ਕਾਂਸਟੇਬਲ ਲਲਿਤ ਕੁਮਾਰ ਸਾਲਵੇ ਦੇ ਘਰ 15 ਜਨਵਰੀ ਨੂੰ ਬੱਚੇ ਨੇ ਜਨਮ ਲਿਆ
Maharashtra News: ਮਹਾਰਾਸ਼ਟਰ ਦੇ ਬੀਡ ਜ਼ਿਲ੍ਹੇ ’ਚ ਕੁੱਝ ਸਾਲ ਪਹਿਲਾਂ ਲਿੰਗ ਬਦਲਣ ਦੀ ਸਰਜਰੀ ਕਰਵਾਉਣ ਤੋਂ ਬਾਅਦ ਲਲਿਤਾ ਤੋਂ ਲਲਿਤ ਬਣੇ ਇਕ ਪੁਲਿਸ ਕਾਂਸਟੇਬਲ ਨੇ ਇਕ ਸ਼ਾਨਦਾਰ ਸਫਰ ਤੈਅ ਕੀਤਾ ਹੈ ਅਤੇ ਹੁਣ ਉਹ ਪਿਤਾ ਬਣ ਗਿਆ ਹੈ। ਕਾਂਸਟੇਬਲ ਲਲਿਤ ਕੁਮਾਰ ਸਾਲਵੇ ਦਾ ਵਿਆਹ 2020 ’ਚ ਹੋਇਆ ਸੀ ਅਤੇ ਉਹ 15 ਜਨਵਰੀ ਨੂੰ ਇਕ ਬੱਚੇ ਦਾ ਪਿਤਾ ਬਣਿਆ ਸੀ।
ਬੀਡ ਜ਼ਿਲ੍ਹੇ ਦੇ ਮਾਜਲਗਾਓਂ ਤਾਲੁਕਾ ਦੇ ਰਾਜੇਗਾਓਂ ਪਿੰਡ ਦੇ ਵਸਨੀਕ ਸਾਲਵੇ ਪਰਵਾਰ ’ਚ ਇਕ ਨਵਾਂ ਮੈਂਬਰ ਹੋਣ ਤੋਂ ਖੁਸ਼ ਹਨ। ਪਰ ਉਹ ਅਜੇ ਵੀ ਇਕ ਔਰਤ ਤੋਂ ਇਕ ਆਦਮੀ ਬਣਨ ਤਕ ਉਸ ਦੀ ਸੰਘਰਸ਼ਮਈ ਜ਼ਿੰਦਗੀ ਨੂੰ ਯਾਦ ਕਰਦਾ ਹੈ। ਲਲਿਤ ਦਾ ਜਨਮ ਜੂਨ 1988 ’ਚ ਲਲਿਤਾ ਸਾਲਵੇ ਵਜੋਂ ਹੋਇਆ ਸੀ। ਉਹ 2010 ’ਚ ਇਕ ਔਰਤ ਵਜੋਂ ਪੁਲਿਸ ਫੋਰਸ ’ਚ ਸ਼ਾਮਲ ਹੋਇਆ ਸੀ।
ਪੁਲਿਸ ਨੇ 2013 ’ਚ ਉਸ ਦੇ ਸਰੀਰ ’ਚ ਤਬਦੀਲੀਆਂ ਵੇਖਣੀਆਂ ਸ਼ੁਰੂ ਕੀਤੀਆਂ ਅਤੇ ਡਾਕਟਰੀ ਟੈਸਟ ਕੀਤੇ ਗਏ ਜਿਨ੍ਹਾਂ ਨੇ ਵਾਈ ਕ੍ਰੋਮੋਸੋਮ ਦੀ ਮੌਜੂਦਗੀ ਦੀ ਪੁਸ਼ਟੀ ਕੀਤੀ। ਮਰਦਾਂ ’ਚ ਇਕ ਐਕਸ ਅਤੇ ਇਕ ਵਾਈ ਕ੍ਰੋਮੋਸੋਮ ਹੁੰਦਾ ਹੈ, ਜਦਕਿ ਔਰਤਾਂ ’ਚ ਦੋ ਐਕਸ ਕ੍ਰੋਮੋਸੋਮ ਹੁੰਦੇ ਹਨ। ਡਾਕਟਰਾਂ ਨੇ ਦਸਿਆ ਸੀ ਕਿ ਸਾਲਵੇ ਨੂੰ ‘ਲਿੰਗ ਡਿਸਫੋਰੀਆ’ ਸੀ ਅਤੇ ਉਨ੍ਹਾਂ ਨੇ ਲਿੰਗ ਤਬਦੀਲੀ ਸਰਜਰੀ ਦੀ ਸਲਾਹ ਦਿਤੀ ਸੀ।
ਸੂਬਾ ਸਰਕਾਰ ਤੋਂ ਇਜਾਜ਼ਤ ਮਿਲਣ ਤੋਂ ਬਾਅਦ ਕਾਂਸਟੇਬਲ ਦੀ 2018 ’ਚ ਲਿੰਗ ਬਦਲਣ ਦੀ ਸਰਜਰੀ ਹੋਈ ਸੀ। ਉਸ ਨੇ 2018 ਅਤੇ 2020 ਦੇ ਵਿਚਕਾਰ ਤਿੰਨ ਸਰਜਰੀ ਕੀਤੀਆਂ। ਸਾਲਵੇ ਨੇ 2020 ’ਚ ਛਤਰਪਤੀ ਸੰਭਾਜੀਨਗਰ ਦੀ ਰਹਿਣ ਵਾਲੀ ਸੀਮਾ ਨਾਲ ਵਿਆਹ ਕੀਤਾ ਸੀ। ਸਾਲਵੇ ਨੇ ਪੱਤਰਕਾਰਾਂ ਨੂੰ ਕਿਹਾ, ‘‘ਇਕ ਔਰਤ ਤੋਂ ਆਦਮੀ ਬਣਨ ਤਕ ਦਾ ਮੇਰਾ ਸਫ਼ਰ ਸੰਘਰਸ਼ਾਂ ਨਾਲ ਭਰਿਆ ਰਿਹਾ ਹੈ। ਇਸ ਸਮੇਂ ਦੌਰਾਨ ਮੈਂ ਖੁਸ਼ਕਿਸਮਤ ਸੀ ਕਿ ਮੈਂ ਬਹੁਤ ਸਾਰੇ ਲੋਕਾਂ ਨਾਲ ਮਿਲਿਆ। ਅਸੀਂ ਅਪਣਾ ਇਕ ਬੱਚਾ ਚਾਹੁੰਦੇ ਸੀ।’’ ਉਨ੍ਹਾਂ ਕਿਹਾ, ‘‘ਮੈਨੂੰ ਖੁਸ਼ੀ ਹੈ ਕਿ ਮੈਂ ਹੁਣ ਪਿਤਾ ਬਣ ਗਿਆ ਹਾਂ।’’
(For more Punjabi news apart from Maharashtra cop who underwent sex change surgery becomes a father, stay tuned to Rozana Spokesman)