19 ਫਰਵਰੀ ਨੂੰ ਹੀ ਹੋਇਆ ਸੀ ਜੋੜੇ ਦਾ ਵਿਆਹ

ਰਾਏਪੁਰ - ਇੱਕ ਰਹੱਸਮਈ ਘਟਨਾ ਵਿੱਚ, ਇੱਕ ਨਵ-ਵਿਆਹੁਤਾ ਜੋੜਾ, ਸਰੀਰ 'ਤੇ ਚਾਕੂ ਮਾਰਨ ਨਾਲ ਹੋਏ ਕਈ ਜ਼ਖ਼ਮਾਂ ਨਾਲ ਕਮਰੇ ਵਿੱਚ ਮ੍ਰਿਤਕ ਪਾਇਆ ਗਿਆ। ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਇਸ ਹਾਲਤ 'ਚ ਜੋੜਾ ਆਪਣੇ ਵਿਆਹ ਦੀ ਰਿਸੈਪਸ਼ਨ ਵਿੱਚ ਸ਼ਾਮਲ ਹੋਣ ਤੋਂ ਕੁਝ ਹੀ ਮਿੰਟ ਪਹਿਲਾਂ ਮਿਲਿਆ।

ਪਹਿਲੀ ਨਜ਼ਰੇ, ਇਸ ਦਾ ਕਾਰਨ ਦੋਵਾਂ ਵਿਚਕਾਰ ਹੋਇਆ ਕੋਈ ਝਗੜਾ ਜਾਪਦਾ ਹੈ, ਜਿਸ ਕਾਰਨ ਦੋਵਾਂ ਵਿੱਚੋਂ ਇੱਕ ਨੇ ਪਹਿਲਾਂ ਦੂਜੇ ਨੂੰ ਚਾਕੂ ਮਾਰਿਆ, ਅਤੇ ਬਾਅਦ ਵਿੱਚ ਆਪਣੇ ਆਪ ਨੂੰ। 

ਚਾਰ ਸਾਲਾਂ ਤੋਂ ਜਾਰੀ ਪ੍ਰੇਮ ਸੰਬੰਧਾਂ ਤੋਂ ਬਾਅਦ, 19 ਫਰਵਰੀ ਨੂੰ 24 ਸਾਲਾ ਅਸਲਮ ਨੇ 22 ਸਾਲਾ ਕਹਿਕਸ਼ਾ ਨਾਲ ਵਿਆਹ ਕਰਵਾਇਆ ਸੀ। ਤਾਜ਼ਾ ਘਟਨਾ ਨਾਲ ਦੋਵੇਂ ਪਰਿਵਾਰ ਸਦਮੇ 'ਚ ਹਨ।

ਮੰਗਲਵਾਰ ਸ਼ਾਮ ਨੂੰ ਟਿਕਰਪਾਰਾ ਖੇਤਰ ਵਿੱਚ ਲਾੜਾ-ਲਾੜੀ ਆਪਣੇ ਵਿਆਹ ਦੀ ਰਿਸੈਪਸ਼ਨ ਦੀਆਂ ਤਿਆਰੀਆਂ ਕਰ ਰਹੇ ਸਨ, ਜਦੋਂ ਅਚਾਨਕ ਪਰਿਵਾਰਕ ਮੈਂਬਰਾਂ ਨੂੰ ਕਮਰੇ ਵਿੱਚੋਂ ਚੀਕਾਂ ਦੀ ਆਵਾਜ਼ ਸੁਣਾਈ ਦਿੱਤੀ। ਪਰਿਵਾਰਕ ਮੈਂਬਰਾਂ ਨੇ ਭੱਜ ਕੇ ਦਰਵਾਜ਼ਾ ਖੋਲ੍ਹਣ ਦੀ ਕੋਸ਼ਿਸ਼ ਕੀਤੀ ਜੋ ਕਿ ਅੰਦਰੋਂ ਬੰਦ ਸੀ।

