ਸੀਮਾ ਸੁਰੱਖਿਆ ਬਲ, ਜਨਰਲ ਡਿਊਟੀ ਕਾਡਰ (ਨਾਨ-ਗਜ਼ਟਿਡ) ਭਰਤੀ ਨਿਯਮ, 2015 ਵਿਚ ਸੋਧ ਕਰ ਕੇ ਕੀਤਾ ਗਿਆ ਇਹ ਵਾਧਾ
ਨਵੀਂ ਦਿੱਲੀ: ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਬੀ.ਐਸ.ਐਫ. ’ਚ ਕਾਂਸਟੇਬਲ ਭਰਤੀ ਲਈ ਸਾਬਕਾ ਅਗਨੀਵੀਰਾਂ ਦਾ ਕੋਟਾ 10 ਫੀ ਸਦੀ ਤੋਂ ਵਧਾ ਕੇ 50 ਫੀ ਸਦੀ ਕਰ ਦਿਤਾ ਹੈ। ਸੀਮਾ ਸੁਰੱਖਿਆ ਬਲ, ਜਨਰਲ ਡਿਊਟੀ ਕਾਡਰ (ਨਾਨ-ਗਜ਼ਟਿਡ) ਭਰਤੀ ਨਿਯਮ, 2015 ਵਿਚ ਸੋਧ ਕਰ ਕੇ ਇਹ ਵਾਧਾ ਕੀਤਾ ਗਿਆ ਹੈ।
ਸਾਬਕਾ ਅਗਨੀਵੀਰਾਂ ਦੇ ਪਹਿਲੇ ਬੈਚ ਨੂੰ ਵੀ ਉਪਰਲੀ ਉਮਰ ਸੀਮਾ ਵਿਚ ਪੰਜ ਸਾਲ ਤਕ ਦੀ ਛੋਟ ਮਿਲੇਗੀ, ਜਦਕਿ ਬਾਕੀ ਸਾਬਕਾ ਅਗਨੀਵੀਰਾਂ ਨੂੰ ਤਿੰਨ ਸਾਲ ਦੀ ਛੋਟ ਮਿਲੇਗੀ। ਸ਼ੁਕਰਵਾਰ ਨੂੰ ਜਾਰੀ ਨੋਟੀਫਿਕੇਸ਼ਨ ’ਚ ਕਿਹਾ ਗਿਆ ਹੈ ਕਿ ਸਾਬਕਾ ਅਗਨੀਵੀਰਾਂ ਨੂੰ ਫਿਜ਼ੀਕਲ ਸਟੈਂਡਰਡ ਟੈਸਟ ਅਤੇ ਫਿਜ਼ੀਕਲ ਐਫੀਸ਼ੀਐਂਸੀ ਟੈਸਟ ਤੋਂ ਵੀ ਛੋਟ ਦਿਤੀ ਜਾਵੇਗੀ।
ਨੋਟੀਫਿਕੇਸ਼ਨ ’ਚ ਕਿਹਾ ਗਿਆ ਹੈ ਕਿ ਸਿੱਧੀ ਭਰਤੀ (ਪੰਜਾਹ ਫੀ ਸਦੀ ਸਮੇਤ) ਨਾਲ ਹਰ ਭਰਤੀ ਸਾਲ ’ਚ ਸਾਬਕਾ ਅਗਨੀਵੀਰਾਂ ਲਈ, ਸਾਬਕਾ ਫ਼ੌਜੀਆਂ ਲਈ ਦਸ ਫੀ ਸਦੀ ਅਤੇ ਲੜਾਕੂ ਕਾਂਸਟੇਬਲ (ਟ੍ਰੇਡਸਮੈਨ) ਲਈ ਤਿੰਨ ਫੀ ਸਦੀ ਤਕ ਅਸਾਮੀਆਂ ਰਾਖਵੀਆਂ ਹੋਣਗੀਆਂ।
ਪਹਿਲੇ ਪੜਾਅ ’ਚ, ਸਾਬਕਾ ਅਗਨੀਵੀਰਾਂ ਲਈ ਨਿਰਧਾਰਤ 50 ਫ਼ੀ ਸਦੀ ਅਸਾਮੀਆਂ ਲਈ ਨੋਡਲ ਫੋਰਸ ਵਲੋਂ ਭਰਤੀ ਕੀਤੀ ਜਾਵੇਗੀ, ਅਤੇ ਦੂਜੇ ਪੜਾਅ ਵਿਚ ਸਟਾਫ ਸਿਲੈਕਸ਼ਨ ਕਮਿਸ਼ਨ ਵਲੋਂ ਬਾਕੀ 47 ਫ਼ੀ ਸਦੀ ਅਸਾਮੀਆਂ (ਦਸ ਫ਼ੀ ਸਦੀ ਸਾਬਕਾ ਫ਼ੌਜੀਆਂ ਸਮੇਤ) ਲਈ ਸਾਬਕਾ ਅਗਨੀਵੀਰਾਂ ਤੋਂ ਇਲਾਵਾ ਹੋਰ ਉਮੀਦਵਾਰਾਂ ਲਈ ਭਰਤੀ ਕੀਤੀ ਜਾਵੇਗੀ।
