ਕੋਰੋਨਾ ਵਾਇਰਸ ਰੋਕਥਾਮ ਦੇ ਅਸਰਦਾਰ ਪ੍ਰਬੰਧ ਕਾਰਨ ਦੇਸ਼ ਵਿਚ ਕੋਰੋਨਾ ਵਾਇਰਸ ਨਾਲ ਹੋਣ ਵਾਲੀਆਂ ਮੌਤਾਂ ਦੀ ਦਰ ਘੱਟ ਕੇ 2.43 ਫ਼ੀ ਸਦੀ ਰਹਿ ਗਈ
ਨਵੀਂ ਦਿੱਲੀ, 21 ਜੁਲਾਈ : ਕੇਂਦਰ ਨੇ ਦਸਿਆ ਕਿ ਕੋਰੋਨਾ ਵਾਇਰਸ ਰੋਕਥਾਮ ਦੇ ਅਸਰਦਾਰ ਪ੍ਰਬੰਧ ਕਾਰਨ ਦੇਸ਼ ਵਿਚ ਕੋਰੋਨਾ ਵਾÎਇਰਸ ਨਾਲ ਹੋਣ ਵਾਲੀਆਂ ਮੌਤਾਂ ਦੀ ਦਰ ਘੱਟ ਕੇ 2.43 ਫ਼ੀ ਸਦੀ ਰਹਿ ਗਈ ਜੋ 17 ਜੂਨ ਨੂੰ 3.36 ਫ਼ੀ ਸਦੀ ਸੀ। ਕੇਂਦਰ ਨੇ ਇਸ ਗੱਲ ’ਤੇ ਵੀ ਜ਼ੋਰ ਦਿਤਾ ਕਿ ਦੇਸ਼ ਨੇ ਮਹਾਂਮਾਰੀ ਤੋਂ ਪੈਦਾ ਸਥਿਤੀ ਨੂੰ ਮੁਕਾਬਲਤਨ ਚੰਗੀ ਤਰ੍ਹਾਂ ਸੰਭਾਲਿਆ ਹੈ।
ਕੇਂਦਰੀ ਸਿਹਤ ਮੰਤਰਾਲੇ ਵਿਚ ਵਿਸ਼ੇਸ਼ ਅਧਿਕਾਰੀ (ਓਐਸਡੀ) ਰਾਜੇਸ਼ ਭੂਸ਼ਣ ਨੇ ਪੱਤਰਕਾਰ ਸੰਮੇਲਨ ਵਿਚ ਕਿਹਾ ਕਿ 30 ਰਾਜਾਂ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਵਿਚ ਕੋਰੋਨਾ ਵਾਇਰਸ ਤੋਂ ਲਾਗ ਦੀ ਦਰ ਕੌਮੀ ਔਸਤ 8.07 ਫ਼ੀ ਸਦੀ ਤੋਂ ਘੱਟ ਹੈ। ਉਨ੍ਹਾਂ ਕਿਹਾ ਕਿ 19 ਰਾਜ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ ਪ੍ਰਤੀ ਦਸ ਲੱਖ ਆਬਾਦੀ ’ਤੇ ਪ੍ਰਤੀ ਦਿਨ 140 ਤੋਂ ਵੱਧ ਟੈਸਟ ਕਰ ਹਰੇ ਹਨ।
ਸਿਰਫ਼ ਟੈਸਟ ਕਰਨਾ ਹੀ ਕਾਫ਼ੀ ਨਹੀਂ ਅਤੇ ਉਨ੍ਹਾਂ ਪ੍ਰਤੀ ਦਸ ਲੱਖ ਦੀ ਆਬਾਦੀ ’ਤੇ ਹਰ ਦਿਨ 140 ਟੈਸਟ ਕਰਦੇ ਰਹਿਣਾ ਹੈ ਤਾਕਿ ਲਾਗ ਦਰ ਘੱਟ ਹੋਵੇ ਅਤੇ ਇੲ ਪਹਿਲੇ 10 ਫ਼ੀ ਸਦੀ ਤੋਂ ਹੇਠਾਂ ਆ ਜਾਵੇ। ਉਸ ਤੋਂ ਬਾਅਦ ਟੈਸਟ ਕਵਾਇਦ ਜਾਰੀ ਰੱਖੀ ਜਾਵੇ ਜਿਸ ਨਾਲ ਲਾਗ ਦਰ ਪੰਜ ਫ਼ੀ ਸਦੀ ਜਾਂ ਉਸ ਤੋਂ ਵੀ ਘੱਟ ਹੋ ਸਕੇ। ਉਨ੍ਹਾਂ ਕਿਹਾ ਕਿ ਆਖ਼ਰੀ ਉਦੇਸ਼ ਟੈਸਟ ਦੇ ਇਸ ਪੱਧਰ ਨੂੰ ਕਾਇਮ ਰਖਣਾ ਅਤੇ ਲਾਗ ਦਰ ਨੂੰ ਪੰਜ ਫ਼ੀ ਸਦੀ ਜਾਂ ਉਸ ਤੋਂ ਵੀ ਘੱਟ ਲਿਆਉਣਾ ਹੈ।
ਭੂਸ਼ਣ ਨੇ ਕਿਹਾ ਕਿ ਭਾਰਤ ਵਿਚ ਕੋਰੋਨਾ ਵਾਇਰਸ ਨਾਲ ਹੋਣ ਵਾਲੀਆਂ ਮੌਤਾਂ ਦੀ ਗਿਣਤੀ ਪ੍ਰਤੀ ਦਸ ਲੱਖ ਆਬਾਦੀ ’ਤ 20.4 ਹੈ ਜੋ ਦੁਨੀਆਂ ਵਿਚ ਸੱਭ ਤੋਂ ਘੱਟ ਹੈ। ਉਨ੍ਹਾਂ ਕਿਹਾ, ‘ਕਈ ਅਜਿਹੇ ਦੇਸ਼ ਹਨ ਜਿਥੇ ਪ੍ਰਤੀ ਦਸ ਲੱਖ ਆਬਾਦੀ ’ਤੇ ਮੌਤਾਂ ਦੀ ਗਿਣਤੀ ਵਿਚ ਭਾਰਤ ਦੀ ਤੁਲਨਾ ਵਿਚ 21 ਗੁਣਾਂ ਜਾਂ 33 ਗੁਣਾਂ ਤਕ ਜ਼ਿਆਦਾ ਹੈ। ਸੰਸਾਰ ਔਸਤ ਪ੍ਰਤੀ ਦਸ ਲੱਖ ਆਬਾਦੀ ’ਤੇ 77 ਮੌਤਾਂ ਹਨ। (ਏਜੰਸੀ)