ਸਰਕਾਰ ਚੀਨ ਨਾਲ ਲੜਨ ਦੀ ਜਗ੍ਹਾ ਕਾਂਗਰਸ ਨਾਲ ਲੜਨ 'ਚ ਪੂਰੀ ਤਾਕਤ ਲਗਾ ਰਹੀ ਹੈ : ਸੁਰਜੇਵਾਲਾ
ਨਵੀਂ ਦਿੱਲੀ, 25 ਜੂਨ : ਕਾਂਗਰਸ ਨੇ ਲੱਦਾਖ ਦੇ ਗਤੀਰੋਧ ਵਾਲੇ ਇਲਾਕਿਆਂ 'ਚ ਚੀਨੀ ਫ਼ੌਜੀਆਂ ਦੀਆਂ ਗਤੀਵਿਧੀਆ ਵਧਣ ਨਾਲ ਜੁੜੀਆਂ ਖ਼ਬਰਾਂ ਦੌਰਾਨ ਵੀਰਵਾਰ ਨੂੰ ਸਰਕਾਰ 'ਤੇ ਫ਼ੌਜ ਦਾ ਮਨੋਬਲ ਡੇਗਣ ਦਾ ਦੋਸ਼ ਲਾਇਆ ਅਤੇ ਸਵਾਲ ਕੀਤਾ ਕਿ ਕੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸਰਬਪਾਰਟੀ ਮੀਟਿੰਗ ਦੌਰਾਨ ਅਤੇ ਦੇਸ਼ ਦੇ ਸਾਹਮਣੇ ਸਹੀ ਤੱਥ ਨਹੀਂ ਰੱਖੇ?
ਪਾਰਟੀ ਦੇ ਮੁੱਖ ਬੁਲਾਰੇ ਰਣਦੀਪ ਸੁਰਜੇਵਾਲਾ ਨੇ ਇਹ ਦਾਅਵਾ ਵੀ ਕੀਤਾ ਕਿ ਸਰਕਾਰ ਚੀਨ ਨਾਲ ਲੜਨ ਦੀ ਜਗ੍ਹਾ ਦੇਸ਼ ਦੀ ਵਿਰੋਧੀ ਧਿਰ ਖ਼ਾਸਕਾਰ ਕਾਂਗਰਸ ਨਾਲ ਲੜਨ 'ਚ ਪੂਰੀ ਤਾਕਤ ਲਗਾ ਰਹੀ ਹੈ। ਦੂਜੇ ਪਾਸੇ ਲੋਕਸਭਾ 'ਚ ਕਾਂਗਰਸ ਆਗੂ ਅਧੀਰ ਰੰਜਨ ਚੌਧਰੀ ਨੇ ਕਿਹਾ ਕਿ ਚੀਨ ਨੂੰ ਕਰਾਰਾ ਜਵਾਬ ਦਿਤਾ ਜਾਣਾ ਚਾਹੀਦਾ ਹੈ ਕਿਉਂਕਿ ਅਸੀ ਹਥਿਆਰ 'ਅੰਡੇ ਦੇਣ ਲਈ' ਨਹੀਂ ਰੱਖੇ ਹੋਏ।
File
ਸੁਰਜੇਵਾਲਾ ਨੇ ਵੀਡੀਉ ਲਿੰਕ ਰਾਹੀਂ ਪੱਤਰਕਾਰਾਂ ਨੂੰ ਕਿਹਾ, ''ਮੋਦੀ ਸਰਕਾਰ ਦੇਸ਼ ਨੂੰ ਦੱਸ ਰਹੀ ਹੈ ਕਿ ਗਲਵਾਨ ਘਾਟੀ, ਪੈਂਗੋਂਗ ਸੋ (ਝੀਲ) ਇਲਾਕੇ ਅਤੇ ਹਾਟ ਸਪ੍ਰਿੰਗ 'ਚ ਚੀਨੀ ਫ਼ੌਜ ਨੂੰ ਪਿੱਛੇ ਹਟਾਉਣ ਦੇ ਬਾਅਦ ਸਥਿਤੀ ਪਹਿਲੇ ਜਿਹੀ ਬਣਾਈ ਰਖਣ ਬਾਰੇ ਗੱਲਬਾਤ ਜਾਰੀ ਹੈ, ਪਰੰਤੂ ਅੱਜ ਅਖ਼ਬਾਰਾਂ ਦੀਆਂ ਖ਼ਬਰਾਂ 'ਚ ਉਪਗ੍ਰਹਿ ਤੋਂ ਲਈਆਂ ਗਈਆਂ ਤਸਵੀਰਾਂ ਤੇ ਫ਼ੌਜ ਦੇ ਸਾਬਕਾ ਜਨਰਲਾਂ ਦੇ ਬਿਆਨਾਂ ਤੋਂ ਸਾਫ਼ ਹੈ ਕਿ ਚੀਨੀ ਗਤੀਵਿਧੀਆਂ ਵੱਧ ਗਈਆਂ ਹਨ।''
ਕਾਂਗਰਸ ਆਗੂ ਮੁਤਾਬਕ ਚੀਨੀ ਫ਼ੌਜ ਨੇ ਪਿੱਛੇ ਹਟਣ ਦੇ ਬਜਾਏ ਪੀਪੀ-14 ਪੁਆਈਂਟ, ਗਲਵਾਨ ਘਾਟੀ, ਲੱਦਾਖ਼ 'ਚ ਟੈਂਟ ਦੁਬਾਰਾ ਲਗਾ ਕੇ ਕਬਜ਼ਾ ਕਰ ਲਿਆ ਹੈ। ਉਨ੍ਹਾਂ ਕਿਹਾ, ਚੀਨੀ ਫ਼ੌਜ ਨੇ ਪੈਂਗਾਂਗ ਸੋ ਇਲਾਕੇ 'ਚ ਫਿੰਗਰ-4 ਤੇ ਫਿੰਗਰ-8 ਵਿਚਕਾਰ ਨਵੇਂ ਫ਼ੌਜੀ ਸਾਜੋ ਸਾਮਾਨ ਵਧਾ ਕੇ ਨਵੇਂ ਬੰਕਰਾਂ ਦਾ ਨਿਰਮਾਣ ਕਰ ਲਿਆ ਹੈ। ਚੀਨੀ ਫ਼ੌਜ ਨੇ ਪੂਰਬੀ ਲੱਦਾਖ਼ ਸੈਕਟਰ 'ਚ ਵੀ ਅਪਣੇ ਤੋਪਖ਼ਾਨੇ ਤੇ ਬਖ਼ਤਰਬੰਦ ਰੈਜ਼ਿਮੈਂਟ ਦੇ ਨਾਲ ਲਗਭਗ 10,000 ਫ਼ੌਜੀ ਤਾਇਨਾਤ ਕੀਤੇ ਹੋਏ ਹਨ।'' (ਪੀਟੀਆਈ)
