ਅਪਣੇ ਭਵਿੱਖ ਲਈ ਸਭ ਤੋਂ ਮੁਸ਼ਕਲ ਲੜਾਈ ਲੜ ਰਿਹਾ ਹੈ ਰੂਸ : ਪੁਤਿਨ
ਰੂਸ - ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਵੈਗਨਰ ਗਰੁੱਪ ਦੇ ਮੁਖੀ ਯੇਵਗੇਨੀ ਪ੍ਰਿਗੋਜਿਨ ਵੱਲੋਂ ਬਗ਼ਾਵਤ ਦਾ ਐਲਾਨ ਕਰਨ ਤੋਂ ਬਾਅਦ ਇਸ ਨੂੰ ਦੇਸ਼ਧ੍ਰੋਹ ਕਰਾਰ ਦਿੱਤਾ ਹੈ ਅਤੇ ਕਿਹਾ ਹੈ ਕਿ ਦੋਸ਼ੀਆਂ ਖ਼ਿਲਾਫ਼ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ। ਹਥਿਆਰਬੰਦ ਬਗਾਵਤ ਨੂੰ ਰੋਕਣ ਲਈ ਰੂਸੀ ਫੌਜ ਦੇ ਕਮਾਂਡਰ-ਇਨ-ਚੀਫ ਰਾਸ਼ਟਰਪਤੀ ਪੁਤਿਨ ਨੇ ਕਿਹਾ, "ਮੈਂ ਅੰਦਰੂਨੀ ਵਿਸ਼ਵਾਸਘਾਤ ਤੋਂ ਆਪਣੇ ਦੇਸ਼ ਦੀ ਰੱਖਿਆ ਲਈ ਹਰ ਸੰਭਵ ਕੋਸ਼ਿਸ਼ ਕਰਾਂਗਾ।"
ਰੂਸੀ ਨਿਊਜ਼ ਏਜੰਸੀ TASS ਦੇ ਅਨੁਸਾਰ ਸ਼ਨੀਵਾਰ (24 ਜੂਨ, 2023) ਨੂੰ ਇੱਕ ਟੈਲੀਵਿਜ਼ਨ ਸੰਬੋਧਨ ਵਿਚ ਪੁਤਿਨ ਨੇ ਕਿਹਾ ਕਿ "ਅਸੀਂ ਆਪਣੇ ਲੋਕਾਂ ਅਤੇ ਆਪਣੇ ਰਾਜ ਨੂੰ ਅੰਦਰੂਨੀ ਵਿਸ਼ਵਾਸਘਾਤ ਸਮੇਤ ਕਿਸੇ ਵੀ ਖਤਰੇ ਤੋਂ ਬਚਾਵਾਂਗੇ। ਜੋ ਅਸੀਂ ਸਾਹਮਣਾ ਕੀਤਾ ਹੈ, ਉਸ ਨੂੰ ਯਕੀਨਨ ਵਿਸ਼ਵਾਸਘਾਤ ਕਿਹਾ ਜਾ ਸਕਦਾ ਹੈ। ਬੇਅੰਤ ਲਾਲਸਾਵਾਂ ਅਤੇ ਨਿੱਜੀ ਹਿੱਤਾਂ ਨੇ ਦੇਸ਼ ਅਤੇ ਇਸ ਦੇ ਲੋਕਾਂ ਨਾਲ ਵਿਸ਼ਵਾਸਘਾਤ ਕਰਨ ਨੂੰ ਜਨਮ ਦਿੱਤਾ ਹੈ।"
