2024-25 ਲਈ 41 ਨਵੇਂ ਮੈਡੀਕਲ ਕਾਲਜਾਂ ਨੂੰ ਵੀ ਮਿਲੀ ਮਨਜ਼ੂਰੀ
ਨਵੀਂ ਦਿੱਲੀ: ਇਕ ਮਹੱਤਵਪੂਰਨ ਕਦਮ ’ਚ ਨੈਸ਼ਨਲ ਮੈਡੀਕਲ ਕਮਿਸ਼ਨ (ਐੱਨ.ਐੱਮ.ਸੀ.) ਨੇ ਅਕਾਦਮਿਕ ਸਾਲ 2024-25 ਲਈ 10,650 ਨਵੀਆਂ ਐਮ.ਬੀ.ਬੀ.ਐਸ. ਸੀਟਾਂ ਨੂੰ ਮਨਜ਼ੂਰੀ ਦੇ ਦਿਤੀ ਹੈ। ਇਹ ਵਾਧਾ ਭਾਰਤ ਵਿਚ ਮੈਡੀਕਲ ਸਿੱਖਿਆ ਦੀ ਉਪਲਬਧਤਾ ਨੂੰ ਵਧਾਉਣ ਲਈ ਇਕ ਵਿਆਪਕ ਰਣਨੀਤੀ ਦਾ ਹਿੱਸਾ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਸੁਤੰਤਰਤਾ ਦਿਵਸ 2024 ਉਤੇ ਪੰਜ ਸਾਲਾਂ ’ਚ 75,000 ਨਵੀਆਂ ਮੈਡੀਕਲ ਸੀਟਾਂ ਪੈਦਾ ਕਰਨ ਦਾ ਵਾਅਦਾ ਕੀਤਾ ਸੀ।
41 ਨਵੇਂ ਮੈਡੀਕਲ ਕਾਲਜਾਂ ਦੇ ਜੁੜਨ ਨਾਲ ਦੇਸ਼ ਵਿਚ ਮੈਡੀਕਲ ਸੰਸਥਾਵਾਂ ਦੀ ਕੁਲ ਗਿਣਤੀ 816 ਹੋ ਜਾਵੇਗੀ। ਐਨ.ਐਮ.ਸੀ. ਦੇ ਮੁਖੀ ਡਾ. ਅਭਿਜਾਤ ਸੇਠ ਅਨੁਸਾਰ ਅੰਡਰ ਗਰੈਜੂਏਟ (ਯੂ.ਜੀ.) ਸੀਟਾਂ ਵਧਾਉਣ ਲਈ ਪ੍ਰਾਪਤ ਹੋਈਆਂ 170 ਅਰਜ਼ੀਆਂ ’ਚੋਂ 41 ਸਰਕਾਰੀ ਕਾਲਜਾਂ ਅਤੇ 129 ਨਿੱਜੀ ਅਦਾਰਿਆਂ ਦੀਆਂ ਹਨ, ਕੁਲ 10,650 ਐਮ.ਬੀ.ਬੀ.ਐਸ. ਸੀਟਾਂ ਨੂੰ ਮਨਜ਼ੂਰੀ ਦਿਤੀ ਗਈ ਹੈ।
ਇਸ ਨਾਲ 2024-25 ਅਕਾਦਮਿਕ ਸਾਲ ਲਈ ਐਮ.ਬੀ.ਬੀ.ਐਸ. ਦੀਆਂ ਕੁਲ ਸੀਟਾਂ ਦੀ ਗਿਣਤੀ 1,37,600 ਹੋ ਜਾਵੇਗੀ, ਜਿਸ ਵਿਚ ਕੌਮੀ ਮਹੱਤਵ ਦੇ ਇੰਸਟੀਚਿਊਟਸ (ਆਈ.ਐਨ.ਆਈ.) ਦੀਆਂ ਸੀਟਾਂ ਵੀ ਸ਼ਾਮਲ ਹਨ। ਪੋਸਟ ਗਰੈਜੂਏਟ (ਪੀ.ਜੀ.) ਕੋਰਸਾਂ ਲਈ, ਐਨ.ਐਮ.ਸੀ. ਨੂੰ ਨਵੀਆਂ ਅਤੇ ਨਵੀਨੀਕਰਨ ਸੀਟਾਂ ਲਈ 3,500 ਤੋਂ ਵੱਧ ਅਰਜ਼ੀਆਂ ਪ੍ਰਾਪਤ ਹੋਈਆਂ ਹਨ।
ਡਾ. ਸੇਠ ਨੇ ਕਿਹਾ ਕਿ ਕਮਿਸ਼ਨ ਨੂੰ ਲਗਭਗ 5,000 ਪੀ.ਜੀ. ਸੀਟਾਂ ਦੇ ਵਾਧੇ ਦੀ ਉਮੀਦ ਹੈ, ਜਿਸ ਨਾਲ ਦੇਸ਼ ਭਰ ਵਿਚ ਪੀ.ਜੀ. ਦੀਆਂ ਕੁਲ ਸੀਟਾਂ 67,000 ਹੋ ਜਾਣਗੀਆਂ। ਇਸ ਸਾਲ ਅੰਡਰ ਗਰੈਜੂਏਟ ਅਤੇ ਪੀ.ਜੀ. ਦੋਹਾਂ ਸੀਟਾਂ ਵਿਚ ਕੁਲ ਵਾਧਾ ਲਗਭਗ 15,000 ਹੋਵੇਗਾ। ਹਾਲਾਂਕਿ ਅੰਤਮ ਪ੍ਰਵਾਨਗੀ ਪ੍ਰਕਿਰਿਆ ਅਤੇ ਸਲਾਹ-ਮਸ਼ਵਰੇ ਵਿਚ ਕੁੱਝ ਦੇਰੀ ਹੋਈ ਹੈ, ਅਧਿਕਾਰੀਆਂ ਨੇ ਭਰੋਸਾ ਦਿਤਾ ਹੈ ਕਿ ਇਹ ਪ੍ਰਕਿਰਿਆਵਾਂ ਨਿਰਧਾਰਤ ਸਮਾਂ-ਸੀਮਾਵਾਂ ਦੇ ਅੰਦਰ ਪੂਰੀਆਂ ਕੀਤੀਆਂ ਜਾਣਗੀਆਂ।