ਚੀਕਾਂ ਮਿੰਟਾਂ ਵਿੱਚ ਹੀ ਸ਼ਾਂਤ ਹੋ ਗਈਆਂ। ਕੁਝ ਗ਼ਲਤ ਹੋਣ ਦਾ ਪਤਾ ਲੱਗਣ 'ਤੇ ਪਰਿਵਾਰਕ ਮੈਂਬਰਾਂ ਨੇ ਬਾਹਰ ਜਾ ਕੇ ਖਿੜਕੀ 'ਚੋਂ ਅੰਦਰ ਦੇਖਿਆ, ਤਾਂ ਜੋੜੇ ਦੀਆਂ ਲਹੂ ਨਾਲ ਲੱਥਪੱਥ ਦੋ ਲਾਸ਼ਾਂ ਦੇਖ ਕੇ ਸਾਰੇ ਹੈਰਾਨ ਰਹਿ ਗਏ। ਅਸਲਮ ਫ਼ਰਸ਼ 'ਤੇ ਲੇਟਿਆ ਹੋਇਆ ਸੀ ਜਦੋਂ ਕਿ ਕਹਿਕਸ਼ਾ ਨੇੜੇ ਹੀ ਮੰਜੇ 'ਤੇ ਪਈ ਸੀ, ਅਤੇ ਉਸ ਦੇ ਕੋਲ ਹੀ ਇੱਕ ਚਾਕੂ ਵੀ ਪਿਆ ਸੀ। 

ਦਰਵਾਜ਼ਾ ਤੋੜਿਆ ਗਿਆ ਅਤੇ ਪੁਲਿਸ ਨੂੰ ਹਾਦਸੇ ਦੀ ਸੂਚਨਾ ਦਿੱਤੀ ਗਈ।

ਮੁਢਲੀ ਜਾਂਚ ਤੋਂ ਖ਼ਦਸ਼ਾ ਜਤਾਇਆ ਜਾ ਰਿਹਾ ਹੈ ਕਿ ਅਸਲਮ ਨੇ ਪਹਿਲਾਂ ਆਪਣੀ ਪਤਨੀ ਨੂੰ ਚਾਕੂ ਮਾਰ ਕੇ ਮੌਤ ਦੇ ਘਾਟ ਉਤਾਰਿਆ ਹੋਵੇਗਾ, ਅਤੇ ਫ਼ੇਰ ਖ਼ੁਦ ਨੂੰ ਚਾਕੂ ਮਾਰੇ ਹੋਣਗੇ। ਕਹਿਕਸ਼ਾ ਦੇ ਸਰੀਰ 'ਤੇ ਚਾਕੂ ਦੇ ਘੱਟੋ-ਘੱਟ 15 ਜ਼ਖ਼ਮ ਸਨ। ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਗਿਆ ਹੈ ਅਤੇ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।

ਇਸ ਦੌਰਾਨ ਕਹਿਕਸ਼ਾ ਦੇ ਪਰਿਵਾਰ ਨੇ ਜੰਮ ਕੇ ਹੰਗਾਮਾ ਕੀਤਾ। ਉਨ੍ਹਾਂ ਇਸ ਮਾਮਲੇ ਵਿੱਚ ਸਾਜ਼ਿਸ਼ ਰਚੇ ਹੋਣ ਦਾ ਦੋਸ਼ ਲਾਇਆ ਹੈ। ਸਥਿਤੀ 'ਤੇ ਕਾਬੂ ਪਾਉਣ ਲਈ ਪੁਲਿਸ ਨੂੰ ਦਖਲ ਦੇਣਾ ਪਿਆ।

ਜਾਪਦਾ ਹੈ ਕਿ ਪਤੀ-ਪਤਨੀ ਵਿਚਕਾਰ ਕਿਸੇ ਗੱਲ 'ਤੇ ਝਗੜਾ ਹੋਇਆ ਸੀ, ਜਿਸ ਦੇ ਨਤੀਜੇ ਵਜੋਂ ਇਹ ਕਤਲ ਹੋਏ, ਕਿਉਂ ਕਿ ਸੂਤਰਾਂ ਅਨੁਸਾਰ ਅਸਲਮ ਪਿਛਲੇ ਕੁਝ ਦਿਨਾਂ ਤੋਂ ਅਜੀਬ ਕਿਸਮ ਦਾ ਵਿਉਹਾਰ ਕਰ ਰਿਹਾ ਸੀ।

ਪੁਲਿਸ ਮੌਤ ਤੋਂ ਪਹਿਲਾਂ ਦੇ ਕੁਝ ਘੰਟਿਆਂ ਦੌਰਾਨ ਮ੍ਰਿਤਕ ਜੋੜੇ ਦੇ ਸੰਪਰਕ ਵਿੱਚ ਆਏ ਸਾਰੇ ਲੋਕਾਂ ਦੇ ਬਿਆਨ ਦਰਜ ਕਰ ਰਹੀ ਹੈ।