੰ ਮਾਰਿਆ, ਉਨ੍ਹਾਂ ਨੂੰ ਡਰ ਵਿਚ ਰਹਿਣਾ ਚਾਹੀਦਾ ਹੈ ਜੇਕਰ ਉਹ ਭਾਰਤ ਦੇ ਹਮਲੇ ਵਿਚ ਬਚ ਗਏ ਹਨ।’’ ਭਾਵਨਾਤਮਕ ਤੌਰ ’ਤੇ ਪ੍ਰਭਾਵਤ ਆਚਾਰੀਆ ਨੇ ਕਿਹਾ ਕਿ ਉਸ ਨੂੰ ਭਰੋਸਾ ਸੀ ਕਿ ਸਰਕਾਰ ਕਾਰਵਾਈ ਕਰੇਗੀ ਪਰ ਉਹ ਇਸ ਦੇ ਸਮੇਂ ਨੂੰ ਲੈ ਕੇ ਚਿੰਤਤ ਹੈ। ਉਨ੍ਹਾਂ ਕਿਹਾ ਕਿ ਅਤਿਵਾਦ ਨੂੰ ਇਕੱਲੇ ਭਾਰਤ ਤੋਂ ਹੀ ਨਹੀਂ ਬਲਕਿ ਪੂਰੀ ਦੁਨੀਆਂ ਤੋਂ ਪੂਰੀ ਤਰ੍ਹਾਂ ਖਤਮ ਕੀਤਾ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਗ੍ਰਹਿ ’ਤੇ ਲੋਕਾਂ ਨੂੰ ਬਿਨਾਂ ਕਿਸੇ ਡਰ ਦੇ ਰਹਿਣਾ ਚਾਹੀਦਾ ਹੈ।
ਉੱਤਰ ਪ੍ਰਦੇਸ਼ ਦੇ ਕਾਨਪੁਰ ’ਚ ਪਹਿਲਗਾਮ ਅਤਿਵਾਦੀ ਹਮਲੇ ਦੇ ਪੀੜਤ ਸ਼ੁਭਮ ਦਿਵੇਦੀ ਦੀ ਪਤਨੀ ਅਸ਼ਨਿਆ ਨੇ ਬੁਧਵਾਰ ਨੂੰ ਅਪਣੇ ਪਤੀ ਦੀ ਮੌਤ ਦਾ ਬਦਲਾ ਲੈਣ ਲਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਹਥਿਆਰਬੰਦ ਬਲਾਂ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ, ‘‘ਮੈਂ ਪਹਿਲਗਾਮ ਅਤਿਵਾਦੀ ਹਮਲੇ ਵਿਚ ਮੇਰੇ ਪਤੀ ਦੀ ਮੌਤ ਦਾ ਬਦਲਾ ਲੈਣ ਲਈ ਪ੍ਰਧਾਨ ਮੰਤਰੀ ਮੋਦੀ, ਮੰਤਰੀਆਂ ਅਤੇ ਹਵਾਈ ਫ਼ੌਜ ਅਤੇ ਫੌਜ ਮੁਖੀ ਜਨਰਲ ਸਮੇਤ ਹਥਿਆਰਬੰਦ ਬਲਾਂ ਦੇ ਮੁਖੀਆਂ ਦਾ ਧੰਨਵਾਦ ਕਰਨਾ ਚਾਹੁੰਦੀ ਹਾਂ।’’ ਆਸ਼ਾਨਿਆ ਨੇ ਇਹ ਵੀ ਕਿਹਾ ਕਿ ਇਹ ਹਮਲੇ ਅਤਿਵਾਦੀਆਂ ਨੂੰ ਭਵਿੱਖ ’ਚ ਨਿਰਦੋਸ਼ਾਂ ’ਤੇ ਅਜਿਹੇ ਹਮਲਿਆਂ ਨੂੰ ਅੰਜਾਮ ਦੇਣ ਤੋਂ ਦੂਰ ਰਖਣਗੇ।
ਪਹਿਲਗਾਮ ਅਤਿਵਾਦੀ ਹਮਲੇ ਦੇ ਪੀੜਤ ਭਾਰਤ ਭੂਸ਼ਣ ਦੇ ਪਰਵਾਰ ਨੇ ਪਾਕਿਸਤਨ ’ਤੇ ਭਾਰਤੀ ਹਵਾਈ ਹਮਲੇ ਦਾ ਸਵਾਗਤ ਕੀਤਾ ਅਤੇ ਕਿਹਾ ਕਿ ਸਰਕਾਰ ਨੇ ਚੰਗਾ ਕੰਮ ਕੀਤਾ ਹੈ ਅਤੇ ਉਹ ਉਨ੍ਹਾਂ ਦੇ ਸਮਰਥਨ ’ਚ ਹਨ। ਬੈਂਗਲੁਰੂ ਦੇ ਭੂਸ਼ਣ ਅਪਣੀ ਪਤਨੀ ਅਤੇ ਤਿੰਨ ਸਾਲ ਦੇ ਬੇਟੇ ਨਾਲ ਪਹਿਲਗਾਮ ਗਏ ਸਨ, ਜਿਨ੍ਹਾਂ ਦੀ 22 ਅਪ੍ਰੈਲ ਨੂੰ ਅਤਿਵਾਦੀਆਂ ਨੇ ਗੋਲੀ ਮਾਰ ਕੇ ਹੱਤਿਆ ਕਰ ਦਿਤੀ ਸੀ। ਉਸ ਦੀ ਪਤਨੀ ਸੁਜਾਤਾ ਅਤੇ ਉਨ੍ਹਾਂ ਦਾ ਬੱਚਾ ਹਮਲੇ ਵਿਚ ਬਚ ਗਏ। ਭੂਸ਼ਣ ਦੇ ਪਿਤਾ ਚੰਨਾਵੀਰੱਪਾ ਨੇ ਕਿਹਾ, ‘‘ਮੈਂ ਸੁਣਿਆ ਹੈ ਕਿ ਉਨ੍ਹਾਂ ਨੇ ਹਮਲਾ ਕੀਤਾ ਹੈ ਅਤੇ ਮਾਰਿਆ ਹੈ ਪਰ ਅਜੇ ਵੀ ਕੁੱਝ ਹੋਰ ਲੋਕ ਭੱਜ ਰਹੇ ਹਨ। ਸਰਕਾਰ ਨੂੰ ਉਨ੍ਹਾਂ ਨੂੰ ਮਾਰਨ ਲਈ ਵੀ ਕਦਮ ਚੁੱਕਣੇ ਪੈਣਗੇ।’’ ਭੂਸ਼ਣ ਦੇ ਭਰਾ ਪ੍ਰੀਤਮ ਨੇ ਕਿਹਾ ਕਿ ਪਰਵਾਰ ਅਜੇ ਵੀ ਸੋਗ ’ਚ ਹੈ ਅਤੇ ਇਹ ਮਨਜ਼ੂਰ ਕਰਨ ਦੇ ਯੋਗ ਨਹੀਂ ਹੈ ਕਿ ਭਰਤ ਹੁਣ ਉਨ੍ਹਾਂ ਦੇ ਨਾਲ ਨਹੀਂ ਹੈ।
ਕੋਚੀ ’ਚ ਅਤਿਵਾਦੀਆਂ ਵਲੋਂ ਮਾਰੇ ਗਏ ਐਨ. ਰਾਮਚੰਦਰਨ ਦੀ ਬੇਟੀ ਆਰਥੀ ਨੇ ਬੁਧਵਾਰ ਨੂੰ ਭਾਰਤੀ ਫੌਜ ਦੇ ਆਪਰੇਸ਼ਨ ਸਿੰਦੂਰ ਦਾ ਸਵਾਗਤ ਕੀਤਾ ਅਤੇ ਉਮੀਦ ਪ੍ਰਗਟਾਈ ਕਿ ਇਸ ਨਾਲ ਉਨ੍ਹਾਂ ਦੇ ਸਾਹਮਣੇ ਮਾਰੇ ਗਏ ਲੋਕਾਂ ਦੇ ਪਰਵਾਰਾਂ ਨੂੰ ਕੁੱਝ ਰਾਹਤ ਮਿਲੇਗੀ, ਉਨ੍ਹਾਂ ਕਿਹਾ ਕਿ ਆਪਰੇਸ਼ਨ ਸਿੰਦੂਰ ਫੌਜ ਅਤੇ ਸਰਕਾਰ ਰਾਹੀਂ ਭਾਰਤ ਦੀਆਂ ਔਰਤਾਂ ਦਾ ਜਵਾਬ ਜਾਪਦਾ ਹੈ। ਆਰਥੀ ਨੇ ਇਹ ਵੀ ਕਿਹਾ ਕਿ ਉਹ ਅਤੇ ਉਸ ਦਾ ਪਰਵਾਰ ਫੌਜ ਲਈ ਪ੍ਰਾਰਥਨਾ ਕਰ ਰਹੇ ਹਨ।
ਆਪਰੇਸ਼ਨ ਸਿੰਦੂਰ: ਪਹਿਲਗਾਮ ਅਤਿਵਾਦੀ ਹਮਲੇ ਦੀ ਪੀੜਤਾ ਦੀ ਮਾਂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਪ੍ਰਧਾਨ ਮੰਤਰੀ ਮੋਦੀ ’ਤੇ ਭਰੋਸਾ ਹੈ।
ਕਰਨਾਟਕ ਦੇ ਸ਼ਿਵਮੋਗਾ ’ਚ ਪਹਿਲਗਾਮ ਅਤਿਵਾਦੀ ਹਮਲੇ ਦੇ ਪੀੜਤ ਮੰਜੂਨਾਥ ਰਾਓ ਦੀ ਮਾਂ ਸੁਮਤੀ ਨੇ ਹਵਾਈ ਹਮਲੇ ਦਾ ਸਵਾਗਤ ਕੀਤਾ ਅਤੇ ਕਿਹਾ ਕਿ ਉਨ੍ਹਾਂ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ’ਤੇ ਭਰੋਸਾ ਹੈ। ਉਸ ਨੇ ਇਹ ਵੀ ਕਿਹਾ ਕਿ ਉਹ ਨਹੀਂ ਚਾਹੁੰਦੀ ਕਿ ਉਸ ਦੇ ਬੇਟੇ ਦੀ ਕੁਰਬਾਨੀ ਵਿਅਰਥ ਜਾਵੇ।