ਆਉਣ ਵਾਲੇ ਅਕਾਦਮਿਕ ਸਾਲ ਲਈ ਮਾਨਤਾ, ਇਮਤਿਹਾਨ ਅਤੇ ਸੀਟ ਮੈਟ੍ਰਿਕਸ ਪ੍ਰਵਾਨਗੀਆਂ ਦੇ ਕਾਰਜਕ੍ਰਮ ਦਾ ਵੇਰਵਾ ਦੇਣ ਵਾਲਾ ਇਕ ਬਲੂਪ੍ਰਿੰਟ ਜਲਦੀ ਹੀ ਪ੍ਰਕਾਸ਼ਿਤ ਕੀਤਾ ਜਾਵੇਗਾ। ਇਸ ਤੋਂ ਇਲਾਵਾ, 2025-26 ਐਪਲੀਕੇਸ਼ਨਾਂ ਲਈ ਪੋਰਟਲ ਨਵੰਬਰ ਦੇ ਸ਼ੁਰੂ ਵਿਚ ਖੁੱਲ੍ਹਣ ਲਈ ਤਿਆਰ ਹੈ। ਜ਼ਿਕਰਯੋਗ ਹੈ ਕਿ ਡਾ. ਸੇਠ ਨੇ ਦਸਿਆ ਕਿ ਇਹ ਸਾਲ ਹਾਲ ਹੀ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਹੈ ਜਦੋਂ ਮੈਡੀਕਲ ਅਸੈਸਮੈਂਟ ਐਂਡ ਰੇਟਿੰਗ ਬੋਰਡ (ਐਮ.ਏ.ਆਰ.ਬੀ.) ਦੇ ਫੈਸਲਿਆਂ ਵਿਰੁਧ ਸਾਰੀਆਂ ਅਪੀਲਾਂ ਨੂੰ ਬਿਨਾਂ ਕਿਸੇ ਅਦਾਲਤੀ ਦਖਲ ਦੇ ਹੱਲ ਕੀਤਾ ਗਿਆ ਹੈ।
ਮੈਡੀਕਲ ਸਿੱਖਿਆ ਦੀ ਗੁਣਵੱਤਾ ਨੂੰ ਵਧਾਉਣ ਦੇ ਯਤਨ ’ਚ, ਡਾ. ਸੇਠ ਨੇ ਇਹ ਵੀ ਐਲਾਨ ਕੀਤਾ ਕਿ ਐੱਨ.ਐੱਮ.ਸੀ. ਮੁੱਖ ਧਾਰਾ ਦੇ ਮੈਡੀਕਲ ਪਾਠਕ੍ਰਮ ਵਿਚ ਕਲੀਨਿਕਲ ਖੋਜ ਦੇ ਏਕੀਕਰਣ ਦੀ ਖੋਜ ਕਰ ਰਹੀ ਹੈ। ਖੋਜ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ਅਤੇ ਮੈਡੀਕਲ ਸਿੱਖਿਆ ਵਿਚ ਕਲੀਨਿਕਲ ਖੋਜ ਨੂੰ ਉਤਸ਼ਾਹਿਤ ਕਰਨ ਲਈ ਇੰਡੀਅਨ ਕੌਂਸਲ ਆਫ ਮੈਡੀਕਲ ਰੀਸਰਚ (ਆਈ.ਸੀ.ਐੱਮ.ਆਰ.) ਦੇ ਸਹਿਯੋਗ ਲਈ ਯੋਜਨਾਵਾਂ ਚੱਲ ਰਹੀਆਂ ਹਨ।
ਐਨ.ਐਮ.ਸੀ. ਦੇ ਯਤਨਾਂ ਨੂੰ ਸਿਹਤ ਸੰਭਾਲ ਦੇ ਬੁਨਿਆਦੀ ਢਾਂਚੇ ਦੇ ਵਿਸਥਾਰ ਅਤੇ ਮੈਡੀਕਲ ਪੇਸ਼ੇਵਰਾਂ ਦੀ ਵੱਧ ਰਹੀ ਮੰਗ ਨੂੰ ਹੱਲ ਕਰਨ ਦੇ ਸਰਕਾਰ ਦੇ ਦ੍ਰਿਸ਼ਟੀਕੋਣ ਦੇ ਅਨੁਸਾਰ, ਦੇਸ਼ ਵਿਚ ਮੈਡੀਕਲ ਸਿੱਖਿਆ ਦੀ ਸਮਰੱਥਾ ਵਿਚ ਸੁਧਾਰ ਲਿਆਉਣ ਵਲ ਇਕ ਕਦਮ ਵਜੋਂ ਵੇਖਿਆ ਜਾ ਰਿਹਾ ਹੈ।
