ਮ੍ਰਿਤਕ ਦੀ ਪਛਾਣ 60 ਸਾਲ ਦੇ ਰਾਜੂ ਦੇ ਰੂਪ 'ਚ ਹੋਈ
ਨਵੀਂ ਦਿੱਲੀ : ਦਿੱਲੀ ਦੇ ਦਵਾਰਕਾ ਸੈਕਟਰ-19 ’ਚ ਇਕ ਬਜ਼ੁਰਗ ਵਿਅਕਤੀ ਨੂੰ ਅਵਾਰਾ ਕੁੱਤਿਆਂ ਦੇ ਝੁੰਡ ਨੇ ਵੱਢ-ਵੱਢ ਕੇ ਮਾਰ ਦਿਤਾ। ਅਧਿਕਾਰੀਆਂ ਨੇ ਦਸਿਆ ਕਿ ਮ੍ਰਿਤਕ ਦੀ ਪਛਾਣ 60 ਸਾਲ ਦੇ ਰਾਜੂ ਦੇ ਰੂਪ ’ਚ ਹੋਈ ਜਿਸ ਨੂੰ ਗੰਭੀਰ ਹਾਲਤ ’ਚ ਹਸਪਤਾਲ ਲਿਜਾਇਆ ਗਿਆ, ਪਰ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। ਇਹ ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਮੰਗਲਵਾਰ ਦੇਰ ਰਾਤ ਅਵਾਰਾ ਕੁੱਤਿਆਂ ਦੇ ਇਕ ਸਮੂਹ ਨੇ ਰਾਜੂ ਉਤੇ ਹਮਲਾ ਕੀਤਾ।
ਪੁਲਿਸ ਨੇ ਦਸਿਆ ਕਿ ਖ਼ੁਦ ਨੂੰ ਬਚਾਉਣ ਦੀ ਕੋਸ਼ਿਸ਼ ’ਚ, ਉਹ ਨੇੜਲੇ ਪਾਰਕ ਵਿਚ ਛਾਲ ਮਾਰ ਗਿਆ, ਪਰ ਕੁੱਤਿਆਂ ਨੇ ਉਸ ਨੂੰ ਘੇਰ ਲਿਆ, ਉਸ ਨੂੰ ਜ਼ਮੀਨ ਉਤੇ ਖਿੱਚਿਆ, ਕੱਟਿਆ ਅਤੇ ਉਸ ਦੇ ਕਪੜੇ ਪਾੜ ਦਿਤੇ। ਰਾਹਗੀਰਾਂ ਤੋਂ ਸੂਚਨਾ ਮਿਲਣ ਉਤੇ ਪੁਲਿਸ ਮੌਕੇ ਉਤੇ ਪਹੁੰਚੀ ਅਤੇ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ।
ਪੁਲਿਸ ਨੇ ਪੀੜਤ ਦੀ ਪਛਾਣ ਦਿਹਾੜੀਦਾਰ ਮਜ਼ਦੂਰ ਵਜੋਂ ਕੀਤੀ, ਜਿਸ ਦਾ ਪਰਵਾਰ ਦਵਾਰਕਾ ਦੇ ਪਿੰਡ ਅੰਬਰਾਹੀ ’ਚ ਰਹਿੰਦਾ ਹੈ। ਪੋਸਟਮਾਰਟਮ ਤੋਂ ਬਾਅਦ ਲਾਸ਼ ਪਰਵਾਰ ਨੂੰ ਸੌਂਪ ਦਿਤੀ ਗਈ, ਜੋ ਅੰਤਿਮ ਸਸਕਾਰ ਲਈ ਉੱਤਰ ਪ੍ਰਦੇਸ਼ ਦੇ ਸੀਤਾਪੁਰ ਜ਼ਿਲ੍ਹੇ ਵਿਚ ਅਪਣੇ ਜੱਦੀ ਸਥਾਨ ਲਈ ਰਵਾਨਾ ਹੋਏ। ਜਾਂਚ ਦੌਰਾਨ ਪੁਲਿਸ ਨੂੰ ਪਤਾ ਲੱਗਾ ਕਿ ਰਾਜੂ ਅਕਸਰ ਘਰੇਲੂ ਝਗੜਿਆਂ ਤੋਂ ਬਾਅਦ ਅਪਣਾ ਘਰ ਛੱਡਣ ਤੋਂ ਬਾਅਦ ਇਕ ਸਾਲ ਤੋਂ ਵੱਧ ਸਮੇਂ ਤੋਂ ਸੜਕਾਂ ਅਤੇ ਫੁੱਟਪਾਥਾਂ ਉਤੇ ਰਹਿ ਰਿਹਾ ਸੀ। ਉਹ ਅਪਣੇ ਪਿੱਛੇ ਪਤਨੀ ਅਤੇ ਤਿੰਨ ਬੱਚੇ ਛੱਡ ਗਿਆ ਹੈ।
ਉਸ ਦੀ ਪਤਨੀ ਪਰਵਾਰ ਦੀ ਸਹਾਇਤਾ ਲਈ ਸੈਕਟਰ 11 ਦੀ ਇਕ ਸੁਸਾਇਟੀ ਵਿਚ ਘਰੇਲੂ ਸਹਾਇਕ ਵਜੋਂ ਕੰਮ ਕਰਦੀ ਹੈ। ਇਹ ਘਟਨਾ ਸੁਪਰੀਮ ਕੋਰਟ ਵਿਚ ਅਵਾਰਾ ਕੁੱਤਿਆਂ ਦੇ ਮੁੱਦੇ ਉਤੇ ਚੱਲ ਰਹੀ ਸੁਣਵਾਈ ਦੌਰਾਨ ਵਾਪਰੀ ਹੈ। ਸੁਪਰੀਮ ਕੋਰਟ ਕੁੱਤੇ ਪ੍ਰੇਮੀਆਂ ਵਲੋਂ ਦਾਇਰ ਪਟੀਸ਼ਨਾਂ ਸਮੇਤ ਦਾਇਰ ਪਟੀਸ਼ਨਾਂ ਉਤੇ ਦਲੀਲਾਂ ਸੁਣ ਰਹੀ ਹੈ, ਜਿਸ ਵਿਚ ਅਪਣੇ ਪਹਿਲੇ ਆਦੇਸ਼ਾਂ ਵਿਚ ਸੋਧ ਕਰਨ ਅਤੇ ਹੁਕਮਾਂ ਦੀ ਸਖਤੀ ਨਾਲ ਪਾਲਣਾ ਕਰਨ ਦੀ ਮੰਗ ਕੀਤੀ ਗਈ ਸੀ। (ਪੀਟੀਆਈ)
