ਚਮੜੀ ਰੋਗ ਦੇ ਇਲਾਜ ਲਈ ਵਰਤਿਆ ਜਾਂਦਾ ਹੈ 'ਆਈਟੋਲੀਜੁਮੈਬ' ਟੀਕਾ
ਨਵੀਂ ਦਿੱਲੀ, 11 ਜੁਲਾਈ : ਭਾਰਤ ਦੇ ਡਰੱਗ ਕੰਟਰੋਲਰ ਜਨਰਲ ਨੇ ਚਮੜੀ ਰੋਗ ਦੇ ਇਲਾਜ 'ਚ ਕੰਮ ਆਉਣ ਵਾਲੇ 'ਆਈਟੋਲੀਜੁਮੈਬ' ਟੀਕੇ ਦਾ ਕੋਵਿਡ 19 ਦੇ ਉਨ੍ਹਾਂ ਮਰੀਜ਼ਾਂ ਦੇ ਇਲਾਜ 'ਚ ਸੀਮਤ ਵਰਤੋਂ ਕੀਤੇ ਜਾਣ ਦੀ ਮਨਜ਼ੂਰੀ ਦੇ ਦਿਤੀ ਹੈ ਜਿਨ੍ਹਾਂ ਨੂੰ ਸਾਹ ਲੈਣ 'ਚ ਮੱਧਮ ਅਤੇ ਗੰਭੀਰ ਪੱਧਰ ਦੀ ਮੁਸ਼ਕਲ ਹੋਵੇ। ਕੇਂਦਰੀ ਸਿਹਤ ਮੰਤਰਾਲੇ ਨੇ ਸਨਿਚਰਵਾਰ ਨੂੰ ਇਹ ਜਾਣਕਾਰੀ ਦਿਤੀ। ਕੋਵਿਡ 19 ਦੇ ਇਲਾਜ ਦੀਆਂ ਮੈਡੀਕਲ ਜ਼ਰੂਰਤਾਂ 'ਤੇ ਵਿਚਾਰ ਕਰਦੇ ਹੋਏ ਭਾਰਤ ਦੇ ਡਰੱਗ ਕੰਟਰੋਲਰ ਜਨਰਲ (ਡੀਸੀਜੀਆਈ) ਡਾ. ਵੀ.ਜੀ. ਸੋਮਾਨੀ ਨੇ ਕੋਰੋਨਾ ਵਾਇਰਸ ਕਾਰਨ ਸ੍ਰੀਰ ਦੇ ਅੰਗਾਂ ਨੂੰ ਆਕਸੀਜਨ ਨਾ ਮਿਲਣ ਦੀ ਗੰਭੀਰ ਵਿਵਸਥਾ ਦੇ ਇਲਾਜ 'ਚ ਐਮਰਜੈਂਸੀ ਸਥਿਤੀ 'ਚ ਮੋਨੋਕਲੋਨਲ ਐਂਟੀਬਾਡੀ ਟੀਕਾ 'ਆਈਟੋਲੀਜੁਮੈਬ' ਦੇ ਸੀਮਤ ਇਸਤੇਮਾਲ ਦੀ ਮਨਜ਼ੂਰੀ ਦੇ ਦਿਤੀ ਹੈ।
ਸਿਹਤ ਮੰਤਰਾਲੇ ਨੇ ਦਸਿਆ ਕਿ ਘਰੇਲੂ ਜੈਵ ਦਵਾਈ ਕੰਪਨੀ ਬਾਏਕਾਨ ਅਲਜ਼ੁਮੈਬ ਬ੍ਰਾਂਡ ਨਾਂ ਦੇ ਤਹਿਤ 2013 ਤੋਂ ਇਸ ਦਵਾਈ ਦਾ ਨਿਰਮਾਣ ਅਤੇ ਸਪਲਾਈ ਕਰ ਰਹੀ ਹੈ। ਇਸ ਨੇ ਇਕ ਬਿਆਨ ਵਿਚ ਕਿਹਾ, ''ਇਸ ਸਵਦੇਸ਼ੀ ਦਵਾਈ ਦੀ ਹੁਣ ਕੋਵਿਡ 19 ਦੇ ਇਲਾਜ ਲਈ ਚੋਣ ਕੀਤੀ ਗਈ ਹੈ।'' ਇਸ ਦਵਾਈ ਕੰਪਨੀ ਨੇ ਦੂਜੇ ਗੇੜ ਦੇ ਮੈਡੀਕਲ ਟੈਸਟ ਦੇ ਨਤੀਜੇ ਡਰੱਗ ਕੰਟਰੋਲਰ ਨੂੰ ਭੇਜੇ ਜਿਸ 'ਤੇ ਡੀਸੀਜੀਆਈ ਦਫ਼ਤਰ ਦੀ ਵਿਸ਼ਾ ਮਾਹਰ ਕਮੇਟੀ ਨੇ ਚਰਚਾ ਕੀਤੀ। ਬਿਆਨ ਵਿਚ ਕਿਹਾ ਗਿਆ ਹੈ, ''ਵਿਸਥਾਰ ਨਾਲ ਚਰਚਾ ਅਤੇ ਕਮੇਟੀ ਦੀਆਂ ਸਿਫ਼ਾਰਸ਼ਾਂ 'ਤੇ ਵਿਚਾਰ ਕਰਨ ਦੇ ਬਾਅਦ ਡੀਸੀਜੀਆਈ ਨੇ ਇਸ ਦਵਾਈ ਦਾ ਕੋਵਿਡ 19 ਦੇ ਉਨ੍ਹਾਂ ਮਰੀਜ਼ਾਂ ਦੇ ਇਲਾਜ 'ਚ ਸੀਮਤ ਇਸਤੇਮਾਲ ਕੀਤੇ ਜਾਣ ਦੀ ਮਨਜ਼ੂਰੀ ਦੇ ਦਿਤੀ ਹੈ।
ਇਸ ਸਬੰਧ 'ਚ ਇਕ ਅਧਿਕਾਰੀ ਨੇ ਦਸਿਆ, ''ਏਮਜ਼ ਸਮੇਤ ਹੋਰ ਹਸਪਤਾਲਾਂ ਦੇ ਸਾਹ ਰੋਗ ਮਾਹਰ, ਡਰੱਗ ਵਿਗਿਆਨੀਆਂ ਅਤੇ ਦਵਾ ਮਾਹਰਾਂ ਦੀ ਕਮੇਟੀ ਵਲੋਂ ਭਾਰਤ 'ਚ ਕੋਵਿਡ 19 ਮਰੀਜ਼ਾਂ 'ਤੇ ਮੈਡੀਕਲ ਟੈਸਟਾਂ ਦੀ ਸੰਤੁਸ਼ਟੀ ਹੋਣ ਦੇ ਬਾਅਦ ਹੀ ਇਸ ਟੀਕੇ ਦੇ ਇਸਤੇਮਾਲ ਨੂੰ ਮਨਜ਼ੂਰੀ ਦਿਤੀ ਗਈ ਹੈ।'' ਉਨ੍ਹਾਂ ਨੇ ਦਸਿਆ ਕਿ ਦਵਾਈ ਦੇ ਇਸਤੇਮਾਲ ਨਾਲ ਪਹਿਲਾਂ ਹਰ ਮਰੀਜ਼ ਨੂੰ ਲਿਖਿਤ 'ਚ ਸਹਿਮਤੀ ਦੇਣੀ ਪਵੇਗੀ। ਇਸ ਸਵਦੇਸ਼ੀ ਟੀਕੇ 'ਆਈਟੋਲੀਜੁਮੈਬ' ਦੇ ਇਸਤੇਮਾਲ ਦਾ ਔਸਤ ਖ਼ਰਚ ਹੋਰ ਦਵਾਈਆਂ ਦੇ ਮੁਕਾਬਲੇ ਘੱਟ ਹੈ।