ਆਈਟੀ ਕੰਪਨੀਆਂ ਦੇ ਕਰਮਚਾਰੀਆਂ ਦੇ ਮੌਜੂਦਾ ਕੰਮ ਦੇ ਘੰਟੇ ਨੂੰ ਵਧਾ ਕੇ 14 ਘੰਟੇ ਕੀਤਾ ਜਾ ਸਕਦਾ
Karnataka 14 Hour Workday: ਕਰਨਾਟਕ ਦੀਆਂ ਆਈਟੀ ਕੰਪਨੀਆਂ ਨੇ ਰਾਜ ਸਰਕਾਰ ਨੂੰ ਇੱਕ ਪ੍ਰਸਤਾਵ ਸੌਂਪ ਕੇ ਕਰਮਚਾਰੀਆਂ ਦੇ ਕੰਮ ਦੇ ਘੰਟੇ ਵਧਾ ਕੇ 14 ਘੰਟੇ ਕਰਨ ਦੀ ਮੰਗ ਕੀਤੀ ਹੈ। ਇਸ ਕਦਮ ਦਾ ਕਰਮਚਾਰੀਆਂ ਦੁਆਰਾ ਸਖ਼ਤ ਵਿਰੋਧ ਕੀਤਾ ਗਿਆ ਹੈ, ਜਿਨ੍ਹਾਂ ਨੇ ਸਿਹਤ ਸਬੰਧੀ ਮੁੱਦਿਆਂ ਅਤੇ ਛਾਂਟੀ ਦੀਆਂ ਚਿੰਤਾਵਾਂ ਦਾ ਹਵਾਲਾ ਦਿੰਦੇ ਹੋਏ ਇਸ ਨੂੰ ਅਣਮਨੁੱਖੀ ਕਿਹਾ ਹੈ।
ਸੂਤਰਾਂ ਮੁਤਾਬਕ ਸੂਬਾ ਸਰਕਾਰ ਕਰਨਾਟਕ ਦੁਕਾਨਾਂ ਅਤੇ ਵਪਾਰਕ ਸਥਾਪਨਾ ਐਕਟ, 1961 'ਚ ਸੋਧ ਕਰਨ 'ਤੇ ਵਿਚਾਰ ਕਰ ਰਹੀ ਹੈ। ਆਈਟੀ ਕੰਪਨੀਆਂ ਚਾਹੁੰਦੀਆਂ ਹਨ ਕਿ ਉਨ੍ਹਾਂ ਦੇ ਪ੍ਰਸਤਾਵ ਨੂੰ ਸੋਧ ਵਿੱਚ ਸ਼ਾਮਲ ਕੀਤਾ ਜਾਵੇ, ਜਿਸ ਨਾਲ ਕਾਨੂੰਨੀ ਤੌਰ 'ਤੇ ਕੰਮਕਾਜੀ ਘੰਟੇ 14 ਘੰਟੇ (12 ਘੰਟੇ + 2 ਘੰਟੇ ਓਵਰਟਾਈਮ) ਹੋ ਜਾਣਗੇ।
ਕੀ ਹੈ ਪ੍ਰਸਤਾਵ
ਮੌਜੂਦਾ ਕਿਰਤ ਕਾਨੂੰਨਾਂ ਅਨੁਸਾਰ 9 ਘੰਟੇ ਕੰਮ ਕਰਨ ਦੀ ਅਨੁਮਤੀ ਹੈ, ਜਦੋਂ ਕਿ ਵਾਧੂ ਘੰਟਿਆਂ ਨੂੰ ਓਵਰਟਾਈਮ ਦੇ ਰੂਪ 'ਚ ਅਨੁਮਤੀ ਦਿੱਤੀ ਜਾਂਦੀ ਹੈ। ਆਈਟੀ ਸੈਕਟਰ ਦੇ ਨਵੇਂ ਪ੍ਰਸਤਾਵ ਵਿੱਚ ਕਿਹਾ ਗਿਆ ਹੈ, "ਆਈਟੀ/ਆਈਟੀਈਐਸ/ਬੀਪੀਓ ਸੈਕਟਰ ਦੇ ਕਰਮਚਾਰੀਆਂ ਨੂੰ ਪ੍ਰਤੀ ਦਿਨ 12 ਘੰਟੇ ਤੋਂ ਵੱਧ ਅਤੇ ਲਗਾਤਾਰ ਤਿੰਨ ਮਹੀਨਿਆਂ ਵਿੱਚ 125 ਘੰਟੇ ਤੱਕ ਕੰਮ ਕਰਨ ਦੀ ਇਜਾਜ਼ਤ ਦਿੱਤੀ ਜਾਣੀ ਚਾਹੀਦੀ ਹੈ।" ਸੂਤਰਾਂ ਨੇ ਦੱਸਿਆ ਕਿ ਸਰਕਾਰ ਨੇ ਇਸ ਮਾਮਲੇ 'ਤੇ ਮੁੱਢਲੀ ਮੀਟਿੰਗ ਕੀਤੀ ਹੈ ਅਤੇ ਜਲਦ ਹੀ ਅਗਲੇਰੀ ਫੈਸਲੇ ਲਏ ਜਾਣਗੇ। ਇਸ ਪ੍ਰਸਤਾਵ 'ਤੇ ਕੈਬਨਿਟ ਵੱਲੋਂ ਚਰਚਾ ਕੀਤੇ ਜਾਣ ਦੀ ਸੰਭਾਵਨਾ ਹੈ।
ਮੁਲਾਜ਼ਮਾਂ ਵੱਲੋਂ ਸਖ਼ਤ ਵਿਰੋਧ
ਕੰਮ ਦੇ ਘੰਟੇ ਵਧਾਉਣ ਦੇ ਕਦਮ ਦਾ ਕਰਨਾਟਕ ਸਟੇਟ ਆਈਟੀ/ਆਈਟੀਈਐਸ ਕਰਮਚਾਰੀ ਯੂਨੀਅਨ (ਕੇਆਈਟੀਯੂ) ਨੇ ਸਖ਼ਤ ਵਿਰੋਧ ਕੀਤਾ ਹੈ। ਯੂਨੀਅਨ ਨੇ ਇੱਕ ਬਿਆਨ ਜਾਰੀ ਕਰਕੇ ਚੇਤਾਵਨੀ ਦਿੱਤੀ ਹੈ ਕਿ ਕੰਮ ਦੀਆਂ ਸ਼ਿਫਟਾਂ ਦੀ ਗਿਣਤੀ ਘਟਣ ਨਾਲ ਇੱਕ ਤਿਹਾਈ ਮੁਲਾਜ਼ਮ ਬੇਰੁਜ਼ਗਾਰ ਹੋ ਜਾਣਗੇ।
ਕੇਆਈਟੀਯੂ ਨੇ ਕਿਹਾ ਕਿ "ਇਸ ਸੋਧ ਨਾਲ ਕੰਪਨੀਆਂ ਨੂੰ ਮੌਜੂਦਾ ਤਿੰਨ-ਸ਼ਿਫਟ ਪ੍ਰਣਾਲੀ ਦੀ ਬਜਾਏ ਦੋ-ਸ਼ਿਫਟ ਪ੍ਰਣਾਲੀ ਨੂੰ ਅਪਣਾਉਣ ਦਾ ਮੌਕਾ ਮਿਲ ਜਾਵੇਗਾ ਅਤੇ ਇੱਕ ਤਿਹਾਈ ਕਰਮਚਾਰੀਆਂ ਨੂੰ ਉਨ੍ਹਾਂ ਦੇ ਰੁਜ਼ਗਾਰ ਤੋਂ ਬਾਹਰ ਕਰ ਦਿੱਤਾ ਜਾਵੇਗਾ। ਯੂਨੀਅਨ ਨੇ ਆਈਟੀ ਕਰਮਚਾਰੀਆਂ ਵਿੱਚ ਲੰਬੇ ਕੰਮ ਦੇ ਘੰਟਿਆਂ ਦੇ ਸਿਹਤ ਪ੍ਰਭਾਵਾਂ 'ਤੇ ਕੀਤੇ ਅਧਿਐਨਾਂ ਵੱਲ ਵੀ ਧਿਆਨ ਦਿਵਾਇਆ।
