ਦਿੱਲੀ 'ਚ 6.9 ਤਕ ਡਿਗਿਆ ਪਾਰਾ, 17 ਸਾਲਾਂ ਦੇ ਕਿਰਾਰਡ ਟੁਟਿਆ
ਨਵੀਂ ਦਿੱਲੀ : ਇਸ ਵਾਰ ਅਗੇਤੀ ਆਈ ਠੰਡ ਨੇ ਨਵੰਬਰ ਮਹੀਨੇ ਹੀ ਆਪਣਾ ਰੰਗ ਵਿਖਾਉਣਾ ਸ਼ੁਰੂ ਕਰ ਦਿਤਾ ਹੈ। ਦਿੱਲੀ 'ਚ ਨਵੰਬਰ ਮਹੀਨੇ ਪੈਣ ਵਾਲੀ ਠੰਡ ਨੇ ਪਿਛਲੇ ਕਰੀਬ 17 ਸਾਲਾਂ ਦੇ ਰਿਕਾਰਡ ਤੋੜ ਦਿਤਾ ਹੈ। ਦਿੱਲੀ 'ਚ ਸਵੇਰ ਦੀ ਠੰਡ ਲਗਤਾਰ ਵਾਧਾ ਹੋ ਰਿਹਾ ਹੈ। ਦਿੱਲੀ 'ਚ ਐਤਵਾਰ ਨੂੰ ਘੱਟੋ-ਘੱਟ ਤਾਪਮਾਨ 6.9 ਡਿਗਰੀ ਰਿਹਾ ਜੋ ਪਿਛਲੇ 17 ਸਾਲ ਵਿਚ ਸਭ ਤੋਂ ਘੱਟ ਸੀ। ਸੋਮਵਾਰ ਤਾਪਮਾਨ 'ਚ ਹੋਰ ਵੀ ਗਿਰਾਵਟ ਦਰਜ ਕੀਤੀ ਗਈ ਤੇ ਤਾਪਮਾਨ 6.3 ਡਿਗਰੀ ਰਿਹਾ। ਮੌਸਮ ਵਿਭਾਗ ਮੁਤਾਬਕ ਆਉਂਦੇ ਦਿਨਾਂ ਦੌਰਾਨ ਘੱਟੋ ਘੱਟ ਤਾਪਮਾਨ 'ਚ ਵਾਧਾ ਹੋ ਸਕਦਾ ਹੈ।
ਮੌਸਮ ਵਿਭਾਗ ਤੋਂ ਸੋਮਵਾਰ ਮਿਲੀ ਜਾਣਕਾਰੀ ਮੁਤਾਬਕ ਦਿੱਲੀ 'ਚ ਘੱਟੋ ਘੱਟ ਤਾਪਮਾਨ 'ਚ ਦੋ ਤੋਂ ਤਿੰਨ ਡਿਗਰੀ ਦਾ ਵਾਧਾ ਹੋਣ ਦੀ ਸੰਭਾਵਨਾ ਹੈ। ਇਸ ਨਾਲ ਹਵਾ ਗੁਣਵੱਤਾ 'ਚ ਗਿਰਾਵਟ ਆ ਸਕਦੀ ਹੈ। ਕਿਉਂਕਿ ਤਾਪਮਾਨ 'ਚ ਵਾਧੇ ਦੇ ਨਾਲ ਹੀ ਹਵਾ ਦੀ ਗਤੀ ਘੱਟ ਹੋ ਜਾਵੇਗੀ। ਜੇਕਰ ਹਵਾ ਦੀ ਗਤੀ ਘੱਟ ਹੁੰਦੀ ਹੈ ਤਾਂ ਦਿੱਲੀ 'ਚ ਪ੍ਰਦੂਸ਼ਣ ਵਧ ਸਕਦਾ ਹੈ। ਪਿਛਲੇ ਕੁਝ ਦਿਨਾਂ 'ਚ ਹਵਾ ਦੀ ਗਤੀ ਤੇਜ਼ ਹੋਣ ਨਾਲ ਪ੍ਰਦੂਸ਼ਣ 'ਚ ਗਿਰਾਵਟ ਆਈ ਹੈ।
