Delhi News : ਨਿਵੇਸ਼ ਨਾਲ ਚੀਨ ਮੁਕਾਬਲੇ ਭਾਰਤ ਨੂੰ ਅਪਣੀ ਕੌਮੀ ਸੁਰੱਖਿਆ ਦੀ ਕੀਮਤ ਚੁਕਾਉਣੀ ਪੈ ਸਕਦੀ ਹੈ
Delhi News : ਕਾਂਗਰਸ ਨੇ ਮੰਗਲਵਾਰ ਨੂੰ ਦੋਸ਼ ਲਾਇਆ ਕਿ ਅਡਾਨੀ ਸਮੂਹ ਦੇ ਵਿਦੇਸ਼ੀ ਨਿਵੇਸ਼ ਦੇ ਤਰੀਕੇ ਭਾਰਤ ਦੀ ਕੌਮੀ ਸੁਰੱਖਿਆ ਲਈ ਨੁਕਸਾਨਦੇਹ ਹਨ ਅਤੇ ਇਸ ਤਰ੍ਹਾਂ ਦੇ ਨਿਵੇਸ਼ ਨਾਲ ਚੀਨ ਮੁਕਾਬਲੇ ਭਾਰਤ ਨੂੰ ਅਪਣੀ ਕੌਮੀ ਸੁਰੱਖਿਆ ਦੀ ਕੀਮਤ ਚੁਕਾਉਣੀ ਪੈ ਸਕਦੀ ਹੈ। ਕਾਂਗਰਸ ਪਾਰਟੀ ਦੇ ਜਨਰਲ ਸਕੱਤਰ ਜੈਰਾਮ ਰਮੇਸ਼ ਨੇ ਇਹ ਵੀ ਦਾਅਵਾ ਕੀਤਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ‘ਵਿਸ਼ੇਸ਼ ਦੋਸਤੀ’ ਪਹਿਲਾਂ ਹੀ ਭਾਰਤ ਨੂੰ ਘਰੇਲੂ ਅਤੇ ਵਿਸ਼ਵ ਪੱਧਰ ’ਤੇ ਕਈ ਵਾਰ ਨੁਕਸਾਨ ਪਹੁੰਚਾ ਚੁਕੀ ਹੈ। ਅਮਰੀਕਾ ਸਥਿਤ ‘ਹਿੰਡਨਬਰਗ ਰੀਸਰਚ’ ਦੀ ਰੀਪੋਰਟ ਤੋਂ ਬਾਅਦ ਕਾਂਗਰਸ ਲਗਾਤਾਰ ਅਡਾਨੀ ਸਮੂਹ ’ਤੇ ਬੇਨਿਯਮੀਆਂ ਅਤੇ ਇਜਾਰੇਦਾਰੀ ਦੇ ਦੋਸ਼ ਲਗਾ ਰਹੀ ਹੈ, ਹਾਲਾਂਕਿ ਇਸ ਕਾਰੋਬਾਰੀ ਸਮੂਹ ਨੇ ਸਾਰੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ।
ਰਮੇਸ਼ ਨੇ ਇਕ ਬਿਆਨ ’ਚ ਦੋਸ਼ ਲਾਇਆ, ‘‘19 ਜੂਨ, 2020 ਨੂੰ ਪ੍ਰਧਾਨ ਮੰਤਰੀ ਵਲੋਂ ਚੀਨ ਨੂੰ ਕਲੀਨ ਚਿੱਟ ਦੇਣਾ ਕਿਸੇ ਵੀ ਭਾਰਤੀ ਪ੍ਰਧਾਨ ਮੰਤਰੀ ਵਲੋਂ ਦਿਤੇ ਗਏ ਸੱਭ ਤੋਂ ਨੁਕਸਾਨਦੇਹ ਬਿਆਨਾਂ ’ਚੋਂ ਇਕ ਸੀ। ਇਹ ਇਕ ਚਿੱਟਾ ਝੂਠ ਸੀ ਜਿਸ ਨੇ ਸਾਡੀ ਸਥਿਤੀ ਨੂੰ ਕਮਜ਼ੋਰ ਕੀਤਾ ਅਤੇ ਚੀਨੀਆਂ ਨੂੰ ਸਾਡੀ ਸਰਹੱਦ ਦੀ ਉਲੰਘਣਾ ਅਤੇ ਜ਼ਮੀਨ ’ਤੇ ਨਿਰੰਤਰ ਕਬਜ਼ੇ ਦੀ ਅਸਲੀਅਤ ਤੋਂ ਇਨਕਾਰ ਕਰਨ ਦੇ ਯੋਗ ਬਣਾਇਆ।’’
ਉਨ੍ਹਾਂ ਦਾਅਵਾ ਕੀਤਾ ਕਿ ਉਦੋਂ ਤੋਂ ਚੀਨ ਦਾ ਬੇਕਾਬੂ ਆਯਾਤ, ਨਿਵੇਸ਼ ਅਤੇ ਪ੍ਰਵਾਸ ਦੇ ਜੋਖਮਾਂ ਪ੍ਰਤੀ ਸਰਕਾਰ ਦੀ ਲਾਪਰਵਾਹੀ ਵੀ ਸਾਹਮਣੇ ਆਈ ਹੈ। ਰਮੇਸ਼ ਨੇ ਕਿਹਾ, ‘‘ਅਡਾਨੀ ਸਮੂਹ ਚੀਨ ’ਚ ਨਿਵੇਸ਼ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ, ਅਜਿਹਾ ਲਗਦਾ ਹੈ ਕਿ ਚੀਨ ਨੂੰ ਦਿਤੀ ਗਈ ‘ਕਲੀਨ ਚਿੱਟ’ ਉਸ ਲਈ ‘ਸਮਰਥਨ ਪੱਤਰ’ ਹੋਣ ਜਾ ਰਹੀ ਹੈ।’’ ਉਨ੍ਹਾਂ ਕਿਹਾ ਕਿ ਸੱਭ ਤੋਂ ਪਹਿਲਾਂ ਇਹ ਧਿਆਨ ਵਿਚ ਰਖਣਾ ਚਾਹੀਦਾ ਹੈ ਕਿ ਚੀਨ ਪ੍ਰਤੀ ਇਸ ਸਰਕਾਰ ਦੀ ਆਰਥਕ ਨੀਤੀ ਬਣਾਉਣਾ ਹਮੇਸ਼ਾ ਅਣਉਚਿਤ ਰਿਹਾ ਹੈ।
ਉਨ੍ਹਾਂ ਕਿਹਾ, ‘‘ਸਾਡੀਆਂ ਸਰਹੱਦਾਂ ’ਤੇ ਅਤੇ ਸਾਡੀ ਜ਼ਮੀਨ ਦੇ ਅੰਦਰ ਚੀਨੀ ਫ਼ੌਜੀਆਂ ਦੀ ਕੌਮੀ ਸੁਰੱਖਿਆ ਦੇ ਵਧਦੇ ਖਤਰੇ ਦੇ ਬਾਵਜੂਦ ਭਾਰਤ ਸਰਕਾਰ ਇਸ ਸਬੰਧ ’ਚ ਸੁਸਤੀ ਵਰਤ ਰਹੀ ਹੈ। ਟਿਕਟਾਕ ’ਤੇ ਪਾਬੰਦੀ ਲਗਾਈ ਗਈ ਹੈ ਪਰ ਆਯਾਤ ਵਧ ਰਹੀ ਹੈ ਅਤੇ ਘਰੇਲੂ ਪੱਧਰ ’ਤੇ ਤਬਾਹੀ ਮਚਾਈ ਹੈ।’’ ਕਾਂਗਰਸ ਜਨਰਲ ਸਕੱਤਰ ਨੇ ਦਾਅਵਾ ਕੀਤਾ ਕਿ ਸਰਕਾਰ ਨੇ ਭਾਰਤ ਵਿਚ ਚੀਨੀ ਕਾਮਿਆਂ ਲਈ ‘ਫਾਸਟ ਟਰੈਕ’ ਵੀਜ਼ਾ ਵੀ ਪੇਸ਼ ਕੀਤਾ ਹੈ ਅਤੇ ਚੀਨੀ ਨਿਵੇਸ਼ ਨੂੰ ਉਤਸ਼ਾਹਤ ਕੀਤਾ ਹੈ।
