ਕਿਹਾ, ਸੋਨੀਪਤ ਦੀ ਇਸ ਧਰਤੀ ਤੋਂ ਮੈਂ ਦੇਸ਼ ਦੇ ਮਹਾਨ ਪੁੱਤਰ ਸਰ ਛੋਟੂ ਰਾਮ ਜੀ ਨੂੰ, ਬਾਬਾ ਲਕਸ਼ਮੀਚੰਦ ਜੀ ਨੂੰ ਸਲਾਮ ਕਰਦਾ ਹਾਂ

ਚੰਡੀਗੜ੍ਹ : ਹਰਿਆਣਾ ਵਿਧਾਨ ਸਭਾ ਚੋਣ ਲਈ ਪ੍ਰਚਾਰ ਕਰਿਦਆਂ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਗੋਹਾਨਾ, ਸੋਨੀਪਤ ’ਚ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੀ ਇਕ ਰੈਲੀ ਨੂੰ ਸੰਬੋਧਨ ਕੀਤਾ। ਹਰਿਆਣਾ ਚੋਣਾਂ ਨੂੰ ਲੈ ਕੇ ਇਹ ਉਨ੍ਹਾਂ ਦੀ ਦੂਜੀ ਰੈਲੀ ਹੈ।
ਸੰਬੋਧਨ ਦੀ ਸ਼ੁਰੂਆਤ ਕਰਦੇ ਹੋਏ ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ, ‘‘ਸੋਨੀਪਤ ਦੀ ਇਸ ਧਰਤੀ ਤੋਂ ਮੈਂ ਦੇਸ਼ ਦੇ ਮਹਾਨ ਪੁੱਤਰ ਸਰ ਛੋਟੂ ਰਾਮ ਜੀ ਨੂੰ ਸਲਾਮ ਕਰਦਾ ਹਾਂ। ਸਰ ਛੋਟੂ ਰਾਮ ਜੀ ਦਾ ਜੀਵਨ ਕਿਸਾਨਾਂ ਅਤੇ ਗਰੀਬਾਂ ਨੂੰ ਸਮਰਪਿਤ ਸੀ। ਮੈਂ ਬਾਬਾ ਲਕਸ਼ਮੀਚੰਦ ਜੀ ਨੂੰ ਸਲਾਮ ਕਰਦਾ ਹਾਂ ਜਿਨ੍ਹਾਂ ਨੇ ਹਰਿਆਣਾ ਦੀ ਲੋਕ ਕਲਾ ਨੂੰ ਅਮੀਰ ਕੀਤਾ। ਅੱਜ 25 ਸਤੰਬਰ ਸਾਡੇ ਮੋਢੀ ਪੰਡਿਤ ਦੀਨ ਦਿਆਲ ਉਪਾਧਿਆਏ ਦਾ ਜਨਮ ਦਿਨ ਵੀ ਹੈ। ਮੈਂ ਸਤਿਕਾਰਯੋਗ ਦੀਨ ਦਿਆਲ ਜੀ ਨੂੰ ਸ਼ਰਧਾਂਜਲੀ ਭੇਟ ਕਰਦਾ ਹਾਂ।’’