ਕੇਂਦਰ ਨੇ ਇਸ ਸਾਲ ਜੂਨ ’ਚ ਗਜ਼ਟ ਨੋਟੀਫਿਕੇਸ਼ਨ ਰਾਹੀਂ ਭਾਰਤ ਸਰਕਾਰ (ਕਾਰੋਬਾਰ ਦੀ ਵੰਡ) ਨਿਯਮ, 1961 ’ਚ ਸੋਧ ਕੀਤੀ ਸੀ, ਜਿਸ ’ਚ ਕੇਂਦਰੀ ਗ੍ਰਹਿ ਮੰਤਰਾਲੇ ਦੇ ਵਿਦੇਸ਼ ਵਿਭਾਗ ਦੇ ਅਧੀਨ ਦੂਜੀ ਅਨੁਸੂਚੀ ’ਚ ਇਕ ਨਵਾਂ ਨੁਕਤਾ ਸ਼ਾਮਲ ਕੀਤਾ ਗਿਆ ਸੀ। ਸੂਤਰਾਂ ਨੇ ਦਸਿਆ ਕਿ ਇਸ ਸੋਧ ਦੇ ਨਾਲ, ਸਾਬਕਾ ਅਗਨੀਵੀਰਾਂ ਦੀ ਹੋਰ ਤਰੱਕੀ ਲਈ ਤਾਲਮੇਲ ਗਤੀਵਿਧੀਆਂ ਨਾਲ ਸਬੰਧਤ ਕੰਮ ਕੇਂਦਰੀ ਗ੍ਰਹਿ ਮੰਤਰਾਲੇ ਨੂੰ ਸੌਂਪਿਆ ਗਿਆ ਹੈ।
ਜੂਨ 2022 ’ਚ, ਸਰਕਾਰ ਨੇ ਤਿੰਨਾਂ ਸੇਵਾਵਾਂ ਦੀ ਉਮਰ ਪ੍ਰੋਫਾਈਲ ਨੂੰ ਘਟਾਉਣ ਦੇ ਉਦੇਸ਼ ਨਾਲ ਅਗਨੀਪਥ ਭਰਤੀ ਯੋਜਨਾ ਸ਼ੁਰੂ ਕੀਤੀ। ਇਸ ਯੋਜਨਾ ਦੇ ਤਹਿਤ, 17 ਤੋਂ ਸਾਢੇ 17 ਸਾਲ ਅਤੇ ਚੁਣੇ ਜਾਣ ਵਾਲੇ 21 ਸਾਲ ਦੀ ਉਮਰ ਦੇ ਉਮੀਦਵਾਰਾਂ ਨੂੰ ਚਾਰ ਸਾਲਾਂ ਦੀ ਮਿਆਦ ਲਈ ਫ਼ੌਜ, ਹਵਾਈ ਫ਼ੌਜ ਅਤੇ ਸਮੁੰਦਰੀ ਫ਼ੌਜ ਵਿਚ ਅਗਨੀਵੀਰਾਂ ਵਜੋਂ ਦਾਖਲ ਕੀਤਾ ਜਾਂਦਾ ਹੈ, ਜਿਸ ਵਿਚ ਉਨ੍ਹਾਂ ’ਚੋਂ 25 ਫ਼ੀ ਸਦੀ ਨੂੰ 15 ਹੋਰ ਸਾਲਾਂ ਲਈ ਬਰਕਰਾਰ ਰੱਖਣ ਦੀ ਵਿਵਸਥਾ ਹੈ, ਜਦਕਿ ਬਾਕੀ 75 ਫ਼ੀ ਸਦੀ ਬਾਹਰ ਨਿਕਲਣ ਦਾ ਪ੍ਰਬੰਧ ਹੈ।
ਸਰਕਾਰ ਨੇ ਸੀ.ਆਰ.ਪੀ.ਐਫ., ਬੀ.ਐਸ.ਐਫ., ਸੀ.ਆਈ.ਐਸ.ਐਫ., ਐਸ.ਐਸ.ਬੀ. ਆਦਿ ਵਰਗੇ 11 ਲੱਖ ਮਜ਼ਬੂਤ ਕੇਂਦਰੀ ਹਥਿਆਰਬੰਦ ਪੁਲਿਸ ਬਲਾਂ ਵਿਚ ਕਾਂਸਟੇਬਲਾਂ ਦੀਆਂ ਭਵਿੱਖ ਦੀਆਂ ਸਾਰੀਆਂ ਨਿਯੁਕਤੀਆਂ ਵਿਚ ਸਾਬਕਾ ਅਗਨੀਵੀਰਾਂ ਲਈ ਪਹਿਲਾਂ ਹੀ 10 ਫ਼ੀ ਸਦੀ ਨੌਕਰੀਆਂ ਰਾਖਵੀਆਂ ਕਰ ਦਿਤੀ ਆਂ ਸਨ।
ਬੀ.ਐਸ.ਐਫ. ਦੀ ਭਰਤੀ ਦੇ ਨਿਯਮਾਂ ਵਿਚ ਤਬਦੀਲੀਆਂ ਮੁੱਖ ਤੌਰ ਉਤੇ ਪਾਕਿਸਤਾਨ ਅਤੇ ਬੰਗਲਾਦੇਸ਼ ਨਾਲ ਸੰਵੇਦਨਸ਼ੀਲ ਭਾਰਤੀ ਸਰਹੱਦਾਂ ਉਤੇ ਤਾਇਨਾਤ ਸਰਹੱਦੀ ਸੁਰੱਖਿਆ ਬਲ ਨਾਲ ਸਬੰਧਤ ਹਨ।
