ਅਯੁੱਧਿਆ ’ਚ ਰਾਮ ਮੰਦਰ ਉਸਾਰੀ ਨੂੰ ਲੈ ਕੇ ਰਾਮ ਜਨਮ ਭੂਮੀ ਤੀਰਥ ਖੇਤਰ ਟਰੱਸਟ ਦੀ ਸਨਿਚਰਵਾਰ ਨੂੰ ਬੈਠਕ ਹੋਈ
ਨਵੀਂ ਦਿੱਲੀ , 18 ਜੁਲਾਈ : ਅਯੁੱਧਿਆ ’ਚ ਰਾਮ ਮੰਦਰ ਉਸਾਰੀ ਨੂੰ ਲੈ ਕੇ ਰਾਮ ਜਨਮ ਭੂਮੀ ਤੀਰਥ ਖੇਤਰ ਟਰੱਸਟ ਦੀ ਸਨਿਚਰਵਾਰ ਨੂੰ ਬੈਠਕ ਹੋਈ। ਬੈਠਕ ’ਚ ਨੀਂਹ ਪੱਥਰ ਦੀ ਤਾਰੀਖ਼ ’ਤੇ ਚਰਚਾ ਹੋਈ। ਪ੍ਰਧਾਨ ਮੰਤਰੀ ਦਫ਼ਤਰ (ਪੀ.ਐਮ.ਓ) ਨੂੰ ਟਰੱਸਟ ਵਲੋਂ 3 ਅਗਸਤ ਅਤੇ 5 ਅਗੱਸਤ ਦੀ ਤਾਰੀਖ਼ ਭੇਜੀ ਗਈ ਹੈ। ਨੀਂਹ ਪੱਥਰ ਦੀ ਤਾਰੀਖ਼ ’ਤੇ ਆਖ਼ਰੀ ਫ਼ੈਸਲਾ ਪ੍ਰਧਾਨ ਮੰਤਰੀ ਦਫ਼ਤਰ ਕਰੇਗਾ।
ਇਸ ਤੋ ਇਲਾਵਾ ਬੈਠਕ ’ਚ ਮੰਦਰ ਦੀ ਉਚਾਈ ਅਤੇ ਉਸਾਰੀ ਦੀਆਂ ਵਿਵਸਥਾਵਾਂ ’ਤੇ ਵੀ ਚਰਚਾ ਹੋਈ। ਇਹ ਬੈਠਕ ਅਯੁੱਧਿਆ ਸਰਕਿਟ ਹਾਊਸ ’ਚ ਦੁਪਹਿਰ ਤਿੰਨ ਵਜੇ ਸ਼ੁਰੂ ਹੋਈ। ਕਰੀਬ ਢਾਈ ਘੰਟੇ ਤੱਕ ਟਰੱਸਟ ਦੀ ਬੈਠਕ ਚੱਲੀ। ਮੰਦਰ ਦੇ ਨਕਸ਼ੇ ’ਚ ਵੀ ਬਦਲਾਅ ਕੀਤਾ ਜਾਵੇਗਾ। ਹੁਣ ਮੰਦਰ ’ਚ 3 ਦੀ ਥਾਂ 5 ਗੁੰਬਦ ਹੋਣਗੇ। ਮੰਦਰ ਦੀ ਉਚਾਈ ਵੀ ਪ੍ਰਸਤਾਵਿਤ ਨਕਸ਼ੇ ਤੋਂ ਹੁਣ ਜ਼ਿਆਦਾ ਹੋਵੇਗੀ।
File Photo
ਟਰੱਸਟ ਦੇ ਜਨਰਲ ਸਕੱਤਰ ਚੰਪਤ ਰਾਏ ਨੇ ਕਿਹਾ ਕਿ ਹਾਲਾਤ ਆਮ ਹੋਣ ਤੋਂ ਬਾਅਦ ਫੰਡ ਇਕੱਠਾ ਕੀਤਾ ਜਾਵੇਗਾ। ਸਾਨੂੰ ਲਗਦਾ ਹੈ ਕਿ 3-3.5 ਸਾਲਾਂ ਦੇ ਅੰਦਰ ਮੰਦਰ ਦਾ ਨਿਰਮਾਣ ਪੂਰਾ ਹੋ ਜਾਵੇਗਾ। ਬੈਠਕ ’ਚ ਮੰਦਰ ਉਸਾਰੀ ਕਮੇਟੀ ਦੇ ਚੇਅਰਮੈਨ ਨਰਪਿੰਦਰ ਮਿਸ਼ਰਾ ਵੀ ਸ਼ਾਮਲ ਰਹੇ। ਦਰਅਸਲ, ਨਰਪਿੰਦਰ ਮਿਸ਼ਰਾ ਦੇ ਨਾਲ ਵੱਡੇ ਇੰਜੀਨੀਅਰਾਂ ਦਾ ਇਕ ਦਲ ਅਯੁੱਧਿਆ ’ਚ ਹੈ, ਜੋ ਮੰਦਰ ਉਸਾਰੀ ਦੀਆਂ ਬਾਰੀਕੀਆਂ ਨੂੰ ਦੇਖੇਗਾ। (ਪੀਟੀਆਈ)