ਮੌਸਮ ਵਿਭਾਗ ਮੁਤਾਬਕ 20-22 ਨਵੰਬਰ ਤਕ ਹਵਾ ਦੀ ਗਤੀ ਚੰਗੀ ਸੀ। ਇਹ ਲਗਪਗ 20 ਕਿਮੀ ਪ੍ਰਤੀ ਘੰਟਾ ਸੀ। ਹਵਾ ਦੀ ਗਤੀ ਆਉਣ ਵਾਲੇ ਦਿਨਾਂ 'ਚ 6 ਕਿਮੀਂ ਪ੍ਰਤੀ ਘੰਟਾ ਹੋ ਜਾਵੇਗੀ ਜਿਸ ਨਾਲ ਹਵਾ ਗੁਣਵੱਤਾ ਵਿਗੜ ਜਾਵੇਗੀ। ਇਹ ਵੀ ਅੰਦਾਜ਼ਾ ਲਾਇਆ ਜਾ ਰਿਹਾ ਹੈ ਕਿ ਦਸੰਬਰ ਤੇ ਜਨਵਰੀ 'ਚ ਘੱਟੋ-ਘੱਟ ਤਾਪਮਾਨ 'ਚ ਹੋਰ ਗਿਰਾਵਟ ਆਵੇਗੀ ਤੇ ਕੁਝ ਪੁਰਾਣੇ ਰਿਕਾਰਡ ਟੁੱਟ ਸਕਦੇ ਹਨ।
ਜੇਕਰ ਪਿਛਲੇ ਸਾਲ ਦੀ ਗੱਲ ਕਰੀਏ ਤਾਂ ਇਸ ਸਾਲ ਦੀ ਤਰ੍ਹਾਂ ਅਕਤੂਬਰ-ਨਵੰਬਰ 'ਚ ਠੰਡ ਨਹੀਂ ਸੀ।ਇਸ ਸਾਲ ਅਕਤੂਬਰ 58 ਸਾਲ 'ਚ ਸਭ ਤੋਂ ਠੰਡਾ ਮਹੀਨਾ ਸੀ ਤੇ ਨਵੰਬਰ 'ਚ ਵੀ ਠੰਡ ਵਧ ਰਹੀ ਹੈ। ਅਕਤੂਬਰ ਤੇ ਨਵੰਬਰ 'ਚ ਰਿਕਾਰਡ ਟੁੱਟ ਗਿਆ ਹੈ। ਘੱਟੋ ਘੱਟ ਤਾਪਮਾਨ ਦੋ ਡਿਗਰੀ ਤੋਂ ਹੇਠਾਂ ਹੈ ਤੇ ਜਨਵਰੀ 'ਚ ਸਰਦੀ ਦੇ ਰਿਕਾਰਡ ਟੁੱਟ ਸਕਦੇ ਹਨ। ਕਾਬਲੇਗੌਰ ਹੈ ਕਿ ਇਸ ਵਾਰ ਪਿਛਲੇ ਸਾਲਾਂ ਦੇ ਮੁਕਾਬਲੇ ਠੰਢ ਤੇਜ਼ੀ ਨਾਲ ਵੱਧ ਰਹੀ ਹੈ। ਪਹਾੜੀ ਇਲਾਕਿਆਂ ਵਿਚ ਬਰਫ ਦੀ ਚਾਦਰ ਵਿਛਣ ਬਾਅਦ ਮੈਦਾਨੀ ਇਲਾਕਿਆਂ ਅੰਦਰ ਵੀ ਸੀਤ ਲਹਿਰ ਜ਼ੋਰ ਫੜਦੀ ਜਾ ਰਹੀ ਹੈ।