ਹਾਲ ਹੀ ਵਿਚ ਕਾਂਗਰਸ ਪਾਰਟੀ ਨਾਲ ਜੁੜੇ ਕਈ ਸੀਨੀਅਰ ਨੇਤਾਵਾਂ ਅਤੇ ਚੀਨ ਨਾਲ ਜੁੜੇ ਫੰਡਿੰਗ ਕਨੈਕਸ਼ਨ ‘ਤੇ ਕਾਫੀ ਚਰਚਾ ਹੋਈ ਸੀ
ਨਵੀਂ ਦਿੱਲੀ: ਗ੍ਰਹਿ ਮੰਤਰਾਲੇ ਨੇ ਕਾਂਗਰਸ ਅਤੇ ਗਾਂਧੀ ਪਰਿਵਾਰ ਦੇ ਤਿੰਨ ਟਰੱਸਟਾਂ-ਰਾਜੀਵ ਗਾਂਧੀ ਫਾਂਊਡੇਸ਼ਨ, ਰਾਜੀਵ ਗਾਂਧੀ ਚੈਰੀਟੇਬਲ ਟਰੱਸਟ ਅਤੇ ਇੰਦਰਾ ਗਾਂਧੀ ਮੈਮੋਰੀਅਲ ਟਰੱਸਟ ‘ਤੇ ਲੱਗੇ ਅਰੋਪਾਂ ਤੋਂ ਬਾਅਦ ਪੀਐਮਐਲਏ, ਆਮਦਨ ਟੈਕਸ ਕਾਨੂੰਨ ਅਤੇ ਐਫਸੀਆਰਏ ਦੇ ਵੱਖ-ਵੱਖ ਕਾਨੂੰਨੀ ਨਿਯਮਾਂ ਦੀ ਉਲੰਘਣਾ ਦੀ ਜਾਂਚ ਲਈ ਇਕ ਜਾਂਚ ਕਮੇਟੀ ਦਾ ਗਠਨ ਕੀਤਾ ਹੈ।
ਮੰਤਰਾਲੇ ਦੇ ਇਸ ਫੈਸਲੇ ਤੋਂ ਬਾਅਦ ਕਈ ਕਾਂਗਰਸ ਨੇਤਾਵਾਂ ਦੀਆਂ ਮੁਸ਼ਕਲਾਂ ਵਧ ਸਕਦੀਆਂ ਹਨ। ਹਾਲ ਹੀ ਵਿਚ ਕਾਂਗਰਸ ਪਾਰਟੀ ਨਾਲ ਜੁੜੇ ਕਈ ਸੀਨੀਅਰ ਨੇਤਾਵਾਂ ਅਤੇ ਚੀਨ ਨਾਲ ਜੁੜੇ ਫੰਡਿੰਗ ਕਨੈਕਸ਼ਨ ‘ਤੇ ਕਾਫੀ ਚਰਚਾ ਹੋਈ ਸੀ। ਇਹ ਜਾਂਚ ਪੀਐਮਐਲਏ, ਐਫਸੀਆਰਏ, ਇਨਕਮ ਟੈਕਸ ਨੂੰ ਲੈ ਕੇ ਹੋਵੇਗੀ। ਦੱਸਿਆ ਗਿਆ ਕਿ ਇਨਫੋਰਸਮੈਂਟ ਡਾਇਰੈਕਟੋਰੇਟ ਦੇ ਸਪੈਸ਼ਲ ਡਾਇਰੈਕਟਰ ਪੱਧਰ ਦੇ ਅਧਿਕਾਰੀ ਜਾਂਚ ਕਮੇਟੀ ਦੇ ਮੁਖੀ ਹੋਣਗੇ।
ਭਾਜਪਾ ਪ੍ਰਧਾਨ ਜੇਪੀ ਨੱਡਾ ਨੇ ਬੀਤੇ ਦਿਨੀਂ ਇਕ ਵਰਚੂਅਲ ਰੈਲੀ ਵਿਚ ਵੀ ਕਾਂਗਰਸ ਦੀ ਅੰਤਰਿਮ ਪ੍ਰਧਾਨ ਸੋਨੀਆ ਗਾਂਧੀ, ਰਾਹੁਲ ਗਾਂਧੀ ਅਤੇ ਕਾਂਗਰਸ ‘ਤੇ ਇਲਜ਼ਾਮ ਲਗਾਉਂਦੇ ਹੋਏ ਕਿਹਾ ਸੀ, ‘ਮੈਨੂੰ ਜਾਣ ਕੇ ਹੈਰਾਨੀ ਹੋਈ ਕਿ 2005-06 ਵਿਚ ਰਾਜੀਵ ਗਾਂਧੀ ਫਾਂਊਡੇਸ਼ਨ ਨੂੰ ਚੀਨੀ ਦੂਤਾਵਾਸ ਅਤੇ ਚੀਨ ਵੱਲੋਂ 3 ਲੱਖ ਡਾਲਰ ਚੰਦੇ ਦੇ ਰੂਪ ਵਿਚ ਮਿਲੇ ਸੀ। ਇਹ ਕਾਂਗਰਸ ਅਤੇ ਚੀਨ ਵਿਚਕਾਰ ਗੁਪਤ ਰਿਸ਼ਤਾ ਹੈ’।
ਨੱਡਾ ਨੇ ਕਿਹਾ ਸੀ, ‘2017 ਵਿਚ ਡੋਕਲਾਮ ਵਿਵਾਦ ਦੇ ਸਮੇਂ ਰਾਹੁਲ ਗਾਂਧੀ ਚੀਨੀ ਰਾਜਦੂਤ ਨਾਲ ਚੁੱਪ-ਚਪੀਤੇ ਮੁਲਾਕਾਤ ਕਰਦੇ ਹਨ ਅਤੇ ਉਹਨਾਂ ਦੀ ਪਾਰਟੀ ਨੇ ਦੇਸ਼ ਨੂੰ ਗੁੰਮਰਾਹ ਕੀਤਾ। ਇਸ ਸਮੇਂ ਗਲਵਾਨ ਘਾਟੀ ਵਿਵਾਦ ਤੋਂ ਬਾਅਦ ਵੀ ਕਾਂਗਰਸ ਦੇਸ਼ ਨੂੰ ਗੁੰਮਰਾਹ ਕਰ ਰਹੀ ਹੈ’।
ਜ਼ਿਕਰਯੋਗ ਹੈ ਕਿ ਸਾਬਕਾ ਪ੍ਰਧਾਨ ਮੰਤਰੀ ਰਾਜੀਵ ਗਾਂਧੀ ਦੇ ਨਾਮ ਨਾਲ ਇਸ ਫਾਂਊਡੇਸ਼ਨ ਦੀ ਸ਼ੁਰੂਆਤ 21 ਜੂਨ 1991 ਨੂੰ ਕੀਤੀ ਗਈ ਸੀ। ਰਾਜੀਵ ਗਾਂਧੀ ਫਾਂਊਡੇਸ਼ਨ ਦੀ ਵੈੱਬਸਾਈਟ ਅਨੁਸਾਰ 1991 ਤੋਂ 2009 ਤੱਕ ਫਾਂਊਡੇਸ਼ਨ ਨੇ ਸਮਾਜ ਦੇ ਵੱਖ-ਵੱਖ ਖੇਤਰਾਂ ਵਿਚ ਕੰਮ ਕੀਤਾ ਹੈ।