ਮੋਦੀ ਨੇ ਕਿਹਾ, ‘‘ਮੈਂ ਮਾਣ ਨਾਲ ਕਹਿੰਦਾ ਹਾਂ ਕਿ ਮੈਂ ਜੋ ਵੀ ਹਾਂ, ਉਸ ’ਚ ਹਰਿਆਣਾ ਦਾ ਵੱਡਾ ਯੋਗਦਾਨ ਹੈ। ਇਸ ਵਾਰ ਫਿਰ ਹਰਿਆਣਾ ਕਹਿ ਰਿਹਾ ਹੈ ਕਿ ਹਰਿਆਣਾ ’ਚ ਇਕ  ਵਾਰ ਫਿਰ ਭਾਜਪਾ ਦੀ ਸਰਕਾਰ ਹੈ।’’
ਉਨ੍ਹਾਂ ਅੱਗੇ ਕਾਂਗਰਸ ’ਤੇ ਤਿੱਖਾ ਹਮਲਾ ਕੀਤਾ ਅਤੇ ਕਿਹਾ ਕਿ ਜੇਕਰ ਉਹ ਗ਼ਲਤੀ ਨਾਲ ਵੀ ਹਰਿਆਣਾ ਦੀ ਸੱਤਾ ’ਚ ਆ ਗਈ ਤਾਂ ਉਸ ਦੇ ਅੰਦਰੂਨੀ ਕਲੇਸ਼ ਕਾਰਨ ਸਥਿਰਤਾ ਅਤੇ ਵਿਕਾਸ ਦਾਅ ’ਤੇ ਲੱਗ ਜਾਵੇਗਾ ਅਤੇ ਉਹ ਸੂਬੇ ਨੂੰ ਬਰਬਾਦ ਕਰ ਦੇਣਗੇ। ਉਨ੍ਹਾਂ ਕਿਹਾ, ‘‘ਜਿਵੇਂ-ਜਿਵੇਂ ਵੋਟਾਂ ਦਾ ਦਿਨ ਨੇੜੇ ਆ ਰਿਹਾ ਹੈ, ਕਾਂਗਰਸ ਦੀ ਹਾਰ ਹੁੰਦੀ ਜਾ ਰਹੀ ਹੈ। ਹਰਿਆਣਾ ’ਚ ਭਾਜਪਾ ਦਾ ਸਮਰਥਨ ਵੱਧ ਰਿਹਾ ਹੈ।’’ ਸੂਬੇ ’ਚ ਪੰਜ ਅਕਤੂਬਰ ਨੂੰ ਵੋਟਾਂ ਪੈਣੀਆਂ ਹਨ।

ਹਰਿਆਣਾ ਪ੍ਰਧਾਨ ਮੰਤਰੀ ਦੇ ਨਾਲ ਕਦਮ ਦਰ ਕਦਮ ਚੱਲੇਗਾ :  ਨਾਇਬ ਸੈਣੀ

ਇਸ ਰੈਲੀ ’ਚ ਕਾਰਜਕਾਰੀ ਸੀ.ਐਮ ਨਾਇਬ ਸੈਣੀ, ਰੋਹਤਕ ਤੋਂ ਸਾਬਕਾ ਸੰਸਦ ਮੈਂਬਰ ਅਤੇ ਗੋਹਾਨਾ ਤੋਂ ਉਮੀਦਵਾਰ ਅਰਵਿੰਦ ਸ਼ਰਮਾ ਸਮੇਤ ਕਈ ਨੇਤਾ ਮੌਜੂਦ ਹਨ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਹਿਸਾਰ ਅਤੇ ਪਲਵਲ ’ਚ ਵੀ ਚੋਣ ਰੈਲੀ ਕੀਤੀ। ਕਾਰਜਕਾਰੀ ਮੁੱਖ ਮੰਤਰੀ ਨਾਇਬ ਸੈਣੀ ਨੇ ਕਿਹਾ ਕਿ ਅੱਜ ਅਜਿਹਾ ਕੋਈ ਖੇਤਰ ਨਹੀਂ ਜਿੱਥੇ ਹਰਿਆਣਾ ਦਾ ਨਾਂ ਨਾ ਹੋਵੇ। ਉਨ੍ਹਾਂ ਕਿਹਾ, ‘‘ਮੈਂ ਪੂਰੇ ਹਰਿਆਣਾ ਦੀ ਤਰਫੋਂ ਤੁਹਾਨੂੰ ਭਰੋਸਾ ਦਿਵਾਉਂਦਾ ਹਾਂ ਕਿ ਜਿਸ ਤਰ੍ਹਾਂ ਹਰਿਆਣਾ ਪਿਛਲੇ 10 ਸਾਲਾਂ ਤੋਂ ਤੁਹਾਡੇ ਨਾਲ ਕਦਮ-ਦਰ-ਕਦਮ ਚੱਲ ਰਿਹਾ ਹੈ, ਭਵਿੱਖ ’ਚ ਵੀ ਇਸੇ ਤਰ੍ਹਾਂ ਚੱਲਦਾ ਰਹੇਗਾ। ਤੁਸੀਂ ਹਰਿਆਣੇ ਨੂੰ ਸੜਕਾਂ ਦਿਤੀਆਂ। ਨੈਸ਼ਨਲ ਹਾਈਵੇ ਦਿਤੇ। ਅਸੀਂ ਗਰੀਬਾਂ ਨੂੰ ਉਨ੍ਹਾਂ ਹੀ ਸੜਕਾਂ ’ਤੇ  ਮੁਫਤ ਯਾਤਰਾ ਪਾਸ ਦਿਤੇ ਹਨ। ਅਸੀਂ ਹਰਿਆਣਾ ਦੇ ਹਰ ਵਰਗ ਨੂੰ ਘਰ-ਘਰ ਰਾਸ਼ਨ ਮੁਹੱਈਆ ਕਰਵਾਇਆ ਹੈ। ਤੁਸੀਂ ਬੇਟੀ ਬਚਾਓ-ਬੇਟੀ ਪੜ੍ਹਾਓ ਦਾ ਪ੍ਰਣ ਲਿਆ, ਅਸੀਂ ਪੂਰੇ ਹਰਿਆਣਾ ’ਚ 36 ਨਵੇਂ ਹਰਿਆਣਾ ਪੁਲਿਸ ਸਟੇਸ਼ਨ ਖੋਲ੍ਹੇ। ਧੀਆਂ ਨੂੰ ਪੜ੍ਹਾਉਣ ਲਈ ਹਰ ਵੀਹ ਕਿਲੋਮੀਟਰ ’ਤੇ ਇੰਟਰ ਕਾਲਜ ਖੋਲ੍ਹੇ ਜਾਣ।’’ ਇਸ ਮੌਕੇ ਅਰਵਿੰਦ ਸ਼ਰਮਾ ਨੇ ਕਿਹਾ ਕਿ ਇਹ ਭੀੜ ਦੱਸ ਰਹੀ ਹੈ ਕਿ ਤੀਜੀ ਵਾਰ ਭਾਜਪਾ ਦੀ ਸਰਕਾਰ ਆ ਰਹੀ ਹੈ। ਉਨ੍ਹਾਂ ਕਿਹਾ, ‘‘ਹਰਿਆਣਾ ’ਚ ਭਾਜਪਾ 65 ਤੋਂ ਵੱਧ ਸੀਟਾਂ ਲੈ ਕੇ ਸਰਕਾਰ ਬਣਾਉਣ ਜਾ ਰਹੀ ਹੈ। ਲੋਕ ਜਾਣਦੇ ਹਨ ਕਿ ਗਰੀਬਾਂ ਦਾ ਪੁੱਤਰ ਨਾਇਬ ਸੈਣੀ ਕਿਸਾਨਾਂ, ਗਰੀਬਾਂ ਅਤੇ ਖਿਡਾਰੀਆਂ ਦਾ ਖਿਆਲ ਰੱਖਦਾ ਹੈ। ਲੋਕ ਇਹ ਵੀ ਸਮਝ ਗਏ ਹਨ ਕਿ ਨਾਇਬ ਸੈਣੀ ਗਰੀਬਾਂ ਦਾ ਪੁੱਤਰ ਹੈ ਅਤੇ ਗਰੀਬਾਂ ਦਾ ਖਿਆਲ ਰੱਖਦਾ ਹੈ। ਗਰੀਬੀ ਦੀ ਸੇਵਾ ਉਹੀ ਕਰ ਸਕਦਾ ਹੈ ਜਿਸ ਨੇ ਗਰੀਬੀ ਦੇਖੀ ਹੋਵੇ।’’