'ਨੈਸ਼ਨਲ ਕਾਨਫ਼ਰੰਸ ਪੜ੍ਹੇ-ਲਿਖੇ ਸਿੱਖ ਨੌਜਵਾਨਾਂ ਨੂੰ ਬਰਾਬਰ ਮੌਕੇ ਮੁਹੱਈਆ ਕਰਵਾਉਣ ਲਈ ਪ੍ਰਤੀਬੱਧ'
ਸ੍ਰੀਨਗਰ: ਜੰਮੂ ਤੇ ਕਸ਼ਮੀਰ ਨੈਸ਼ਨਲ ਕਾਨਫ਼ਰੰਸ ਦੇ ਪ੍ਰਧਾਨ ਡਾ. ਫ਼ਾਰੂਕ ਅਬਦੁੱਲ੍ਹਾ ਨੇ ਕਿਹਾ ਹੈ ਕਿ ਜੰਮੂ-ਕਸ਼ਮੀਰ ਦੇ ਇਤਿਹਾਸ ’ਤੇ ਸਿੱਖਾਂ ਨੇ ਅਮਿਟ ਛਾਪ ਛੱਡੀ ਹੈ। ਉਹ ਇਸ ਖ਼ਿੱਤੇ ਦੀਆਂ ਰਵਾਇਤਾਂ ਨਾਲ ਵੀ ਦ੍ਰਿੜ੍ਹਤਾ ਨਾਲ ਜੁੜੇ ਰਹੇ ਹਨ ਅਤੇ ਔਖੇ ਵੇਲੇ ਵੀ ਉਨ੍ਹਾਂ ਨੇ ਆਪਸੀ ਏਕਤਾ ਤੇ ਫ਼ਿਰਕੂ ਭਾਈਚਾਰੇ ਦਾ ਪੱਲਾ ਕਦੇ ਨਹੀਂ ਛਡਿਆ।
ਡਾ. ਅਬਦੁੱਲ੍ਹਾ ਖੜ੍ਹੀ ਪੂਛ ਵਿਖੇ ਸੰਤ ਭਾਈ ਬਹਾਦਰ ਸਿੰਘ ਜੀ ਯਾਦਗਾਰੀ ਧਰਮਸ਼ਾਲਾ ’ਚ ਇਕ ਗੁਰਮਤਿ ਸਮਾਗਮ ਨੂੰ ਸੰਬੋਧਨ ਕਰ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਸਿੱਖਾਂ ਵਲੋਂ ਪਾਏ ਗਏ ਅਣਗਿਣਤ ਯੋਗਦਾਨਾਂ ਸਦਕਾ ਹੀ ਇਸ ਖੇਤਰ ਦਾ ਇਕ ਵਿਲੱਖਣ ਸਭਿਆਚਾਰਕ ਭੂ-ਦ੍ਰਿਸ਼ ਕਾਇਮ ਹੋਇਆ ਹੈ ਅਤੇ ਅਨੇਕ ਵਾਰ ਭੀੜ ਪੈਣ ਦੇ ਬਾਵਜੂਦ ਉਨ੍ਹਾਂ ਨੇ ਆਸ ਤੇ ਏਕਤਾ ਦੇ ਚਾਨਣ-ਮੁਨਾਰੇ ਦਾ ਕੰਮ ਕੀਤਾ ਹੈ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਨੈਸ਼ਨਲ ਕਾਨਫ਼ਰੰਸ ਪੜ੍ਹੇ-ਲਿਖੇ ਸਿੱਖ ਨੌਜਵਾਨਾਂ ਨੂੰ ਬਰਾਬਰ ਮੌਕੇ ਮੁਹੱਈਆ ਕਰਵਾਉਣ ਲਈ ਪ੍ਰਤੀਬੱਧ ਹੈ। ‘ਅਸੀਂ ਇਕ ਅਜਿਹਾ ਸਮਾਜ ਸਿਰਜਦੇ ਰਹਾਂਗੇ, ਜਿਥੇ ਸਾਰੇ ਵਰਗਾਂ ਦੀ ਬਰਾਬਰ ਸ਼ਮੂਲੀਅਤ ਹੋਵੇ ਤੇ ਸੱਭ ਦਾ ਸੁਆਗਤ ਹੋਵੇ।’
ਇਸ ਮੌਕੇ ਡਾ. ਫ਼ਾਰੂਕ ਅਬਦੁੱਲ੍ਹਾ ਨਾਲ ਪਾਰਟੀ ਦੇ ਸੰਸਦ ਮੈਂਬਰ ਮੀਆਂ ਅਲਤਾਫ਼ ਅਹਿਮਦ, ਜੰਮੂ ਦੇ ਸੂਬਾਈ ਪ੍ਰਧਾਨ ਰਤਨ ਲਾਲ ਗੁਪਤਾ, ਵਾਈਐਨਸੀ ਸੂਬਾਈ ਪ੍ਰਧਾਨ ਐਜਾਜ਼ ਜਾਨ, ਘੱਟ ਗਿਣਤੀ ਵਿੰਗ ਦੇ ਕੋਆਰਡੀਨੇਟਰ ਜਗਦੀਸ਼ ਸਿੰਘ ਆਜ਼ਾਦ ਤੇ ਹੋਰ ਪਤਵੰਤੇ ਸੱਜਣ ਮੌਜੂਦ ਸਨ।
