ਯੂ.ਪੀ. ’ਚ ਹੁਣ ਖ਼ੂਨ ਕੱਢਣ ਵਾਲਾ ਗੈਂਗ ਸਰਗਰਮ
ਮੇਰਠ : ਉੱਤਰ ਪ੍ਰਦੇਸ਼ ਦੇ ਮੇਰਠ ਜ਼ਿਲ੍ਹੇ ਵਿਚ ਬਦਮਾਸ਼ਾਂ ਨੇ ਇਕ ਸਨਸਨੀਖ਼ੇਜ਼ ਵਾਰਦਾਤ ਨੂੰ ਅੰਜ਼ਾਮ ਦਿੰਦੇ ਹੋਏ ਇਕ 12 ਸਾਲ ਦੇ ਇਕ ਬੱਚੇ ਨੂੰ ਅਗਵਾ ਕਰ ਕੇ ਉਸ ਦੇ ਸਰੀਰ ’ਚੋਂ ਦੋ ਯੂਨਿਟ ਖ਼ੂਨ ਕੱਢ ਕੇ ਉਸ ਨੂੰ ਛੱਡ ਦਿਤਾ। ਇਹ ਘਟਨਾ ਸ਼ਹਿਰ ਨਾਲ ਲਗਦੇ ਥਾਣਾ ਪੱਲਵਪੁਰਮ ਖੇਤਰ ਦੀ ਹੈ। ਪੁਲਿਸ ਨੇ ਇਸ ਦੀ ਜਾਣਕਾਰੀ ਦਿਤੀ। ਮੇਰਠ ਦੇ ਮੋਦੀਪੁਰਮ ਦੇ ਪੱਲਵਪੁਰਮ ਫ਼ੇਜ਼-2 ਵਿਚ ਰਹਿਣ ਵਾਲੇ ਲਾਲ ਸਿੰਘ ਨੇ ਪੁਲਿਸ ਨੂੰ ਪੁੱਤਰ ਵੰਸ਼ ਦੇ ਅਗਵਾ ਹੋਣ ਦੀ ਸ਼ਿਕਾਇਤ ਦਿਤੀ।
ਲਾਲ ਸਿੰਘ ਨੇ ਪੁਲਿਸ ਨੂੰ ਦਸਿਆ ਕਿ ਕੱਲ੍ਹ ਸ਼ਾਮ 4 ਵਜੇ ਦੇ ਕਰੀਬ ਵੰਸ਼ ਅਪਣੇ ਦੋਸਤ ਦੇ ਘਰ ਜਾਣ ਦੀ ਗੱਲ ਕਹਿ ਕੇ ਘਰੋਂ ਗਿਆ ਸੀ ਪਰ ਉਹ ਨਾ ਤਾਂ ਅਪਣੇ ਦੋਸਤ ਦੇ ਘਰ ਪੁੱਜਾ ਅਤੇ ਨਾ ਹੀ ਵਾਪਸ ਆਇਆ। ਪੁਲਿਸ ਵੰਸ਼ ਦੀ ਭਾਲ ਵਿਚ ਜੁਟੀ ਸੀ ਕਿ ਕਰੀਬ 4 ਘੰਟੇ ਬਾਅਦ ਰਾਤ ਨੂੰ ਉਹ ਅਪਣੇ ਘਰ ਪਹੁੰਚਿਆ, ਜਿਸ ਦੀ ਸੂਚਨਾ ਪੁਲਿਸ ਨੇ ਪ੍ਰਵਾਰ ਨੂੰ ਦਿਤੀ।
ਵੰਸ਼ ਨੇ ਪੁਲਿਸ ਨੂੰ ਦਸਿਆ ਕਿ ਪੱਲਵਪੁਰਮ ਸਥਿਤ ਨਾਲੰਦਾ ਸਕੂਲ ਨੇੜੇ ਬਾਈਕ ਸਵਾਰ ਦੋ ਨੌਜਵਾਨ ਆਏ ਅਤੇ ਉਸ ਦੇ ਮੂੰਹ ’ਤੇ ਰੂਮਾਲ ਰੱਖ ਦਿਤਾ। ਜਿਸ ਤੋਂ ਬਾਅਦ ਉਹ ਬੇਹੋਸ਼ ਹੋ ਗਿਆ ਅਤੇ ਜਦੋਂ ਹੋਸ਼ ਆਈ ਤਾਂ ਉਹ ਇਕ ਪਿੰਡ ਦੇ ਜੰਗਲ ’ਚ ਸੀ, ਜਿਥੇ ਪਹਿਲਾਂ ਤੋਂ 2-3 ਹੋਰ ਬੱਚੇ ਮੰਜੇ ’ਤੇ ਲੇਟੇ ਹੋਏ ਸਨ। ਪਿਤਾ ਨੇ ਦਸਿਆ ਕਿ ਵੰਸ਼ ਨੇ ਉਨ੍ਹਾਂ ਨੂੰ ਦਸਿਆ ਕਿ ਬਦਮਾਸ਼ਾਂ ਨੇ ਉਸ ਦੇ ਸਰੀਰ ਤੋਂ ਦੋ ਬੋਤਲ ਖ਼ੂਨ ਕਢਿਆ ਅਤੇ ਉਸ ਨੂੰ ਧਮਕੀ ਦਿਤੀ ਕਿ ਪੁਲਿਸ ਨੂੰ ਦਸਿਆ ਤਾਂ ਨਤੀਜਾ ਮਾੜਾ ਹੋਵੇਗਾ।
ਬੱਚੇ ਨੇ ਦਸਿਆ ਕਿ ਉਸ ਤੋਂ ਬਾਅਦ ਦੋ ਨੌਜਵਾਨ ਪੱਲਵਪੁਰਮ ਵਿਚ ਆਰ. ਐੱਨ. ਇੰਟਰਨੈਸ਼ਨਲ ਸਕੂਲ ਕੋਲ ਕਬਰਸਤਾਨ ਦੇ ਸਾਹਮਣੇ ਉਸ ਨੂੰ ਛੱਡ ਕੇ ਦੌੜ ਗਏ, ਜਿਥੋਂ ਵੰਸ਼ ਪੈਦਲ ਅਪਣੇ ਘਰ ਪੁੱਜਾ। ਪੱਲਵਪੁਰਮ ਦੇ ਇੰਸਪੈਕਟਰ ਦੇਵੇਸ਼ ਸ਼ਰਮਾ ਨੇ ਦਸਿਆ ਕਿ ਬੱਚੇ ਦਾ ਬਿਆਨ ਦਰਜ ਕੀਤਾ ਗਿਆ ਹੈ ਅਤੇ ਉਸ ਦੇ ਆਧਾਰ ’ਤੇ ਹੀ ਬਦਮਾਸ਼ਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।