ਉਨ੍ਹਾਂ ਦੋਸ਼ ਲਾਇਆ, ‘‘ਅਡਾਨੀ ਸਮੂਹ ਦਾ ਚੀਨ ਅਤੇ ਪੂਰਬੀ ਏਸ਼ੀਆ ’ਚ ਪਿਛਲਾ ਕੰਮ ਬਹੁਤ ਸ਼ੱਕੀ ਰਿਹਾ ਹੈ। ਤਾਈਵਾਨ ਦੇ ਕਾਰੋਬਾਰੀ ਚਾਂਗ ਚੁੰਗ-ਲਿੰਗ ਅਡਾਨੀ ਸਮੂਹ ਦੀਆਂ ਕਈ ਕੰਪਨੀਆਂ ’ਚ ਡਾਇਰੈਕਟਰ ਦੇ ਤੌਰ ’ਤੇ ਕੰਮ ਕਰ ਚੁਕੇ ਹਨ। ਸਾਲ 2017 ’ਚ ਚੁੰਗ-ਲਿੰਗ ਦੇ ਪਰਵਾਰ ਦੀ ਮਲਕੀਅਤ ਵਾਲੇ ਇਕ ਜਹਾਜ਼ ਨੂੰ ਸੰਯੁਕਤ ਰਾਸ਼ਟਰ ਦੀਆਂ ਪਾਬੰਦੀਆਂ ਦੀ ਉਲੰਘਣਾ ਕਰਦਿਆਂ ਉੱਤਰੀ ਕੋਰੀਆ ’ਚ ਤੇਲ ਦੀ ਤਸਕਰੀ ਕਰਦੇ ਹੋਏ ਫੜਿਆ ਗਿਆ ਸੀ।’’
ਰਮੇਸ਼ ਨੇ ਇਹ ਵੀ ਦੋਸ਼ ਲਾਇਆ ਕਿ ਪਿਛਲੇ ਕੁੱਝ ਸਾਲਾਂ ’ਚ ਅਡਾਨੀ ਦੇ ਵਿਦੇਸ਼ੀ ਨਿਵੇਸ਼ਾਂ ਦਾ ਇਕ ਪੈਟਰਨ ਵੇਖਿਆ ਗਿਆ ਹੈ ਜੋ ਅਕਸਰ ਕੌਮੀ ਹਿੱਤਾਂ ਨੂੰ ਕਮਜ਼ੋਰ ਕਰਦਾ ਹੈ ਅਤੇ ਭਾਰਤ ਲਈ ਨੁਕਸਾਨਦੇਹ ਹੁੰਦਾ ਹੈ। ਰਮੇਸ਼ ਦਾ ਦਾਅਵਾ ਹੈ, ‘‘ਅਜਿਹਾ ਲਗਦਾ ਹੈ ਕਿ ਵਿਦੇਸ਼ ਨੀਤੀ ਤੋਂ ਇਲਾਵਾ ‘ਮੋਦਾਨੀ’ ਦਾ ਵਿਦੇਸ਼ੀ ਨਿਵੇਸ਼ ਹੁਣ ਚੀਨ ਨਾਲੋਂ ਭਾਰਤ ਦੀ ਕੌਮੀ ਸੁਰੱਖਿਆ ਨੂੰ ਜ਼ਿਆਦਾ ਨੁਕਸਾਨ ਪਹੁੰਚਾ ਸਕਦਾ ਹੈ।’’
(For more news apart from Adani's foreign investment harmful to India's national security : Congress News in Punjabi, stay tuned to Rozana Spokesman)
