Chhattisgarh News : ਹੱਥਾਂ ਦੇ ਨਹੁੰ ਖਿੱਚੇ ਅਤੇ ਬਿਜਲੀ ਦੇ ਝਟਕੇ ਲਗਾਏ
Chhattisgarh News in Punjabi : ਛੱਤੀਸਗੜ੍ਹ ਦੇ ਕੋਰਬਾ ਜ਼ਿਲ੍ਹੇ ’ਚ ਆਈਸਕ੍ਰੀਮ ਫੈਕਟਰੀ ਦੇ ਦੋ ਕਾਮਿਆਂ ਨੂੰ ਉਨ੍ਹਾਂ ਦੇ ਮਾਲਕ ਅਤੇ ਉਸ ਦੇ ਸਹਿਯੋਗੀ ਨੇ ਕਥਿਤ ਤੌਰ ’ਤੇ ਤਸੀਹੇ ਦਿਤੇ ਅਤੇ ਚੋਰੀ ਦੇ ਸ਼ੱਕ ’ਚ ਉਨ੍ਹਾਂ ਦੇ ਨਹੁੰ ਕੱਢੇ ਅਤੇ ਉਨ੍ਹਾਂ ਨੂੰ ਬਿਜਲੀ ਦੇ ਝਟਕੇ ਲਗਾਏ। ਪੁਲਿਸ ਦੇ ਇਕ ਅਧਿਕਾਰੀ ਨੇ ਦਸਿਆ ਕਿ ਰਾਜਸਥਾਨ ਦੇ ਭੀਲਵਾੜਾ ਜ਼ਿਲ੍ਹੇ ਦੇ ਰਹਿਣ ਵਾਲੇ ਅਭਿਸ਼ੇਕ ਭੰਬੀ ਅਤੇ ਵਿਨੋਦ ਭੰਬੀ ਨੂੰ ਇਕ ਠੇਕੇਦਾਰ ਰਾਹੀਂ ਸਿਵਲ ਲਾਈਨਜ਼ ਥਾਣੇ ਦੇ ਅਧੀਨ ਖਾਪਰਾਭੱਟੀ ਇਲਾਕੇ ’ਚ ਛੋਟੂ ਗੁੱਜਰ ਦੀ ਆਈਸਕ੍ਰੀਮ ਫੈਕਟਰੀ ’ਚ ਕੰਮ ਕਰਨ ਲਈ ਰੱਖਿਆ ਗਿਆ ਸੀ।
14 ਅਪ੍ਰੈਲ ਨੂੰ ਗੁਰਜਰ ਅਤੇ ਉਸ ਦੇ ਸਾਥੀ ਮੁਕੇਸ਼ ਸ਼ਰਮਾ ਨੇ ਦੋਹਾਂ ਮਜ਼ਦੂਰਾਂ ’ਤੇ ਚੋਰੀ ਦਾ ਦੋਸ਼ ਲਾਇਆ। ਦੋਹਾਂ ਦੇ ਕਪੜੇ ਉਤਾਰ ਦਿਤੇ ਗਏ, ਬਿਜਲੀ ਦੇ ਝਟਕੇ ਦਿਤੇ ਗਏ ਅਤੇ ਉਨ੍ਹਾਂ ਦੇ ਨਹੁੰ ਖਿੱਚੇ ਗਏ। ਘਟਨਾ ਉਦੋਂ ਸਾਹਮਣੇ ਆਈ ਜਦੋਂ ਤਸੀਹਿਆਂ ਦਾ ਵੀਡੀਉ ਵਾਇਰਲ ਹੋ ਗਿਆ। ਵੀਡੀਉ ’ਚ ਇਕ ਅਰਧ ਨਗਨ ਵਿਅਕਤੀ ਨੂੰ ਬਿਜਲੀ ਦੇ ਝਟਕੇ ਦਿਤੇ ਜਾ ਰਹੇ ਹਨ ਅਤੇ ਕੁੱਟਿਆ ਜਾ ਰਿਹਾ ਹੈ।
ਹਾਲਾਂਕਿ ਦੋਵੇਂ ਪੀੜਤ ਕਿਸੇ ਤਰ੍ਹਾਂ ਭੱਜਣ ਅਤੇ ਭੀਲਵਾੜਾ ’ਚ ਅਪਣੇ ਜੱਦੀ ਸਥਾਨ ਪਹੁੰਚਣ ’ਚ ਕਾਮਯਾਬ ਹੋ ਗਏ। ਉਨ੍ਹਾਂ ਨੇ ਗੁਲਾਬਪੁਰਾ ਥਾਣੇ ’ਚ ਸ਼ਿਕਾਇਤ ਦਰਜ ਕਰਵਾਈ। ਰਾਜਸਥਾਨ ਪੁਲਿਸ ਨੇ ਜ਼ੀਰੋ ਐਫ.ਆਈ.ਆਰ. ਦਰਜ ਕੀਤੀ ਹੈ ਅਤੇ ਅਗਲੇਰੀ ਕਾਰਵਾਈ ਲਈ ਕੇਸ ਕੋਰਬਾ ਪੁਲਿਸ ਨੂੰ ਭੇਜ ਦਿਤਾ ਹੈ। ਜ਼ੀਰੋ ਐਫ.ਆਈ.ਆਰ. ਦੇ ਤਹਿਤ ਪੀੜਤ ਅਪਰਾਧ ਦੇ ਸਥਾਨ ਦੀ ਪਰਵਾਹ ਕੀਤੇ ਬਿਨਾਂ ਕਿਸੇ ਵੀ ਥਾਣੇ ’ਚ ਸ਼ਿਕਾਇਤਾਂ ਦਰਜ ਕਰਵਾ ਸਕਦੇ ਹਨ।
(For more news apart from Employer accused of torturing two of his workers on suspicion theft in Chhattisgarh News in Punjabi, stay tuned to Rozana Spokesman)