ਪੁਤਿਨ ਨੇ ਜ਼ੋਰ ਦੇ ਕੇ ਕਿਹਾ ਕਿ ਦੇਸ਼ ਵਿਚ ਮੁੜ ਘਰੇਲੂ ਯੁੱਧ ਨਹੀਂ ਹੋਣ ਦਿੱਤਾ ਜਾਵੇਗਾ। ਪੁਤਿਨ ਨੇ ਵੈਗਨਰ ਗਰੁੱਪ ਦੀਆਂ ਕਾਰਵਾਈਆਂ ਨੂੰ 'ਪਿੱਠ 'ਚ ਛੁਰਾ ਮਾਰਨ', 'ਦੇਸ਼ਧ੍ਰੋਹ' ਅਤੇ 'ਹਥਿਆਰਬੰਦ ਬਗਾਵਤ' ਦੱਸਿਆ। ਉਨ੍ਹਾਂ ਕਿਹਾ ਕਿ ਦੇਸ਼ ਵਿਰੁੱਧ ਹਥਿਆਰ ਚੁੱਕਣ ਵਾਲਿਆਂ ਨੂੰ ਸਜ਼ਾ ਦਿੱਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਦੱਖਣੀ ਸ਼ਹਿਰ ਰੋਸਟੋਵ-ਆਨ-ਡੌਨ ਵਿਚ ਸਥਿਰਤਾ ਬਹਾਲ ਕਰਨ ਲਈ ਨਿਰਣਾਇਕ ਕਾਰਵਾਈ ਕੀਤੀ ਜਾਵੇਗੀ।
ਨਿਜੀ ਫੌਜੀ ਕੰਪਨੀ ਵੈਗਨਰ ਦੇ ਸੰਸਥਾਪਕ ਯੇਵਗੇਨੀ ਪ੍ਰਿਗੋਜਿਨ ਦੇ ਟੈਲੀਗ੍ਰਾਮ ਚੈਨਲ ਨੇ ਪਹਿਲਾਂ ਦੇਸ਼ ਦੇ ਫੌਜੀ ਨੇਤਾਵਾਂ 'ਤੇ ਦੋਸ਼ ਲਗਾਉਂਦੇ ਹੋਏ ਕਈ ਆਡੀਓ ਪੋਸਟ ਕੀਤੇ ਸਨ। ਇਸ ਤੋਂ ਬਾਅਦ ਰੂਸ ਦੀ ਸੰਘੀ ਸੁਰੱਖਿਆ ਸੇਵਾ (FSB) ਨੇ ਹਥਿਆਰਬੰਦ ਬਗਾਵਤ ਦੇ ਸੱਦੇ 'ਤੇ ਇੱਕ ਅਪਰਾਧਿਕ ਕੇਸ ਖੋਲ੍ਹਿਆ ਹੈ। ਐਫਐਸਬੀ ਨੇ ਵੈਗਨਰ ਦੇ ਲੜਾਕਿਆਂ ਨੂੰ ਪ੍ਰਿਗੋਜ਼ਿਨ ਦੇ ਹੁਕਮਾਂ ਦੀ ਪਾਲਣਾ ਨਾ ਕਰਨ ਦੀ ਅਪੀਲ ਕੀਤੀ।
ਦਰਅਸਲ, 24 ਜੂਨ 2023 ਦੀ ਸਵੇਰ ਨੂੰ ਵੈਗਨਰ ਸਮੂਹ ਦੇ ਸੈਨਿਕ ਯੂਕਰੇਨ ਤੋਂ ਕਈ ਐਂਟਰੀ ਪੁਆਇੰਟਾਂ ਰਾਹੀਂ ਰੂਸ ਵਿਚ ਦਾਖਲ ਹੋਏ। ਉਸ ਨੇ ਰੋਸਟੋਵ ਉੱਤੇ ਕਬਜ਼ਾ ਕਰਨ ਦੀ ਵੀ ਗੱਲ ਕੀਤੀ, ਉਹ ਸ਼ਹਿਰ ਜਿੱਥੇ ਦੱਖਣੀ ਕਮਾਂਡ ਦਾ ਹੈੱਡਕੁਆਰਟਰ ਹੈ। ਸਮੂਹ ਦੇ ਨੇਤਾ ਯੇਵਗੇਨੀ ਪ੍ਰਿਗੋਜਿਨ ਨੇ ਆਪਰੇਸ਼ਨ ਨੂੰ "ਆਜ਼ਾਦੀ ਦਾ ਮਾਰਚ" ਦੱਸਿਆ।
