ਫਸੇ ਪੁੱਤ ਨੂੰ ਮਾਂ ਨੇ ਸਕੂਟਰੀ 'ਤੇ 1400 ਕਿਲੋਮੀਟਰ ਦਾ ਸਫ਼ਰ ਕਰ ਕੇ ਘਰ ਲਿਆਂਦਾ
ਹੈਦਰਾਬਾਦ, 10 ਅਪ੍ਰੈਲ : ਮਾਂ ਅਪਣੇ ਬੱਚੇ ਲਈ ਕੁੱਝ ਵੀ ਕਰ ਸਕਦੀ ਹੈ। ਇਸ ਦੀ ਤਾਜ਼ਾ ਮਿਸਾਲ ਤੇਲੰਗਾਨਾ ਤੋਂ ਸਾਹਮਣੇ ਆਈ ਹੈ ਜਿਥੇ ਇਕ ਮਾਂ ਤਾਲਾਬੰਦੀ ਕਾਰਨ ਫਸੇ ਪੁੱਤ ਨੂੰ ਸਕੂਟਰੀ 'ਤੇ ਤਿੰਨ ਦਿਨਾਂ 'ਚ 1400 ਕਿਲੋਮੀਟਰ ਦਾ ਸਫ਼ਰ ਕਰ ਕੇ ਘਰ ਵਾਪਸ ਲਿਆਈ। ਅਸਲ 'ਚ ਉਸ ਦਾ ਪੁੱਤ ਤਾਲਾਬੰਦੀ ਕਾਰਨ ਆਂਧਰਾ ਪ੍ਰਦੇਸ਼ ਦੇ ਨੇਲੌਰ 'ਚ ਫਸ ਗਿਆ ਸੀ।
ਰਜ਼ੀਆ ਬੇਗ਼ਮ (48) ਸੋਮਵਾਰ ਸਵੇਰੇ ਸਥਾਨਕ ਪੁਲਿਸ ਦੀ ਇਜਾਜ਼ਤ ਨਾਲ ਲੈ ਕੇ ਇਕੱਲੀ ਹੀ ਸਕੂਟਰੀ 'ਤੇ ਸਵਾਰ ਹੋ ਕੇ ਨੈਲੌਰ ਗਈ ਅਤੇ ਅਪਣੇ ਛੋਟੇ ਬੇਟੇ ਨਾਲ ਬੁੱਧਵਾਰ ਸ਼ਾਮ ਨੂੰ ਵਾਪਸ ਘਰ ਆ ਗਈ। ਭਾਵੇਂ ਸਕੂਟਰੀ 'ਤੇ ਲਗਾਤਾਰ ਹੋਣ ਵਾਲੀ ਇਹ ਮੁਸ਼ਕਲ ਯਾਤਰਾ ਸੀ ਪਰ ਮਾਂ ਵਲੋਂ ਅਪਣੇ ਪੁੱਤ ਨੂੰ ਵਾਪਸ ਲਿਆਉਣ ਦੇ ਦ੍ਰਿੜ ਇਰਾਦੇ ਨੇ ਇਸ ਨੂੰ ਪੂਰਾ ਕਰ ਦਿਤਾ। ਰਜ਼ੀਆ ਬੇਗ਼ਮ ਨੇ ਪੀਟੀਆਈ ਨੂੰ ਦਸਿਆ ਕਿ ਰਾਤ ਵੇਲੇ ਸੜਕਾਂ 'ਤੇ ਟਰੈਫ਼ਿਕ ਦੀ ਘਾਟ ਕਾਰਨ ਸੁੰਨਸਾਨ ਰਾਹਾਂ 'ਤੇ ਡਰ ਲੱਗ ਰਿਹਾ ਸੀ।
scotter
ਰਜ਼ੀਆ ਬੇਗ਼ਮ ਨਿਜ਼ਾਮਾਬਾਦ ਜ਼ਿਲ੍ਹੇ ਦੇ ਬੋਧਨ ਕਸਬੇ 'ਚ ਇਕ ਸਰਕਾਰੀ ਸਕੂਲ ਦੀ ਹੈੱਡਮਿਸਟ੍ਰੈਸ ਹੈ। ਰਜ਼ੀਆ ਦੇ ਘਰਵਾਲੇ ਦੀ 15 ਸਾਲ ਪਹਿਲਾਂ ਹੀ ਮੌਤ ਹੋ ਚੁੱਕੀ ਹੈ ਅਤੇ ਉਹ ਅਪਣੇ ਦੋ ਬੱਚਿਆਂ ਨਾਲ ਰਹਿ ਰਹੀ ਹੈ। ਉਸ ਦਾ ਇਕ ਲੜਕਾ ਇੰਜੀਨੀਅਰਿੰਗ ਗ੍ਰੈਜੂਏਟ ਹੈ ਅਤੇ ਦੂਸਰਾ 19 ਸਾਲਾ ਨਿਜ਼ਾਮੂਦੀਨ ਨਾਲ ਐਮਬੀਬੀਐਸ ਵਿਚ ਦਾਖ਼ਲਾ ਲੈਣ ਲਈ ਤਿਆਰੀ ਕਰ ਰਿਹਾ ਹੈ। ਅਸਲ 'ਚ ਨਿਜ਼ਾਮੂਦੀਨ 12 ਮਾਰਚ ਨੂੰ ਅਪਣੇ ਦੋਸਤ ਨੂੰ ਛੱਡਣ ਲਈ ਨੈਲੌਰ ਜ਼ਿਲ੍ਹੇ ਦੇ ਰਹਿਮਤਬਾਦ ਗਿਆ ਸੀ ਅਤੇ ਉਥੇ ਹੀ ਰੁਕ ਗਿਆ ਸੀ। ਇਸ ਦੌਰਾਨ ਕੋਰੋਨਾ ਵਾਇਰਸ ਦੇ ਕਾਹਿਰ ਕਾਰਨ ਦੇਸ਼ 'ਚ ਤਾਲਾਬੰਦੀ ਦਾ ਐਲਾਨ ਕੀਤਾ ਗਿਆ ਸੀ ਅਤੇ ਉਹ ਵਾਪਸ ਨਹੀਂ ਆ ਸਕਿਆ ਸੀ।
ਜਿਸ ਤੋਂ ਬਾਅਦ ਉਹ ਘਰ ਆਉਣ ਲਈ ਕਾਫ਼ੀ ਉਤਸੁਕ ਸੀ ਪਰ ਤਾਲਾਬੰਦੀ ਕਾਰਨ ਉਹ ਘਰ ਵਾਪਸ ਨਹੀਂ ਆ ਸਕਦਾ ਸੀ ਜਿਸ ਕਾਰਨ ਉਸ ਦੀ ਮਾਂ ਨੇ ਉਸ ਵਾਪਸ ਘਰ ਲਿਆਉਣ ਲਈ ਪੁਲਿਸ ਤੋਂ ਆਗਿਆ ਲਈ ਅਤੇ ਤਿੰਨ ਦਿਨਾਂ 'ਚ ਉਸ ਨੂੰ ਘਰ ਵਾਪਸ ਲੈ ਆਈ। ਉਸ ਨੇ ਅਪਣੇ ਵੱਡੇ ਪੁੱਤਰ ਨੂੰ ਇਸ ਲਈ ਨਹੀਂ ਭੇਜਿਆ ਕਿ ਤਾਲਾਬੰਦੀ ਕਾਰਨ ਪੁਲਿਸ ਉਸ ਨੂੰ ਹਿਰਾਸਤ 'ਚ ਲੈ ਸਕਦੀ ਸੀ।
(ਪੀ.ਟੀ.ਆਈ)
